اِک رات دا قصہ

پروفیسر حکیم شفیق کھوکھر

اک حکیم دی ہدایت اُتے عمل کرنا کس قدر مہنگا پئے سکدا اے، اسیں اکثر ایس اُتے توجہ نہیں دیندے جدوں ساڈی پریشانی ودھدی اے تے فیر افسوس کرنے آں کہ کاش اسیں انج نہ کردے۔ ایہہ تے دنیا دی گل اے، اسیں ایس وڈے حکیم دی ہدایات نوں وی نظر انداز کر جانے آں جس نے سانوں ہر مشکل توں نکلن تے ہر پریشانی توں نجات ای نہیں، ایس دنیا دے بعد دی مستقل زندگی دی مشکلاں توں بچن دی تدبیراں وی دس دتیاں نیں۔ ساڈی بدقسمتی اے کہ اسیں کجھ ویلے ایہناں ہدایات نوں نظر انداز کرن نوں اپنی برتری تے کامیابی تصور کرنے آں۔
ایہو وجہ اے کہ موجودہ حالات وچ حکومت تے اپوزیشن ملک و قوم دی فلاح تے بقا نوں دا ء تے لا کے اپنی اپنی ڈفلی وجان وچ مصروف نیں۔ اک خبر دے مطابق جیہڑی اج توں کئی ورھے پہلاں مینوں امریکہ توں میرے اک شاگرد جرنلسٹ نے دتی سی تے انج دی ای اک خبر روزنامہ نوائے وقت راولپنڈی وچ شائع ہوئی سی کہ پاکستان وچ نسلی تے دوجی نوعیت دے فساد تے خانہ جنگی دی صورت حال پیدا کرن دی تیاری ہو رہی اے۔ ایہناں دناں ملک نوں جنہاں حالات دا ساہمنا اے اوہ گل ٹھیک لگدی ہوئی نظر آ رہی اے ہر کوئی من مانی وچ مصروف اے سیاست دان ہوئے یا سرکاری افسر، کسان ہوئے یا تاجر سب نوں اپنی پئی اے ملک نوں کنہاں خطریاں دا ساہمنا اے کسے نوں وی ایس دی پرواہ نہیں لگدی۔ دوجے لفظاں وچ سب نوں دنیا عزیز اے۔ آخرت دی کسے نوں فکر نہیں۔ کسے نوں علم نہیں کہ کدوں بلاوہ آ جائے۔ایہہ احساس پچھلی رات اچانک مینوں ایس ویلے ہویا جدوں رات دے پچھلے پہر اچانک میری طبیعت خراب ہوئی انج دی ہوئی کہ اللہ دی پناہ۔ ایس دی تفصیل قارئین دی نذر اے۔ شائد کسے دا بھلا ہو جائے۔ حکومت تے اپوزیشن کسے نکتہ اُتے متفق ہو جان تے ملک و قوم دا بھلا ہو جائے۔
ہویا انج کہ پچھلی رات نوں پروفیسر حکیم عمر توصیف دی دعوت وچ اسیں مچھلی کھاندے ہوئے پانی دا استعمال کر گئے تے اطباء دی ایس گل نوں نظر انداز کر گئے کہ مچھلی کھان دے نال یا بعد وچ پانی پین توں اجتناب کرنا چاہیدا اے کیوں جے مچھلی کھا کے پانی پی لیا ایس نے مچھلی نوں فیر زندہ کر لیا (یعنی مچھی کھا کے پانی پین نال معدے نوں ایس دے ہضم دے عمل وچ دشواری ہوندی اے) ایس گل نوں پروفیسر حکیم عمر توصیف تے حکیم کامران نے تے ملحوظ خاطر رکھیا پر میری اک مجبوری دی وجہ نال میرے توں وی ایہہ کوتاہی ہو گئی۔ ایس ویلے تے اسیں ہنسی خوشی گھر آ گئے پر رات نوں دو وجے، عجیب صورت حال دا ساہمنا کرنا پیا۔ اچانک میری اکھ کھلی تے میرا منہ کوڑے پانی دی قے نال بھر گیا۔جنہوں طب دی زبان وچ صفرا کہندے نیں۔ رات دے ہنیرے وچ مینوں انج محسوس ہویا کہ شاید صفرا دے نال خون وی اے ایس نے میری پریشانی وچ وادھا کر دتا ۔ ایس ویلے وچ گھر وچ کلا سی۔ خیال آیا کہ معالج نال رابطہ کراں۔ ڈاکٹر شعیب رندھاوا دا سوچیا تے خیال آیا اوہ میرے دوست تے ہین پر ایس ویلے آرام کر رہے ہون گے۔ طبیب عمر توصیف دا سوچیا تے خیال آیا کہ اوہ وی دس رہے سن کہ اج رات میں بوہت سارے لوکاں نال ملنا تے کل دی اہم میٹنگ دی تیاری وی کرنی اے۔ پتر اسلام آباد وچ سی۔ بیوی ہجے سوئی ای سی۔ فیر خیال آیا کہ 1122 نوں یا ایدھی نوں فون کراں، فیر خیال آیا کہ اینی رات گئے جدوں ایہہ گڈیاں ایتھے آن گیاں تے اہل محلہ پریشان ہون گے۔ ایسے اثناء وچ مینوں طبیب عمر تو صیف دا مشورہ یاد آیا کہ جے ایس طرح دی صورت حال درپیش ہوئے تے سونف دا عرق تے تازہ پانی پی لین۔ میں ایس اُتے عمل کرن دا ارادہ کیتا تے پانی پی کے بستر اُتے لیٹ کے کائنات دے سب توں وڈے حکیم نال رابطہ کرن دا فیصلہ کیتا پہلے سورۃ فاتحہ پڑھی فیر آیت الکرسی تے سورۃ اخلاص پڑھ کے ہتھاں اُتے دم کر کے سارے جسم اُتے پھیریا۔ ایس دے بعد سورۃ یٰسین ، سورۃ الرحمان سورۃ مزمل تے دوجیاں سورتاں دی تلاوت شروع کر دتی ایس دے نال ای میری طبیعت بحال ہونا شروع ہو گئی۔ ایسے دوران نماز فجر دا ویلا ہو گیا۔ نماز فجر ادا کر کے بستر اُتے لینا تے پرسکون نیند آ گئی ۔ گل پریشانی دی ایہہ سی کہ مینوں نہ صرف شوگر دا مرض لاحق اے بلکہ بلڈپریشر اے بلکہ ہارٹ دا مرض وی اے ایس دی وجہ توں میں کسے قسم دے حالات دا شکار ہو سکدا سی۔ پر اللہ تعالیٰ نال رجوع کرن دے بعد میری ہر پریشانی دور ہو گئی میں مطمئن ہو گیا۔
سوال ایہہ پیدا ہوندا اے کہ اسیں اپنی مشکلات دے حل لئی جدوں اللہ نال رجوع کرنے آں تے اوہ ساڈی عرض نوں نہ صف سن دا اے بلکہ ایہناں دے حل لئی آسانیاں وی پیدا کردا اے۔ اسیں ایس اُتے ایمان وی رکھنے آں تے مشکل وچ ایہنوں یاد وی کرنے آں۔ پر اسیں ایس توں دوری اختیار کر رکھی اے۔ من حیث القوم اپنے قومی معاملات وچ اپنی مشکلات وچ اللہ تعالیٰ نال رجوع کرن دی بجائے دوجی قوماں توں مدد دی توقعات لئے بیٹھے نیں۔ الیکشن وچ دھاندلی کردے نیں تے دوجیاں اُتے دھاندلی دے الزام وی لاندے نیں۔ قومی مسائل اُتے آپس وچ مل بہہ کے قومی مفاد وچ فیصلہ کرن دی بجائے ہنگامہ آرائی لڑائی جھگڑا مار کٹائی تے دشنام درازی دا راہ اختیار کردے نیں۔ ایس ویلے حکومت دے مطابق ای نہیں ڈاکٹراں دی رائے دے مطابق کروناء دا شدید حملہ ہو چکیا اے پر کوئی وی فریق اپنے موقف توں پچھے ہٹن نوں تیار نہیں۔ عوام دی پریشانی دن بدن ودھ رہی اے۔ لوک غربت دی نچلی سطح توں وی تھلے جا اپڑے نیں۔بھکاریاں دی تعداد وچ وادھا ہو رہیا اے۔ وڈی تعداد وچ لوک بے روزگاری دا شکار ہو رہے نیں۔
کیہ انج دا ممکن نہیں کہ ساڈی حکومت تے اپوزیشن وی ملک دے موجودہ حالات دی درستگی لئی تے اللہ دی رضا لئی مل بیٹھن تے علماء کرام دے نال اسلامی نظریاتی کونسل دے ارکان دے نال مل کے اک قابل عمل فارمولہ تیار کر لین۔ حکومت وی دانشمندی دا ثبوت دے تاں جے دشمناں دے مذموم ارادے مٹی وچ مل جان عوام نوں سکون ملے تے لوکاں نوں روزگار، جے انج نہ ہویا تے …