قومی پرچم ، ساڈی آزادی تے وقار دا نشان

لکھت:محمد آصف بھلی

پاکستان دے قومی پرچم دی منظوری 11۔ اگست 1947ء نوں پاکستان دی پہلی دستور ساز اسمبلی وچ دتی گئی سی۔ ایہہ قومی پرچم ساڈی آزادی تے قومی وقار دی علامت وی اے تے ضامن وی۔ ایہہ قومی پرچم جدوں پہلی وار دستور ساز اسمبلی وچ پاکستان دے پہلے وزیراعظم لیاقت علی خاں نے لہرایا تے ایہہ ایس امر دا اعلان سی کہ ہن پاکستان دے ست کروڑ عوام (1947ء وچ پاکستان دی آبادی) کسے غیر ملک دے غلام نہیں رہے۔ غلامی دی زنجیراں نوں توڑ کے اسیں آزادی دی منزل نوں حاصل کر چکے نیں۔ قومی پرچم پاکستان دی سلامتی تے دفاع دا استعارہ وی اے ایس قومی پرچم نوں بلند کر کے ای سانوں ایہہ افتخار حاصل ہویا کہ ہن اسیں وی دنیا دے آزاد ملکاں دی صف وچ شامل ہو گئے نیں۔ جتھے تیکر قومی پرچم دے احترام دا تعلق اے اسیں ایس دی حرمت تے عزت اُتے جان وی قربان کر سکنے آں کیوں جے ایہہ قومی پرچم ساڈی آزادی تے وقار دا نشان اے۔ قومی پرچم دے احترام لئی کسے تبلیغ یا تحریک دا آغاز کرن دی لوڑ نہیں۔ ہر محب وطن پاکستانی دا دل اپنے قومی پرچم دی محبت نال سرشار اے۔ جدوں مشرقی پاکستان وی پاکستان دا حصہ سی تے جدوں قائداعظم دا پاکستان دو حصیاں وچ تقسیم نہیں ہویا سی۔ ایس دور دا لکھیا ہویا شبنم رومانی دا ترانہ اج وی میرے کناں وچ گونج رہیا اے۔
ہم سب سچے پاکستانی، ملک ہمارا پاکستان
سندھی، حکمرانی، بنگالی، پنجابی، بلوچ، پٹھان
سبز ہلالی پرچم سب کے خوابوں کا گہوارہ ہے
ہم کو اپنا قومی پرچم اپنی جان سے پیارا ہے
علامہ اقبال دے ترانہ ملی دا اک شعر وی یاد آ گیا اے:
تیغوں کے سائے میں پل کر ہم جواں ہوئے ہیں
خنجر ہلال کا ہے قومی نشاں ہمارا
علامہ اقبال نے جس ہلال نوں ساڈا قومی نشان قرار دتا سی، اوہ ای ہلال ساڈے قومی پرچم دی زینت اے تے ایس پرچم اُتے جیہڑا تارہ اے ایس دے حوالے نال وی کسے شاعر نے کیہ خوب کہیا اے۔
یہ تارا تقدیر اُمم، تائید خدا، تصدق رسول ؐ
یہ تارا فاتح کی جبیں، اسلام کا دل تہذیب کا پھول
اپنا مرکز، اپنی طاقت، اپنی خودی یہ تارا ہے
ہم کو اپنا قومی پرچم اپنی جان سے پیارا ہے
تے فیر قومی پرچم دی عزت تے حرمت ایہناں سربکف مجاہداں تے صف شکن سپاہیاں توں پچھو جیہڑے پاکستان دی سرحداں اُتے اپنی جاناں دے کے پاکستان توں اپنی وفا نوں نبھاندے نیں تے ملک دی سرحداں اُتے لہراندا ہویا ساڈا قومی پرچم ای ایس امر دا مظہر ہوندا اے کہ ایتھوں ساڈے پاک وطن دی مقدس سرحداں دشروع ہوندیاں نیں۔ وطن عزیز دی سرحداں دے پاسبان تے نگبہان جدوں وطن دی عظمت اُتے قربان ہوندے نیں تے ایہناں خراج تحسین پیش کرن لئی شہدا دے تابوت اُتے قومی پرچم ودھانا ضروری سمجھیا جاندا اے۔ بریگیڈیئر صولت رضا کہندے نیں کہ شہید دے تابوت اُتے قومی پرچم ویکھ کے دوجیاں دے دل وچ وی اک عظیم مقصد یعنی دفاع پاکستان دی خاطر قربان ہون دی رغبت پیدا ہوندی اے۔
