پنکی توں شہید جمہوریت تیکر داسفر، بے نظیر بھٹو

تاریخ وچ دنیا دی سب توں گھٹ عمر تے عالم اسلام دی پہلی خاتون وزیراعظم

لكت:اختر سردارچودهری

محترمہ بے نظیر بھٹو 21 جون، 1953 نوں کراچی وچ مشہور سیاسی بھٹو خاندان وچ پیدا ہوئیاں۔ بچپن وچ پنگی دے ناں توں سدیا جاندا سی۔ والد دا ناں ذوالفقار علی بھٹو، والدہ نصرت بھٹو سی۔ بے نظیر بھٹو نے ابتدائی تعلیم لیڈی جیننگز نرسری اسکول تے کونونٹ آف جیسز اینڈ میری کراچی دے علاوہ دو سال راولپنڈی پریزنٹیشن نوں نونٹ وچ حاصل کیتی۔ 15 ورھے دی عمر وچ او لیول دا امتحان پاس کیتا۔ ایس دے بعد ہارورڈ یونیورسٹی توں 1973ء وچ پولیٹیکل سائنس وچ گریجویشن کیتا۔ آکسفورڈ یونیورسٹی وچ داخلہ لیا جتھے اوہناں نے فلسفہ، معاشیات تے سیاسیات وچ ایم اے کیتا۔ بے نظیر بھٹو برطانیہ توں تعلیم حاصل کرن دے بعد جون 1977 وچ وطن واپس آئیاں۔
ایہناں دناں بے نظیر بھٹو دے والد ذوالفقار علی بھٹو ملک دے وزیراعظم سن۔ وطن واپس آن دے دو ہفتے بعد ای ایہناں دے والد دی حکومت دا تختہ الٹ دتا گیا تے جنرل ضیاء الحق نے ملک وچ مارشل لاء لا دتا تے نال ای بینظیر بھٹو نوں وی گھر دے اندر نظر بند کر دتا گیا۔ ایہناں دے والد ذوالفقار علی بھٹو نوں 4 اپریل 1979ء نوں پھانسی دتی گئی جیل دے ریکارڈ وچ بھٹو دی آخری ملاقات محترمہ بے نظیر درج اے۔ ذوالفقار بھٹو دا کہنا سی کہ ایہناں نوں اپنی دھی نال بے پناہ محبت سی۔.

بھٹو نال آخری ملاقات محترمہ بینظیر بھٹو تے نصرت بھٹو دی 3اپریل 1979 نوں ہوئی تے دوجے دن 4 اپریل 1979ء نوں قائداعظم عوام نوں پھانسی دی سزا سنا دتی گئی۔ بھٹو دی عوام وچ بے پناہ مقبولیت دی وجہ نال ایہناں نوں قائد عوام کہیا جاندا سی۔ بھٹو دی ای مقبولیت پاروں بے نظیر بھٹو دو وار ملک دی وزیراعظم بنی تے اک وار ایہناں دے شوہر آصف علی زرداری وی پنج ورہے حکومت کو چکے نیں۔
اج وی بلاول زرداری بھٹو اپنے نانا دی عوام دے دلاں وچ جیہڑی بے پناہ عقیدت اے۔ ایس دے بل بوتے اُتے سیاست دے میدان وچ اترے نیں تے وزیراعظم بننا چاہندے نیں، والد ذوالفقار علی بھٹو دی پھانسی دے بعد بینظیر بھٹو ملک توں باہر چلی گئیاں سن، یعنی خود ساختہ جلاوطنی اختیار کر لئی سی۔
بینظیر بھٹو دی پاکستان وچ سیاست دا آغاز ایس ویلے ہویا جدوں 1986 وچ جلاوطنی دے بعد وطن واپسی اُتے ایہناں دا شاندار استقبال ہویا۔ عوام بے نظیر بھٹو دے روپ وچ ذوالفقار علی بھٹو نوں ویکھ رہے سن۔ 18 دسمبر 1987ء بے نظیر بھٹو دی آصف علی زرداری نال شادی ہوئی۔ ہولی ہولی بے نظیر ملک دی مقبول ترین لیڈر دے طور اُتے پاکستان دی سیاست وچ ابھریاں تے اگست 1988 وچ پیپلز پارٹی نے عام انتخابات وچ اکثریت حاصل کر لئی۔

