2021وچ سرکار توں جان چھٹ جائے گی ُ: مریم اورنگزیب

اسلام آباد (پنجابی میڈیا گروپ) پاکستان مسلم لیگ (ن) دی ترجمان مریم اورنگزیب نے آکھیا اے کہ سال 2021ء ’’ووٹ چور سرکار کولوں نجات دا سال‘‘اے ، اپنے اک بیان وچ اوہناں نے آکھیا اے کہ 2018 وچ ’’تباہی دا سونامی‘‘ لے آیاگیا، 2021 ء ایہدی ’’تباہی‘‘ داسال اے ۔ اوہناں نے آکھیا اے کہ 2020 ء دا سال عوام دا آٹا، چینی ، بجلی ، گیس ،دوائی چوری دا سا ل سی۔ اوہناں نے آکھیا اے کہ عمران صاحب دا 2020ء وچ عوام نوں نوکریاں تے ریلیف دین دا وعدہ وی جھوٹھا نکلیا۔ مریم اورنگزیب نے آکھیا اے کہ عمران صاحب دا تبدیلی دا سال بدترین تباہی ، بربادی، مہنگائی ، بدامنی، بدخبری تے بدحالی دا سال ثابت ہویا ۔ اوہناں نے مزیدآکھیا اے کہ وزیراعظم عمران صاحب تساں 2020 نوںخوشیاں دا سال آکھیا سی۔ ایہہ تے قوم لئی غم ،فکر تے ماتم دا سال ثابت ہویا۔ 2020 دا سال عمران صاحب لئی نفع مند نکلیا۔ غیرقانونی گھر ریگولرائز، زمان پارک دا گھر دوبارہ تعمیر کرالیا ۔ 2020 ء وچ عوام دا آٹا، چینی، بجلی، گیس، دوائی، ایل این جی سبھ لٹ لیاگیا۔مریم اورنگزیب نے مزیدآکھیااے کہ 2020پاکستان دی شہہ رگ کشمیرلئی ناقابل تلافی نقصان داباعث رہیا، نااہل، نالائق تے کرپٹ جعلی سرکار کجھ نہ کرسکی۔ اوہناں نے مزیدآکھیا اے کہ یقین اے پہلی سہ ماہی دے بعد نہ کرونا روے گانہ ووٹ، آٹا، چینی، چور انشااللہ آٹا، چینی چور مافیا دی روانگی دی روشن صبح ہون والی اے۔