رنگ لائے گا شہیدوں کا لہو
کہ یہی سرخی ہے آزادی کے افسانے کی
یہ شفق رنگ لہو
جس کے ہر قطرے میں خورشید کئی
جس کی ہر بوند میں ایک صبح نئی
قومی پرچم دی عظمت دے حوالے نال ایہہ سطور اج مینوں خاص طور تے ایس لئی لکھن دی لوڑ پیش آ گئی اے کہ سیالکوٹ وچ Hoardings(لوہے دی بوہت وڈے سائز دی چادر جیہڑی اشتہار لان لئی استعمال ہوندی اے)پر قومی پرچم دی تصویر بنا دتی گئی اے مینوں اشتہاری تختاں اُتے قومی جھنڈے دی پینٹنگ ویکھ کے فطری طور اُتے بے پناہ خوشی ہوئی پر اگلے ای دن جدوں میں ہورڈنگ اُتے کسے ادارے ولوں برگر دا اشتہار ویکھیا جیہڑا قومی جھنڈے دی پینٹنگ دے اُتے ای چسپاں کر دتا گیا سی تے ذہن نوں بڑا دھچکا محسوس ہویا۔ ایسے طرح اک ہورڈنگ جس اُتے قومی جھنڈے دی تصویر سی ایہنوں ملبوسات دے اک اشتہار لئی کسے ماڈل یا اداکارہ دی تصویر نال کَج دتا گیا سی۔ ایس اُتے مینوں ہور تشویش ہوئی تے جدوں سیالکوٹ چھائونی وچ مینوں کجھ ہور ہورڈنگ نظر ٓئے کہ ایہناں اُتے قومی جھنڈے دی تصویر سی پر اوہ ہن کسے نہ کسے اشتہار دے تھلے لُک چکی سی تے مینوں ہور الجھن محسوس ہوئی کہ یا الٰہی ایہہ ماجرا کیتا اے جدوں تیکر ہورڈنگ خالی ہوئے ایس اُتے قومی جھنڈے دی تصویر ایسے اشتہار نال کَج دتا جاندا اے۔ پتا نہیں ایہہ تصور تے خیال کس دا اے کہ سارے ہورنڈنگز اُتے قومی جھنڈے دی تصویراں بنا دتیاں جان تے فیر ایس اُتے اشتہار چسپاں کر دتے جان ۔ کیہ ایہہ قومی جھنڈے دی تکریم ، توقیر تے عزت اے یا قومی جھنڈے دی توہین۔ قومی جھنڈے جیہڑا ساڈے غازیاں، مجاہداں تے شہیداں دی شجاعت دا عنوان اے تے جیہڑا ساڈے سینیاں اُتے سجیا ہوندا اے۔ایس قومی جھنڈے نوں پہلے ہورڈنگ اُتے کسے پینٹر توں بنوانا تے فیر قومی جھنڈے دی پینٹنگ نوں اک فضول ترین اشتہار نال لُک دینا افسوسناک بلکہ حد درجہ شرمناک فعل اے۔ ایس عمل دی جنہی وی مذمت کیتی جائے گھٹ اے۔ قومی جھنڈے دی عظمت تے تقدس نوں پامال کرن والا ایہہ عمل فوری طور روکیا جائے۔ جے میرا استدلال کسے دی سمجھ وچ نہ آیا ہوئے تے ایہنوں سدھا راہ وکھان لئی میں اک مثال دیواں گا کہ جے کس ہورڈنگ اُتے قائداعظم یا علامہ اقبال دی رنگاں توں تصویر بنائی گئی ہوئے تے ایس اُتے کوئی اشتہار چسپاں کرنا قائداعظم تے علامہ اقبال دی کنہی وڈی توہین ہوئے گی۔ ایہو معاملہ قومی جھنڈے دا اے۔ جیہڑا ہوڈنگ اُتے قومی جھنڈے دی مستقل پینٹنگ دا کیہ جواز اے۔ تھوڑی عقل دے ناخن لوئو تے بے وقوفی دا مظاہرہ نہ کرو تے قومی جھنڈے دا حترام سکھو ۔ ساڈے نکے وڈے شہراں دی ہر اہم سڑک تے چوک وچ قومی جھنڈے لہرائو پر جس ہورڈنگ اُتے قومی پرچم دی پینٹنگ ہوئے ایس اُتیاشتہار لانے عمل ہر گز مناسب نہیں۔ ایہہ قومی جھنڈے دی توہین اے۔