2 دسمبر 1988 نوں محترمہ بے نظیر بھٹو نے تاریخ دی سب توں گھٹ عمر تے عالم اسلام دی پہلی خاتون وزیراعظم دی حیثیت نال حلف چکیا۔ ایس دے 20 مہینے بعد 6 اگست 1990 صدر غلام اسحٰق خان نے بے نظیر بھٹو دی منتخب حکومت نوں بدعنوانی دے الزام وچ اپنے خصوصی اختیارات نوں استعمال کردے ہوئے برطرف کر دتا۔
10 اکتوبر 1990ء آصف علی زرداری نوں گرفتار کر لیا گیا۔ اکتوبر 1993 وچ پیپلز پارٹی دوبارہ انتخابات وچ کامیاب ہوئی۔ بے نظیر دوبارہ وزیراعظم منتخب ہوئیاں۔ 1996 تیکر وزارت عظمیٰ دے عہدے اُتے قائم رہیاں۔ 1996 کرپشن دے الزامات اُتے بے نظیر بھٹو دی حکومت دوبارہ برطرف کر دتی گئی۔ 1997 دے الیکشن دے بعد ایہناں نوں اپنے بالاں دے نال جلاوطنی اختیار کرنی پئی۔ ایسے دوران اوہناں نے لندن تے دبئی وچ رہندے ہوئے سیاسی سرگرمیاں جاری رکھیاں۔ ایسے دوران بے نظیر ، نواز شریف تے دیگر پارٹیاں دے سربراہان نے مل کے لندن وچ اے آر ڈی دی بنیاد پائی تے ملک وچ جنرل پرویز مشرف دی حکموت دے خلاف بھرپور مزاحمت دا اعلان کیتا۔
14 مئی 2006 وچ لندن وچ نواز شریف تے بے نظیر دے وچکار میثاق جمہوریت اُتے دستخط کر کے جمہوریت نوں بحال کرن تے اک دوجے دے خلاف استعمال نہ ہون دا فیصلہ کیتا۔ اکتوبر 2007 وچ بینظیر نے امریکی امداد توں پرویز مشرف دی حکومت توں ساز باز دے نتیجے وچ اپنے خلاف مالی بدعنوانی دے سارے مقدمے ختم کروان وچ کامیاب ہو گئی۔ 18 اکتوبر 2007 نوں وطن واپسی اُتے اک وار فیر ایہناں دا شاندار استقبال ہویا۔
ملک واپس اپڑے دے کجھ ای گھنٹیاں بعد کراچی ایئر پورٹ توں بلاول ہائوس جاندے ہوئے بی بی بے نظیر بھٹو دے استقبال لئی آن وال ریلی وچ بم دھماکے دی وجہ نال درجناں بندے ہلاک تے سینکڑے زخمی ہوئے ایس دے اک مہینے نو دن بعد 27 دسمبر 2007 نوں جدوں بینظیر لیاقت باغ وچ عوامی جلسے نال خطاب کرن دے بعد اپنی گڈی وچ بہہ کے اسلام آباد آ رہیاں سن کہ لیاقت باغ دے مرکزی دروازے اُتے جدوں اوہ پارٹی کارکناں دے نال اظہار یکجہتی لئی گڈی دی چھت توں باہر نکل رہیاں سن کہ نامعلوم بندے نے ایہناں اُتے فائرنگ کر دتی۔
ایس توں بعد بے نظیر دی گڈی توں کجھ فاصلے اُتے اک زور دار دھماکا ہویا جس وچ اک خود کش حملہ آور جس نے دھماکہ خیز مواد نال بھری ہوئی بیلٹ پا رکھی سی اپنے آپ نوں دھماکے نال اڑا دتا۔ ایس دھماکے وچ بینظیر بھٹو جس گڈی وچ سوار سن، ایس نوں وی شدید نقصان اپڑیا۔ ڈرائیور ایسے حالت وچ گڈی نوں نسا کے راولپنڈی جنرل ہسپتال لے گیا، جتھے اوہ زخماں دی تاب نہ لاندے ہوئے اپنے خالق حقیقی نال جا ملیاں۔
