رانا ثنا اللہ دے اثاثیاں دی تفصیل لہور ہائی کورٹ وچ آگئی

لہور( پنجابی میڈیا گروپ)قومی احتساب بیورو نے لیگی رہنما رانا ثنااللہ دے اثاثیاں دی تفصیل لہور ہائی کورٹ وچ جمع کرا دتی۔نیب رپورٹ وچ آکھیا گیا اے کہ رانا ثنا اللہ دے خلاف تین شکایتاں موصول ہوئیاں،3دسمبر2019ء نوں آمدنی توں ودھ اثاثیاں دے خلاف انکوائری شروع کیتی گئی، انکوائری وچ رانا ثنا تے اوہناں دے گھروالیاں دی 24پراپرٹیاں ساہمنے آئیاں، جائیداداں وچ پلازے، کمپنیاں، گھر، فارم ہاسز تے زرعی زمین شامل اے۔رپورٹ وچ ہور آکھیاگیا کہ رانا ثنا اللہ دیاں جائیداداں لہور، فیصل آباد وچ نیں، لیگی رہنما دی اک پرائیویٹ لمیٹڈ کمپنی آر ایس دے وی اے، رانا ثنا اللہ دے اثاثیاں دی کل مالیت ارباں روپے اے، انکوائری وچ پتہ چلیا کہ رانا ثنا اللہ تے اوہناں دے خاندان نے اثاثیاں دی اصل مالیت ظاہر نہیں کیتی، رانا ثنا اللہ نے2015،6تے2017ء وچ ہور سوسائیٹیاں وچ کروڑاں دی سرمایہ کاری کیتی، لیگی رہنما نے اپنے اثاثیاں دی جو مالیت ظاہر کیتی اوہ مارکیٹ ویلیو توں کافی گھٹ اے، رانا ثنا اللہ دے اثاثے اوہناں دی آمدنی توں ودھ نیں