نوازشریف صاحب بس! بہت ہو چکیا، وفاقی وزیر داخلہ شیخ رشید دی وارننگ

اسلام آباد( پنجابی میڈیا گروپ) وفاقی وزیر داخلہ شیخ رشید دا کہنا اے نوازشریف نوں بطور وزیر داخلہ پیغام اے کہ بہت ہو گیا ہن ہور نہیں۔ اسلام آباد وچ میڈیا نال گل کردیاں شیخ رشید آکھیا پچھلے دیہاڑ پی ڈی ایم نے اپنی سیاست نوں دفن کیتا، لہور جلسے وچ مولانا فضل الرحمان دے مدرسے توں لوک نہ آندے تے ایہناں نوں مایوسی ہوندی، اپوزیشن نوں سوشل میڈیا دسے کہ جلسے وچ کنے لوک سن۔ وفاقی وزیر دا کہنا سی ایہ لوک ارباں روپے جلسیاں تے لا رہے نیں، ایہ لوک لٹی ہوئی رقم نوں بچان لئی سڑکاں تے نکل آئے نیں، استعفیٰ دین دی گل کردے نیں، اسیں پی ڈی ایم والیاں دیا ستعفیاں دے منتظر آں، لانگ مارچ کرنا اے کر لو، استعفے دینے نیں دے دیو، اسیں اوہ کراں گے جہدا آئین تے قنون اجازت دیندا اے۔ اوہ کہندے نیں کہ عمران خان نال گل نہیں ہووے گی تے دسو کہدے نال مذاکرات کرنا چاہندے او۔ شیخ رشید آکھیا وزیراعظم عمران خان 5سالہ مدت پوری کرن گے، وزیراعظم این آر او تے نیب دے سوا گل بات کرن لئی تیار نیں، اسیں ڈائیلاگ دے بوہے بند نہیں کرنا چاہندے، عمران خان آکھیا اے کہ سورج مشرق توں مغرب نکل سکدا اے، اوہ اپنی حکومت چھڈ دین گے پر این آر او نہیں دین گے۔