مریم نواز دی بلاول بھٹو تے آصفہ دے نال بے نظیر دے مزار تے حاضری
لاڑکانہ: مریم نوازشریف نے بلاول بھٹو تے آصفہ بھٹو زرداری دے نال بی بی بے نظیر دے مزار تے حاضری دتی۔ مریم اورنگزیب آکھیا ایہ اے پاکستان دی حقیقی جمہوریت دی اصل تصویر، پاکستان تے عوام دی خاطر محترمہ بے نظیر بھٹو شہید تے قائد نوازشریف نے اپنے فہم و فراست تے اخلاص نال جہڑی میثاق جمہوریت دی بنیاد رکھی سی، اوہ امانت اج بلاول تے مریم دی صورت آؤن والی نسلاں نوں منتقل ہو چکی اے۔مریم اورنگزیب دا کہنا سی مٹی چادر لے کے سون والے اج عملی طور تے موجود نہیں پر اوہناں دے شعور دی روشنی تیز ہو رہی اے، اوہناں دی قربانیاں نال نور جمہوریت پھیل رہیا اے، آئین تے جمہور دے قاتلاں دی پھیلائی ظلمت تے سیاہی مٹ رہی اے۔ ایس توں اَڈ بلاول ولوں مریم نوازشریف نوں خصوصی پروٹوکول دتا گیا۔ بلاول بھٹو زرداری ولوں مریم نوازشریف نوں اپنے باغاں دے امرود وی خاص طور تے تحفے وچ دتے گئے۔ بلاول ولوں مریم نوازشریف سنے دوجے پی ڈی ایم رہنماواں دی پرتپاک مہمان نوازی کیتی گئی۔
