سینیٹ انتخابات وقت توں پہلے کروانا حکومت دے وَس دی گل نہیں: اختر مینگل
سیہون: بلوچستان نیشنل پارٹی (مینگل) دے سربراہ اختر مینگل دا کہنا اے کہ سینیٹ انتخابات وقت توں پہلے کروانا حکومت دے وَس دی گل نہیں اے۔ سینیٹ انتخابات کرانا وزیراعظم نہیں الیکشن کمیشن آف پاکستان دی ذمہ داری اے۔
میڈیا نال گفتگو کردے ہوئے اختر مینگل دا کہنا سی کہ فنکشنل لیگ دے جنرل سیکرٹری محمد علی درانی نوں حکومت نے میاں شہباز شریف نال ملاقات کرن لئی بھیجیا سی۔ ایہ حکومتی مرضی ہوندی اے کہ جد کوئی قید وچ ہووے تے ایہناں دی مرضی ہوندی اے ملاقات کروائے یا نہیں۔
گل نوں جاری رکھدے ہوئے ایہناں دا کہنا سی کہ پی ڈی ایم دی صفاں وچ کوئی دڑاراں نہیں نیں تے نہ ہی کوئی اختلافات اے۔ مولانا فضل الرحمان دی کل دے جلسے وچ شرکت نہ کرن دی وجہ ایہناں دی مصروفیات ہو سکدیاں نیں۔
بی این پی مینگل دے سربراہ دا مزید کہنا سی کہ پی ڈی ایم جس انداز وچ فیصلے کر رہی اے تے مطلب اسی کامیاب ہو رہے آں۔ مینوں حکومت دا مستقبل تاریک لگ رہیا اے۔ سینیٹ انتخابات بارے فیصلہ پی ڈی ایم قیادت مل کر کرے گی۔ ساری جماعتاں دے ارکان صوبائی و قومی اسمبلی نے اپنے اپنے استعفے اپنی جماعتاں دے کول جمع کروائے نیں۔
اوہناں نے آکھیا کہ استعفیاں دے بعد پی ڈی ایم قیادت فیصلہ کرے گی کہ اوہ استعفے اسمبلیاں وچ کدوں جمع کروائے جائون۔ تحریک نوں ختم کرن لئی حکومت پہلے دن توں ہتھکنڈے استعمال کر رہی اے۔ سینیٹ انتخابات وقت توں پہلے کروانا حکومت دے وَس دی گل نہیں اے۔ سینیٹ انتخابات الیکشن کمیشن نے کرانے نیں نہ کے وزیراعظم نے۔





















