کیہ سینٹ دے الیکشن غریب نوں مہنگائی توں بچان دی ضمانت نیں؟
لكهت:سید صفدر رضا
11مارچ 2021نوں فارغ ہون والے 52 سینٹرز دی تھاں نویں منتخب ہون والے سینٹرز دا انتخاب پہلے کران دے حکومتی ارادے اُتے اپوزیشن دا شور سمجھ توں بالا تر ایس لئی اے کہ جے الیکشن کمیشن 11 فروری توں پہلاں الیکشن کروائے تے آئین توں روگردانی اے جے آئین دی رو نال ویکھیا جائے تے 11 مارچ نوں 52 سینٹرز دی فراغت دے بعد نویں سینٹرز دا آنا ضروری اے تے آئین دی رو نال سینٹ دے انتخابات اک مہینے پہلے 11 فروری 2021دے بعد کسےوی ویلے کروائے جا سکدے نیں ہاں پر شو آف ہینڈ دی شک اُتے تحفظات ایس لئی نیں کہ آئین وچ جدوں تیکر تبدیلی نہ کیتی جائے انج ممکن ایس لئی نہیں کہ سینٹ دے رکن منتخب کرن لئی ترجیحات دی بنیاد اُتے ووٹ پایا جاندا اے۔ پہلی، دوجی، تیجی، چوتھی ترجیح اُتے ووٹ پائے جاندے نیں تے شو آف ہینڈ وچ انج ممکن نہیں سپریم کورٹ وی آئین دی تشریح کر سکدا اے آئین وچ تبدیلی کرن دی مجاز قانون ساز اسمبلی اے حکومت جے انج دا اعلان نہ وی کردی تے ویلے اُتے انتخابات الیکٹورل کالج دے ہوندے ہوئے انتخابات کروائے جا سکدے نیں رہی گل اپوزیشن دی کہ استعفےٰ نہ دیوے تے جناب وزیراعظم ویکھنا اے کہ کون ٹاس جتدا اے کھیڈا ایس دی مرضی اُتے پئے گا۔ وکٹ تیار کرنا حکومتی اختیار اے پر میچ توں پہلاں ٹاس دا ہونا ضروری اے فیر پتہ چلے گا کون کنہوں کھیڈاندا اے۔ سینٹ دی ادھی تعداد یعنی 52 سینٹرز دا انتخاب ہر تن ورہے بعد ہوندے نیں۔ ہن جنہاں 52 سینٹرز دی ریٹائرڈ ہون دی مدت پوری ہون جا رہی اے۔ ایہناں وچ 11 سینٹرز پنجاب 11سندھ تے 12-12 سینٹرز خیبر پختونخوا تے بلوچستان فاٹو توں 4 تے اسلام آباد تو ں 2 سینٹرز فارغ ہون گے جد کہ ن لیگ دے 17 سینٹرز ریٹائرڈ ہون گے پاکستان پیپلز پارٹی دے 7 سینٹرز تحریک انصاف دے 7 ایم کیو ایم دے 4 سینیٹرز فاٹا دے 4 بلوچستان عوامی پارٹی دے 3 نیشنل پارٹی دے 2 پختونخوا ملی عوامی پارٹی دے 2 جمعیت علماء اسلام دے 2 بی این پی مینگل دا 1 عوامی نیشنل پارٹی دا 1 جماعت اسلامی دا 1 بلوچستان توں 1آزاد سینٹر ریٹائر ہون گے۔ حکومت جس طرح سینٹ دے انتخابات دی جلدی تے ویلے توں پہلے پر آئینی حدود وچ کروانا چاہ رہی اے کاش ایہہ عمل بلدیاتی انتخابات لئی کیتا جاندا تے بہتر ہوندا نچلی سطح اُتے انتخابات کیوں نہیں کروائے گئے تاں جے عوامی رائے ابھر دے ساہمنے آندی۔ عوامی مسائل عوامی سطح اُتے حل ہوندے۔ بلدیاتی اداریاں دا عوامی سطح اُتے ہون دی وجہ نال براہ راست عوام نال تعلق اے جد کہ سینٹ دا براہ راست تعلق حکومت نال اے جس دا فائدہ حکومت نوں ہوندا نظر آ رہیا اے۔اپوزیشن دے دھرنے تے لونگ مارچ دے اعلان اُتے ہن وزیراعظم نے فرمایا اے کہ اپوزیشن ست دن دھرنا دے لین فیر استعفے دے بارے وچ سوچاں گے تہاڈا کیہ اے جناب محترم یوٹرن لے لین گے تہاڈی گل اُتے کنج یقین کر لیا جائے۔ ہن پیپلز پارٹی دے ضمنی الیکشن وچ حصہ لین لئی ایس وجہ نال جا رہی اے کہ اوہ ضیا دور وچ 85ء دے الیکشن دا بائیکاٹ کر کے اج تیکر نتیجے بھگت رہی اے ایس لئی سسٹم وچ شامل رہن لئی راضی اے کہ میدان خالی نہیں چھڈنا چاہندی تے حکومت جان دی اے کہ سندھ دی سیٹاں دا فائدہ پیپلز پارٹی نوں ہوئے گا۔
ڈھائی ورھے دی حکومت دے بعد وی پی ٹی آئی بوہت یوٹرن لے کے وعدیاں توں منحرف ہوئی۔ حکومت نے LPG لین لئی بھرپور غفلت دا مظاہرہ کردے ہوئے غریباں اُتے 122 ارباں دا وادھا بوجھ پا دتا گیا تنخواہ ودھائی نہیں مہنگائی اسمان نال گلاں کر رہی اے۔ چینی 52 روپئے کلو توں ودھا کے 110 اُتے فروخت ہوئی ۔ عوام ایہہ قیمت ادا کردی رہی ہن 85 روپئے اُتے لیا کے کریڈٹ لے رہی اے۔ اصل قیمت اُتے واپس نہیں آئی۔ ہن وی 52 روپئے فی کلو توں بوہت زیادہ اے۔ تسیں پٹرول دا نوٹس لے کے 75 روپئے لیٹر پٹرول کیتا پر عوام نوں پٹرول نہ لیا آپ نے 100 توں ودھ پٹرول کیتا ملنا شروع ہو گیا کیہ ہن تیکر چینی مافیا پٹرول مافیا وچ کسے نوں سزا ملی عوام تے سزا ہن تیکر بھگت رہی اے۔ BRT دا نیب نے کیہ کیتا بلین ٹری منصوبے دا مالم جبہ کیس پٹرول رپورٹ دا کیہ بنیا سارے معاملات دا حکومت نے کیہ کیتا ہن انڈے مرغی انتہائی مہنگے نیں کون کنٹرول کرے گا ایہنوں۔ کجھ سیاسی مخالفین نوں ساہمنے رکھ کے 22 کروڑ عوام نوں مہنگائی دی چکی وچ نہ پیسو عوام نوں سینٹ دے انتخابات توں کجھ لینا دینا نہیں۔ ایہنوں تے بس روٹی روزی دی فکر اے کیوں جے ایہناں دے کول بھک نچ رہی اے۔ بے روزگاری خود کشیاں اُتے مجبور کر رہی اے۔ ایہناں دا خیال کرو حکومتی رٹ مہنگائی کنٹرول کرن وچ ناکام اے۔
خدارا دشمنی اپنی جاری رکھو تسیں جانو تے تہاڈے دشمن جانن پر غریب عوام دا سوچو ایس دی بھلائی دا سوچو۔ سینٹ دے الیکشن جلدی کروائو یا دیر نال پر مافیا توں عوام نوں بچائو۔ ہن مافیا دے مقابلے وچ کمزور وکھائی دے رہے او تاں ای تے عوام نوں سزا مل رہی اے۔ مافیا آزاد پھر رہیا اے ایہناں اُتے اج تیکر ہتھ کیو ں نہیں پایا گیا رپورٹس وی تہاڈی حکومت نے تحقیقات کر کے بنائی اے کمیشن رپورٹس آن دے باوجود سزا جزا دا عمل کیوں نہیں ہو رہیا۔
