پی ڈی ایم جماعتاں اک پیچ اتے نہیں سبھ دا اپنا اپنا پیچ اے، گورنر پنجاب
لہور(سٹی رپورٹر) گورنر پنجاب چوہدری محمد سرور نے آکھیا اے کہ مایوس پی ڈی ایم نوں ہن خود سمجھ نہیں آرہی اے اوہ کیہ کرن۔ پی ڈی ایم جماعتاں اک پیچ اتے نہیں سبھ دا اپنا اپنا پیچ اے۔لہور وچ وزریاعظم دے معاون خصوصی ندیم افضل چن نے گورنر پنجاب چودھری سرور دے نال ملاقات کیتی۔ جہدے وچ ملک دی موجودہ سیاسی صورتحال تے دیگرامور اتے وچار کیتا گیا۔ بعدازاں میڈیا دے نال گل بات کردیاں ہویاں گورنرپنجا ب چوہدری سرور نے آکھیا کہ اپوزیشن دی احتجاجی سیاست دا ایجنڈا انتشار تے فساد دے سوا کجھ نہیں، پی ڈی ایم دے جلسے کورونا پھیلاؤ مہم دا حصہ بن رہے نیں۔ پی ڈی ایم جماعتاں اک پیج اتے نہیں بلکہ سبھ دا اپنا اپنا پیج اے۔ سرکار اپنے اصولی موقف توں کسی صورت پچھے نہیں ہٹے گی۔ حکومتی آئینی مدت داآخری منٹ وی پورا کرکے ای جاوے گی۔ اپوزیشن دے اے توں زیڈ تیک سارے پلان نکام ہون گے۔
