وزیراعظم کرپشن تے سمجھوتہ نہیں کر سکدے، باقی ہر مسئلے تے گل ہو سکدی اے: صدر مملکت

اسلام آباد: صدر مملکت عارف علوی آکھیا اے وزیراعظم عمران خان کرپشن تے سمجھوتہ نہیں کر سکدے، باقی ہر مسئلے تے گل ہو سکدی اے۔ ایوان صدر وچ معذور بندیاں دے حوالے نال میڈیا ورکشاپ دا انعقاد کیتا گیا جہدے وچ سپیکر قومی اسمبلی اسد قیصر، وفاقی وزیر اطلاعات شبلی فراز تے ڈبلیو ایچ او کنسلٹنٹ وی موجود سن۔ایس موقع تے صدر مملکت نے صحافیاں نال غیر رسمی گل کردیاں آکھیا بلوچستان وچ ات گردی وچ 99فیصد بھارت دا ہتھ اے تے عدم استحکام وچ بیرونی عناصر ملوث نیں۔ عارف علوی آکھیا وزیراعظم توں استعفے دے مطالبے دی کوئی وجہ نہیں بن دی، ایہ کیویں ہو سکدا اے حزب اختلاف مطالبہ کرے تے سوچے صبح اُٹھاں گے تے وزیراعظم مستعفی ہو جان گے، ساڈے 125دن دے دھرنے وچ چار حلقے کھولن دا مطالبہ سی، دھرنے دے ویلے عمران خان دی آرمی چیف نال ملاقات اوس ویلے سرکار دا مطالبہ سی، اوس ویلے دی سرکار نے اسٹیبلشمنٹ توں مطالبہ کیتا سی کہ عمران خان نال گل کرے۔ امپائر دی انگلی کیہ سی؟ صدر مملکت نے ایس سوال نوں قہقہہ لا کے گول کر دتا۔ اوہناں آکھیا قومی ڈائیلاگ لئی بہرحال سپیکر قومی اسمبلی ای کوئی راہ کڈھن گے۔