پیپلز پارٹی وچ فیصلے دا اختیار صرف آصف زرداری دے کول اے، شاہ محمود قریشی

اسلام آباد(بیورو رپورٹ) وزیرخارجہ شاہ محمود قریشی آکھیا اے کہ واضح ہوچکیا پیپلزپارٹی پی ڈی ایم دے بیانیے توں پچھے ہٹ چکی اے۔ پیپلز پارٹی وچ فیصلے دا اختیار صرف آصف زرداری دے کول اے،بلاول بھٹو زرداری دے ہتھ وچ کجھ نہیں۔ پیپلز پارٹی نے سینیٹ الیکشن لڑن دا فیصلہ کیتا تے ضمنی انتخابات وچ وی حصہ لوے گی۔ ہن استعفیاں دی رٹ چھڈ دین تے قوم دے نال مذاق نہ کرنے۔ وفاقی وزیر خارجہ شاہ محمود قریشی ہوراں نے اپنے اک بیان وچ آکھیا سی کہ 31جنوری تیک وزیراعظم توں مستعفی ہون دا مطالبہ کیتا جارہیا اے اج آکھ رہیا واں کے وزیراعظم عمران خان ایہناں دے آکھن اتے کدی استعفیٰ نہیں دین گے۔

عمران خان ملک دے منتخب وزیراعظم نیں ایہناں عوام دا مینڈیٹ تے اعتماد حاصل اے۔ اصل حقیقت ایہہ اے کہ پیپلزپارٹی کدی سندھ سرکار دی قربانی نہیں دیوے گی۔ استعفے توں متعلق ایہہ لوکائی سنجیدہ ہوندے تے ضمنی انتخابات وچ حصہ لین دی خواہش دا اظہار نہ کردے۔پی ڈی ایم وچ مختلف الخیال لوکائی این آراو مقدمات توں خلاصی لئی اک جگہ جمع نیں۔