عمران خان ہتھ جوڑ کے پی ڈی ایم توں این آر او منگ رہے نیں: مریم نواز

لہور( پنجابی میڈیا گروپ) مسلم لیگ (ن) دی نائب صدر مریم نواز دا کہنا اے ڈھائی ورھے تک این آر او نہ دین دی گلاں کرن والے عمران خان آپ ہتھ جوڑ کے پی ڈی ایم توں این آر او منگ رہے نیں، اللہ ایہ ویلا کسے نوں نہ وکھائے۔ لہور وچ ریلی دے نال روانگی توں پہلاں میڈیا نال گل کردیاں مسلم لیگ (ن) دی نائب صدر مریم نواز دا کہنا سی میں خود لہور دے شہریاں نوں دعوت دین نکلی آں کہ پی ڈی ایم دا ساتھ دیو، لہور دے شہریاں توں کہن جا رہی آں کہ فیسلے دا ویلا آ گیا اے ایس جابر، نااہل تے نالائق سرکار توں جان چھڈائی جائے۔ لیگی رہنما آکھیا پچھلے دیہاڑ ڈی جے بٹ دی گرفتاری توں واضح اے کہ عمران خان نے ہمیشہ اپنے ای لوکاں نال دغا کیتا اے، سانوں علم نہیں سی کہ تہاڈا مقابلہ پی ڈی ایم دی بجائے کرسیاں تے ٹینٹ والیاں نال اے، اسیں ڈی جے بٹ دی گرفتاری دی مذمت کرنے آں، ایس توں ظاہر اے کہ پی ڈی ایم کامیاب ہو گئی اے۔مریم نواز نے ہور دسیا اجے تک اسیں اپنے اراکین نوں استعفے دین دا نہیں آکھیا پر میرے کول استعفیاں دے ڈھیر لگے ہوئے نیں۔ مسلم لیگ (ن) نے ہمیشہ ایس دیس دی خدمت کیتی اے تے آئندہ وی کرے ۔