مخالفاں دا مشن احتساب نوں ‘بریک’ لگوان دے سوا کجھ نہیں: گورنر پنجاب چودھری سرور

لہور: گورنر پنجاب چودھری سرور نے آکھیا اے مخالفاں دا مشن احتساب نوں ‘بریک’ لگوان دے سوا کجھ نہیں، آئینی مدت پوری کرنا تحریک انصاف دی حکومت دا آئینی تے جمہوری حق اے۔ گورنر پنجاب نال صوائی وزیر جنگلات سبطین خان نے ملاقات کیتی اے۔ ایس موقع تے چودھری سرور دا کہنا سی سرکار آئینی مدت توں اک دن وی پہلاں کدھرے جان والی نہیں، سیاسی مخالفاں دا سینیٹ انتخابات وچ رکاوٹاں دا منصوبہ وی نکام ای ہووے گا، وزیراعظم عمران خان دا کوئی ذاتی یا سیاسی ایجنڈا نہیں اوہ عوام دے نال نیں، عمران خان اصولی سیاست توں اک انچ وی پچھے نہیں ہٹن گے۔ چودھری سرور نے ہور آکھیا کوئی شک نہیں پاکستان وچ امن تے استحکام بھارت توں ہضم نہیں ہو رہیا، یو این او بھارت ولوں ات گرداں نوں سپورٹ کرن دا نوٹس لوے، دہشت گردی دے ناسور دے خلاف 22کروڑ پاکستانی مکمل طور تے متحد نیں۔