بے نظیر بھٹو دے قتل دا مقام راولپنڈی دا اوہ ای بدنصیب کمپنی باغ اے، جتھے پاکستان دے پہلے وزیراعظم لیاقت علی خان نوں سید اکبر نامی اک بندے نے ہلاک کیتا سی۔ ایہہ کمپنی باغ بعد وچ مقتول وزیر اعظم دے ناں اُتے لیاقت باغ قرار دے دتا گیا سی۔
جدوں 2007 وچ محترمہ بے نظیر بھٹو نوں شہید کر دتا گیا تے ایس ویلے ایہناں دی عمر کم و بیش 54 سی۔ اج تیکر ایہناں دے قاتلاں دا کجھ پتہ نہیں چل سکیا، اج تیکر ایس تکلیف دہ سوال دا جواب کسے دے کول نہیں کہ محترمہ بینظیر بھٹو نوں کس شقی القب بندے دے کہن اُتے قتل کیتا گیا کیوں جے دہشت گرداں دا کوئی دین، مذہب یا سیاسی جماعت نہیں ہوندی۔ اوہ کسے نظریئے دے پروکار نہیں ہوندے بلکہ ایہناں نوں روپئے پیسے دے عوض خریدیا تے ویچیا جا سکدا اے۔
دوجے پاسے شہادت توں قطعِ نظر محترمہ بے نظیر بھٹو بے شمار اعزازات نال نوازی گئیاں، ایہناں نوں ملکی و بین الاقوامی سطح اُتے آپ ایہناں دے کردار، شخصیت، قابلیت تے صلاحیتاں دی بنیاد اُتے بے حد سراہیا گیا جد کہ والد شہید ذوالفقار علی بھٹو ولوں ملن والی سیاسی نیک نامی نے ایہناں نوں ملک دی پہلی خاتون وزیراعظم بنن وچ کسے نہ کسے حد تیکر مدد وی کیتی۔ تاریخ وچ دنیا دی سب توں گھٹ عمر تے عالم اسلام دی پہلی خاتون وزیراعظم منتخب ہون دا اعزاز وی ایہناں نوں حاصل رہیا۔
دختر مشرق، شہید، جمہوریت محترمہ بے نظیر بھٹو نوں اپنی قوم توں جدا ہوئے 13 ورھے لنگھ گئے نیں۔ راولپنڈی دے تاریخی جلسہ لیاقت باغ وچ محترمہ بے نظیر بھٹو نے کہیا سی ’’تہاڈا تے میرا ملک خطرے وچ اے، سوہنی دھرتی مینوں سد رہی اے، پاکستان لئی میرے والد نوں شہید کر دتا گیا، میرے دو جوان بھرا مار دتے گئے ، شوہر نوں لمبے عرصے تیکر جیل وچ رکھیا گیا، میری ماں نوں سڑکاں اُتے لاٹھیاں ماریاں گئیاں، مینوں جیل وچ رکھیا گیا، پر اسیں موت توں نہیں ڈردے۔‘‘
بے نظیر بھٹو دی وصیت دے مطابق پیپلز پارٹی دی قیادت ایہناں دے پتر بلاول زرداری بھٹو نوں وراثت وچ حوالے کر دتی گئی پر سابق صدر آصف زرداری پارٹی دے نگران چیئر مین بنے تے مفاہمت دی سیاست نوں فروغ دتا۔ ایسے پالیسی اُتے کاربند رہندے ہوئے پنج سال ملک دے صدر رہے۔ اج کل بے نظیر بھٹو دا پتر بلاول زرداری بھٹو سیاست وچ اپنے نانا دی پارٹی دی نس بھج سنبھالے ہوئے اے، جد کہ حال ای وچ بے نظیر بھٹو دی سب تو ں نکی دھی آصفہ نے وی سیاسی میدان وچ پیر رکھ لیا اے۔
27دسمبر نوں شہید محترمہ بینظیر بھٹو دی 13 ویں برسی منائی گئی۔ ملک بھر دی پسی ہوئی عوام، خواتین، مزدور تے اوہ سارے انسان جنہاں نوں شہید محترمہ بینظیر بھٹو دے دور اقتدار توں کسے نہ کسے صورت وچ فائدہ اپڑیا سی، ایہناں نوں یاد کر کے ایہناں دی روح دے ایصال ثواب لئی دعاوا ں کیتیاں۔