خالص شہد ! جسمانی امراض لئی قدرت دا اک تحفہ

تحریر : پروفیسر حکیم سید عمران فیاض

شہد قدرت دا اک انمول تحفہ اے۔ انسان اشرف المخلوقات اے۔ جدوں کسے بال دا جنم ایس دنیا وچ ہوندا اے تے جتھے ایس دے کن وچ اذان دی اواز گونجدی اے اوتھے اوتھے ایہنوں شہد دی انگلی وی چٹائی جاندی اے ۔ ایس دے علاوہ انسان دے روز مرہ دے معمولات وچ وی شہد نوں نمایاں مقام حاصل اے۔ جے تہاڈے گھر وچ کوئی بیمار ہو گیا اے تے ایہنوں شہد دا استعمال کروایا جاندا اے جے کسے نوں وی نزلہ زکام، کھانسی، ڈبہ، سینے دا کوئی وی مرض ہوئے ایس وچ شہد نوں خصوصی اہمیت حاصل اے۔ قدر ت دے پیدا کیتے ہوئے ایس شہد وچ جسمانی صحت لئی بیش بہا خزانہ لُکیا ہویا اے۔
شہد وچ قدرت نے مختلف اجزا نوں ایس خوبصورت نال ترتیب دتا اے کہ ایس دا بوہت ساری بیماریاں وچ استعمال افاقے دا باعث بن دا اے کیوں جے ایہہ انج دی انسانی خوراک اے جس دا کوئی سائیڈ ایفکٹ نہیں۔ شہد نوں انسان صدیاں توں اپنی خوراک تے دوائیاں وچ استعمال کر رہیا اے۔ شہد اپنے بوہت سارے فائدے دے نال بیشتر بیماریاں وچ فائدے مند ثابت ہوندا اے۔
جنہاں وچ کجھ اک مندرجہ ذیل اے:
شہد جسم توں وادھی پانی نوں گھٹ کردا اے تے خلیات وچ پانی جمع نہیں ہون دیندا جس دی وجہ نال جسم وچ سوجن نہیں ہوندی ۔ ایس وچ موجود وٹامن تے بیکٹریاں ختم کرن دا قدرتی نظام موجود اے جیہڑا جسم دے مدافعتی نظام نوں طاقت دیندا اے۔ ایس وچ موجود وٹامن سی قدرتی طور اُتے جسم وچ خون دے سفید خلیاں دی مقدار نوں ودھاندا اے۔
خام شہد وچ قدرتی طور اُتے 180 توں ودھ خصوصیات موجود ہوندی اے جیہڑی دنیا دے کسے وی کھانے وچ موجود نہیں۔ شہد نوں بخار دی روک تھام لئی وی استعمال کیتا جاندا اے۔ شہد زخماں نوں جلدی نارمل کرن لئی وی اکسیر دا درجہ رکھدی اے۔ شہد زخم اُتے لان نال ایہہ اک گلوکوز آکسیڈیز انزائم تعامل دا آغاز کردا اے جس پاروں جراثیماں دی افزائش رک جاندی اے ۔ ایہہ زخم والی تھاں توں نمی نوں مکمل طور اُتے جذب کر کے انفیکشن دے جراثیماں دا خاتمہ کر دیندا اے۔ نہار منہ گرم پانی تے نمبوں دے نال شہد دا استعمال وزن گھٹ کرن وچ فائدے مند اے۔
شہد جوڑاں دے درد وچ مبتلا مریضاں دے فاسد مادیاں تے یورک ایسیڈ نوں تحلیل کر کے نظام اخراج فضلات دے اعضاء دے ذریعے خارج کردا اے ۔ موجودہ دور وچ خالص شہد دا ملنا جوئے شیر لیان دے مترادف اے شاید تسیں اپنی اکھاں دے ساہمنے چھتے توں شہد اتارو یا کجھ تھاواں اُتے تہانوں خالص شہد دستیاب ہوئے گا۔ نہیں تے ملاوٹ زدہ، کیمکل والا تہانوں وافر مقدار وچ مختلف ناواں توں دستیاب ہوئے گا۔
ڈی جی پنجاب فوڈ اتھارٹی دے ذرائع نے دسیا کہ شہد بنان دی انڈسٹری وچ چینی دے شیرے ،تھوڑے جہے فارمی شہد تے مصنوعی رنگاں نوں پلانٹ وچ مکس کر کے بوتلاں وچ پیک کر دتا جاندا سی تے ناں دتا جاندا سی اصلی خالص شہد دا کیہ ہر شے جعلی اے، کیہ ہر شے وچ ملاوٹ اے، دودھ، مسالا جات، آٹا، کوڈ ذڈرنکس، آئس کریم، گھی، شوارمے، پیزا ، برگرز ، دوائیاں سنے کجھ ضروری شیواں وچ وڈی مقدار وچ ملاوٹ دا عنصر پایا جاندا اے جد کہ متعلقہ ادارے شاید صرف فرضی کاروائیاں وچ مصروف نیں پر ملاوٹ مافیا کجھ کرپٹ عناصر دی ملی بھگت نال بڑی دیدہ دلیری دے نام عوام نوں ناقص شیواں فراہم کر رہے نیں۔ پنجاب فوڈ اتھارٹی دے اہلکار وی خواب خرگوشی دے مزے لین لگے۔ ایہہ امر قابل ذکر اے کہ لوکاں نوں شہد دے ناں اُتے وی زہر کھوایا جان لگیا۔ اخباری خبراں دے مطابق کجھ عرصہ پہلاں لہور دے علاقے مناواں وچ پنجابی فوڈ اتھارٹی نے جعلی شہد پھڑیا، اوہ وی اک 2 یا 100 کلو نہیں بلکہ 30 ہزار کلو توں ودھ ۔
