بھارتی میڈیا دا بھارت

لکھت:عتیق انور راجہ

منہ توں نکلی ہوئی جھگ، پھُلے ہوئے نتھنے تے شرٹ دے کھلے بٹناں دے نال نمودار ہون والے بھارتی نیوز اینکر بھارت دے سوا ارب لوکاں دے دل و دماغ نوں ایہہ نقطہ سمجھان دی کوشش کردے نیں کہ پاکستان بھارت دے مقابلے وچ کجھ وی نہیں ۔ پاکستانی فوج بھارتی فوج دے ساہمنے کجھ منٹ وی نہیں ٹھہر سکدی ۔اپنی فوج دی بہادری دے قصے سناندے سناندے عقل دے انھے نیوز اینکر اچانک پاکستانی فوج دی تیاریاں تے طاقت دا ذکر کردے ہوئے ڈرے ڈرے جہے لگن لگدے نیں، پاکستانی فوج دی گل کردے ہوئے ایہناں بزدلاں نوں موت اپنے بوہت نیڑے لگن لگدی اے کہ اوہ بزدل نیوز اینکر دنیا نوں پاکستانی فوج توں ڈراندے ہوئے پاکستان اُتے پابندیاں دا ذکر لے کے بہہ جاندے نیں۔ جے کوئی تجزیہ نگار لائیو شو وچ بھارتی طیاریاں دے پاکستانی درخت تے کجھ پرندیاں دی تباہی دی حقیقت بیان کر دیوے تے ایہنوں شدید تنقید دا نشانہ بنایا جاندا اے کہ اوہ بھارتی فوج دے ’’شورے‘‘کر دار اُتے شک کر رہیا اے تے فوج دے کردار اُتے شک دی اجازت تے نہیں دتی جا سکدی۔ ایہہ تے بغاوت اے، ایہہ تے دیش دشمنی دا کم اے جدوں بھارت وچ بے جے پی دی حکومت آئی اے اودوں توں اوتھے اقلیتاں خاص طور تے مسلماناں نوں نشانہ بنایا جا رہیا اے۔ بھارتی حکمران جماعت چوں کے مسلم دشمنی وچ اک خاص پہچان رکھدی اے۔ بھارتی ٹی وی چینلز اُتے بیٹھن والے تجزیہ نگار تے پاکستان تے بھارت وچ موجود مسلماناں دے خلاف زہر اگلدے ای رہندے سن پر ہن بھارتی ٹی وی چینلز دے نیوز اینکر ٹی وی سکرین اُتے اک انج دا ماحول بنا دیندے نیں کہ ہر تجزیہ نگار نوں مجبور یا خوشی وچ مسلماناں تے پاکستان دے خلاف گل کرنی پیندی اے۔ بھارتی نیوز اینکر کدی لائیو شو وچ بھارتی مسلماناں نوں مدعو کر کے ایہناں توں بھارت زندہ باد تے اکھنڈ بھارت دا نعرہ لان لئی زور لاندے نیں تے کدی مسلماناں دے مذہبی معاملات نوں زیر بحث لیاندے ہوئے تنقید دے ناں اُتے ایہناں دے جذبات دی تذلیل کردے ویکھے جاندے نیں۔ بھارت دے اندرونی حالات نوں سمجھن دی کوشش کریئے تے ایہہ صاف نظر آندا اے کہ اوتھے ہر طبقہ دے لوک پریشان نیں۔ نہ صرف مسلم سکھ بلکہ بوہت وڈی تعداد وچ دلت ہندو وی بھارتی حکومت دے فیصلیاں توں بے چین نیں۔ بوہت ساری بھارتی ریاستاں اپنے وکھرے وطن لئی مسلح جدوجہد کر رہیاں نیں۔ آپ بھارت دے کجھ سینئر سیاست دان ایس گل اُتے فکر مند نظر آندے نیں کہ ایہناں دی حکومت تے میڈیا دیش نوں کس سمت لے جا رہے نیں۔ اوہ کہندے نیں کہ حکومت تے میڈیا ولوں ہندوستان وچ خاص طور تے مسلماناں دے مذہبی معاملات وچ اینی مداخلت کیتی جا رہی اے کہ جنہوں ویکھ کے لگن لگدا اے کہ جویں ہندوستان صرف ہندوواں لئی اے باقی یا تے اپنے مذہب تبدیل کر لین یا دوجے ملکاں نوں نکل جان۔پچھلے کئی دناں توں بھارت دے کسان حکومت دے خلاف سڑکاں اُتے نکلے ہوئے نیں، احتجاج کرن والیاں وچ بھارتی پنجاب دے کسان تعداد وچ زیادہ نیں۔ ایس دے علاوہ بھارت دوجے بوہت سارے سنگین ترین مسئلیاں دا شکار اے، پر کیا کرو کہ نہ تے بھارتی میڈیا اپنے عوام دی اصل حالت وکھاندا اے تے نہ ای اقوام متحدہ بھارتی عوام دی بدحالی نوں ویکھدے ہوئے بھارتی حکومت اُتے سختی کرن دی پوزیشن وچ نظر آندی اے۔ بھارتی مسلمان ایس ویلے شدید دبائو تے تنائو وچ نیں۔ ایس ویلے تے انج لگدا اے کہ اوہ بھارت دی متشدد سوچ رکھن والی حکومت تے ایس دے غنڈیا دے اگے گھٹنے ٹیک چکے نیں پر جے تاریخ اُتے نظر ماریے تے جدوں جدوں مسلماناں اُتے ظلم حد توں ودھیا اے ایہناں وچوں کوئی نہ کوئی انج دا لیڈر نکلیا اے جس نے ساری قوم نوں ظالم و جابر طاقتاں توں آزاد کروان دا ذمہ چک لیا اے۔ بھارتی میڈیا ہن ایس حد تیکر اگے ودھ چکیا اے کہ ایہناں لئی واپسی دا سفر مشکل اے۔ جے آن والے کجھ ورھیاں وچ بھارت وچ قتل و غارت دے وڈے وڈے واقعات رونما ہوئے تے یقینی طور اُتے کہیا جا سکدا اے کہ بھارتی میڈیا دا ایہناں دے پچھے بوہت وڈا ہتھ ہوئے گا تے جے بھارت دی ریاستاں مرکز توں علیحدگی دی کوششاں وچ ہتھیار چکن گیاں تے ایس دی وجہ وی ایہہ نام نہاد ٹی وی اینکر بنن گے جیہڑا صرف نفرت تے اگ لان لئی گھراں توں نکلے نیں۔ تماشا ویکھن لئی میدان تیار کردے نیں۔