چودھری برادران دی عرضیاں تے سماعت، نیب نوں اصل ریکارڈ پیش کرن دا حکم

لہور: ہائی کورٹ نے مسلم لیگ (ق) دے قائدین چودھری برادران دی عرضیاں دی سنوائی دے دوران نیب تے برہمی دا اظہار کردیاں مکمل تے اصل ریکارڈ پیش کرن دا حکم دے دتا اے۔ ڈائریکٹر جنرل نیب لہور عدالت دے ساہمنے پیش ہوئے تے کیس دی تفصیل پیش کیتی۔ اوہناں دا کہنا سی چودھری برادران دے کول سیاست شروع کرن لئی اک روپیہ وی نہیں سی۔ پرویز الٰہی تے مونس الٰہی نے ڈھائی ارب دی ٹی ٹیز لگوائیاں۔ رپورٹ وچ دسیا گیا اے چودھری شجاعت حسین نے 1985ء وچ سیاست دا آغاز 9لکھ روپے قرض لے کے کیتا پر اوہ ایس ویلے ڈھائی ارب روپے دے مالک نیں۔ چودھری پرویز الٰہی نے 7لکھ روپے قرض لے کے سیاست دا آغاز کیتا پر ایس ویلے اوہ ساڈھے 6ارب روپے دے اثاثیاں دے مالک نیں۔ چودھری برادران دے اثاثے آمدن نال رلدے نہیں۔ عدالتی استفسار تے ڈی جی نیب نے دسیا کہ 2017ء وچ چیئرمین نیب نے پرانے کیس مکمل کرن دی ہدایت کیتی۔ نیب دے افسر نوں اجازت دے بغیر بولن تے عدالت نے واضح کیتا کہ تہانوں تے ڈی جی نوں کمرہ عدالت توں باہر کڈھ دیاں گا۔ چودھری برادران دے وکیل نے دسیا کہ عدالت نے نیب توں کیس دا پورا ریکارڈ طلب کر لیا۔