ایہہ شہد مکھیاں تیار نہیں کردیاں سن بلکہ پلانٹ وچ تیار ہو رہیا سی تے ایس وچ انتہائی مضر صحت مصنوعی رنگ پائے جا رہے سن جیہڑے کینسر تے دیگر موذی مرضاں دا سبب بن دے نیں۔
*- شہد خالص اے یا جعلی؟تسیں وی جان سکدے او۔
شہد بے شمار مرضاں دی دوا اے تے ایہہ بغیر کسے مضر اثرات دے بوہت ساری بیماریاں دا علاج کر سکدا اے۔ کئی سائنسی تحقیقاں وچ ایہہ گل ثابت ہو چکی اے کہ شہد ساری بیماریاں دے علاج وچ مفید ثابت ہوندا اے۔ پر سانوں دستیاب ہون والا ہر شہد خالص نہیں ہوندا۔ اج کل بازاراں وچ جعلی شہد دی فروخت عام اے کیوں جے عموماً اکثر بندے شہد دے اصل یا نقل ہون دی پہچان نہیں رکھدے۔ ایتھے اسیں تہانوں خالص شہد دی پہچان کرن دے کجھ طریقے دس رہے آں جنہاں اُتے عمل کر کے تسیں یقینا ً جعلی شہد خریدن توں بچن جائو گے۔
*- پانی وچ حل کرو۔
خالص شہد دی پہچان دا سب توں آسان طریقہ ایہنوں پانی وچ حل کر کے ویکھنا اے ۔ اک گلاس وچ پانی لے کے شہد نال بھریا چمچ ایس وچ پا دیو، جے شہد خالص ہویا تے ایہہ وچ حل نہیں ہوئے گا۔ جے خالص نہ ہویا تے حل ہو جائے گا یعنی ایس دا مطلب اے کہ ایہہ شہد گڑ نال بنایا گیا اے۔
*- اگ نال ساڑو
اک عددموم بتی لوئو تے ایس وچ موجود کاٹن دی بتی نوں شہد وچ بھگو کےاک وار جھٹک دیو، ہن ایہنوں لائٹر نال اگ لان دی کوشش کرو۔ جے ایہہ بتی اگ پھڑ لوے تے سمجھ جائو کہ شہد خالص اے۔
*- گاڑھا پن
خالص شہد عموماً گاڑھا ہوندا اے ایس نوں ویکھن لئی شہد نوں اک چمچے وچ بھرو تے ایہنوں کسے برتن وچ خالی کرن دی کوشش کرو۔ جے ایہہ ہولی ہولی چمچ توں تھلے ڈگے تے قوی امکان اے کہ ایہہ اصلی اے۔ جعلی شہد مائع دی صورت وچ تیزی نال چمچ توں وگن لگے گا۔
*- ڈبل روٹی اُتے لائو
شہد نوں ڈبل روٹی اُتے لائو، جے ڈبل روٹی سخت رہوے تے ایس دا مطلب اے کہ شہد خالص اے۔ جے ڈبل روٹی نرم ہو کے شہد وچ ڈبن لگے تے ایس دا مطلب اے کہ ایہہ شہد چینی نال بنایا گیا اے۔
*- فریج وچ رکھو
خالص شہد فریج وچ رکھن دی صورت وچ جم جاندا اے تے مزید گاڑھا ہو جاندا اے تاں جے ایہنوں فریج توں باہر رکھ کے معمول دے درجہ حرارت اُتے نہ لیایا جائے۔ نقلی شہد فریج وچ رہن دے باوجود جوں کا توں مائع حالت وچ برقرار رہندا اے۔
*- جذب کرن والا کاغذ
شہد دے کجھ قطرے جذب کرن والے کاغذ اُتے ٹپکا دیو جے ایہہ کاغذ قطریاں نوں جذب کر گیا تے ایس دا مطلب اے کہ ایہہ شہد خالص نہیں اے۔ خالص شہد کاغذ دی سطح اُتے موجود رہوے ، عوامی و سماجی حلقیاں تے انجمن تحفظ حقوق عوام پاکستان نے وزیراعظم پاکستان، وزیراعلیٰ پنجاب، ڈی جی پنجاب فوڈ اتھارٹی نال اپیل کیتی اے کہ اوہ ایہناں ملاوٹ مافیا دے خلاف سخت تو ں سخت اقدام کرو تے ایہناں ملاوٹ مافیا دی سرپرستی کرن والیاں نوں وی کیفر کردار تیکر اپڑائو تاں جے عوام ایہناں ملاوٹ والی شیواں دے استعمال توں بچ سکن تے خطرناک امرا ض توں وی محفوظ رہ سکن۔