ایم این اے سید عمران احمد شاہ ولی ،اک جھات قصبہ نورشاہ ول وی مارو

لکھت : سبطین اکبر بخاری

ایم این اے سید عمران احمد شاہ ولی اک جھات قصبہ نورشاہ ول وی مارو تسی پچھلے پندرہ سال توں مسلم لیگ ن دی جماعت توں بھاری وٹاں نال جت رہے جے ہر واری ساڈے قصبہ دی عوام نوں وڈے وڈے خاباں دی آس لا کے ووٹ لیندے او پر وٹاں لین بعدوں تسی کدی قصبہ نوشاہ دا گیڑا تک نہی لایا پر گیڑے دیتے بہت نیں وٹاں لین بعدوں تسی شاید اے بھل جاندے جے کے قصبہ نورشاہ دی عوام تہاڈے لئی سیاسی انتقام دا نشانہ تاں بندے ای رہندے نیں پر نال نال پنج سال تک طرح طرح دیاں اذیتاں تے تکلیفاں وی سہندے نیں پر تساں پندرہ سال توں مسلسل بے حسی تے لاپروائی دا مظاہرہ کردیا ھویاں قصبہ نورشاہ دی عوام ولوں انکھاں بند کیتی بیٹھے او ہن اے انکھاں کھولوں تے نورشاہ دی عوام نوں دسو کہ تسی اج تائی اہناں لئی کیتا کی اے اپنا کوئی اک وعدہ وی پورا کیتا جے تے دسو نورشاہ دی عوام نیں تہانوں عزت دیتی تہاڈے لئی دکھ جھلے سیاسی انتقام دا نشانہ بنے ایس آس تے کے تسی قصبہ نورشاہ تے اہندی عوام لئی کجھ کرو گے ایم این اے سید عمران شاہ ولی تسی کسے اک بندے لئی پنجی تریی ہزار دی آبادی نوں ایس طرح نظرانداز نہی کر کے اپنی سیاسی ساک کمزور کر رہے او نورشاہ دی عوام ہن تہاڈے کولوں منگ کردی اے بھئی ڈھیر سالاں توں قصبہ نورشاہ مسائل دا شکار اے سرکاری مرکز صحت تے بچیاں دے کالج نوں جاندی ھوی سڑک مریضاں تے طلبہ و طالبات لئی وبال جان بنی ھوی اے سیوریج سسٹم پچھلے کئی سالاں توں کم نہیں کردا قصبہ نورشاہ دے لوک عجیب غریب موذی مرضاں اچ گرے ھوئے نیں ۔
شام 5 بجے توں بعد قصبہ نورشاہ توں ساہیوال بنگلہ گوگیرہ گیمب اڈا تے براستہ بہادر شاہ توں فیصل آباد نوں جاون والیاں سُنسان سڑکاں اس گل دا منہ بولدا ثبوت نیں بھئی شام توں بعد ٹرانسپورٹ ناں ملن دی وجہ کیتے کسے وی ایمرجنسی دی صورت اچ قصبہ نورشاہ دی عوام تڑپ تڑپ کے اپدی جان دین تے مجبور تے بے وس ھوندے نیں سیوریج دا پانی قصبہ دے ہر اندرونی بیرونی راہواں دے نال نال گلیاں محلیاں تے بازاروں وچ کئی سالاں توں اپنا قبضہ جمائے بیٹھا اے جہدی وجہ کیتے مسجد وچ جاون آلے نمازی وی ہر ویلے مشکل اچ پئے رہندے نیں گندگی بدبو تے غلاظت نیں پورے قصبہ نوں اپدی لپیٹ اچ لے رکھیا اے تے جے کدی بارش آ جاوے تے گلیاں بازار تلاب دا منظر پیش کران لگ جاندے نیں کئی گلیاں محلیاں وچ بجلی دے کمبے تے تاراں زمین نوں سجدہ کران لئی تیار کھلوتے نیں جہدا کر کے کئی لوکاں دیاں جاناں خطرے وچ پیاں ھویاں نیں لوکاں دا نظام زندگی تے کاروبار بری طرح مفلوج ھو کے رہ گئے نیں سرکاری مرکز صحت وچ ساریاں سہولیات نہ ھوون کیتے لوک ھور وی ذہنی کوفت دا شکار ھو رہیے نیں واٹر سپلائی دے پانی دے نال سیوریج دا پانی وی لوکاں دے گھراں وچ جا رہا اے جسکر کے وڈی تعداد اچ لوک ہپپاٹائٹس تے جگر دی بیماریاں وچ تیزی نال مبتلا ھوی جاندے نیں شہریاں ، تاجراں ، تے سول سوسائٹی دے لوکاں نیں پندرہ سال توں اقتدار اچ رہن الے ایم این اے سید عمران احمد شاہ ولی تے وزیر اعلی پنجاب سردار عثمان بزدار نوں اپیل کیتی اے کہ ازخود نوٹس لیندیا ھویا ساڈے قصبے لئی چھتی توں چھتی اقدمات کیتے جاون تاں جے لوک سکھ نال رہ سکن قصبے والیاں دی آواز بنن تے مینوں تنقید دے نال نال انتقام دا وی نشان بنایا جاوے گا پر مریاں رگاں وچ ڈوڑ دا خون میرا شجرہ نسب تے میرے ادارے نے مینوں ہمیشہ بنا خوف و خطرہ حق سچ دی آواز بلند کران دی نصیحت کیتی اے تے آن والے وقت اچ وی میریاں انکھاں جو ویکھن گیئاں میں بنا ڈرے جھکے بیان کردا رھواں گا کیونکہ۔۔
بُھکھے ننگے ہاں پر غیرت وِکدی نہیں
نوٹاں مگر اَنا دی دولت وِکدی نہیں

لکھنے نہیں قصیدے کسے وی حاکم دے
میرے کولوں سخن دی عظمت وِکدی نہیں