بلاول، مریم۔۔۔۔بھین بھرا

تحریر: اکرم عامر سرگودھا

ملکی سیاست وچ خوب ہنگامہ برپا اے، اپوزیشن دے احتجاج، لانگ مارچ دے اعلان نے حکومت تے حکمراناں دی بے چینی ودھا دتی اے، حکومت وی اپوزیشن نوں رگڑن دا کوئی موقع ہتھ توں جان نہیں دیندی سو ایس طرح حکومت تے اپوزیشن اک دوجے اُتے خوب لفظی گولا باری کیتے ہوئے اے۔ اپوزیشن پی ٹی آئی دی حکومت نوں سلیکٹڈ تے دھاندلی دی پیداوار قرار دے رہی اے تے حکومت اپوزیشن دے اکثر سیاستداناں اُتے قومی دولت لٹن، منی لانڈرنگ تے بیرون ملک اثاثے بنان جہے سنگین الزامات لا کے مقدمات دا اندراج تے ریفرنس دائر کرن وچ لگی اے، کپتان نے مریم تے بلاول نوں سیاست وچ ’’بچہ ‘‘ یعنی طفل مکتب قرار دتا اے، تے کہیا کہ سیاست ایہناں دے بس دی گل نہیں۔ اپوزیشن پی ٹی آئی دی حکومت نوں حادثاتی قرار دے رہی اے تے کہہ رہی اے کہ کپتان صرف کرکٹ ٹیم دی قیادت تے کر سکدا اے پر ملک نہیں چلا سکدا۔ ایس طرح سیاست وچ افراتفری لگی ہوئی اے تے جنوری وچ احتجاج، فروری، مارچ وچ اسلام آباد وچ میدان لگن نوں تیار اے شاید ایہہ میدان وی بے نتیجہ ثابت ہو ئے کیوں جے ماضی وچ وی ہر اپوزیشن جماعتاں ایس طرح دی ہنگامہ آرائی کردی رہی اے تے حکومتاں اپنا کم کرن دے نال نال اپوزیشن قیادت نوں اذیتاں دیندی رہی اے۔ایس وچ نقصان صرف عوام دا ہوندا اے۔ ہر حکومت دے دور وچ ملک نہ صرف مزید مقروض ہوندا آ رہیا اے، بلکہ بیروز گاری، مہنگائی ، مفلسی، غربت وچ وادھا غریب تے متوسط طبقہ دی چیخاں نکلوا رہیا اے پر نہ تے ماضی دی کسے حکومت نفے غریب دی فلاح لئی کم کیتا تے نہ ای کپتان دی حکومت نے۔ سو ایس طرح شاید نہ ماضی دی حکومت نوں غریب عوام دی چیخاں سنائی دتیاں تے نہ کپتان نوں 27 دسمبر نوں گڑھی خدا بخش وچ بے نظیر بھٹو دی 13 ویں برسی دی تقریب ایس لحاظ نال سی کہ ایس وچ مسلم لیگ (ن) دی مریم نواز، محمود اچکزئی، عبدالغفور حیدری سنے پی ڈی ایم دی قیادت نے بھرپور شرکت کیتی، گو کہ جمعیت علماء اسلام دا نمائندہ مولانا عبدالغفور حیدری موجود سی، پر بحیثیت پی ڈی ایم سربراہ مولانافضل الرحمان دی ایس موقعے اُتے کمی محسوس کیتی گئی، برسی دی تقریب نال خطاب وچ (ن) لیگ مریم نواز نے بلاول بھٹو نوں اپنا بھائی کہندے ہوئے بھٹو خاندان دی ملکی سیاست وچ لازوال قربانیاں اُتے ایہناں نوں خراج تحسین پیش کیتا، تے بے نظیر بھٹو دی زندگی وچ ایہناں نال اپنی (مریم نواز) دی ملاقاتاں وچ ہون والی گل بات بارے پہلی وار پردہ چکیا، 2018 تیکر پیپلز پارٹی تے ن لیگ وچ دوریاں سن، دونویں جماعتاں دی قیادت، جیالے تے متوالے اک دوجے نوں چوک چوراہواں وچ تنقید دا نشانہ بناندے رہے، پی ڈی ایم دے سربراہ مولانا فضل الرحمان نے دعوت (محترمہ بے نظیر بھٹو ) دی حکومت نوں غیر شرعی قرار دتا سی، سابق صدر آصف علی زرداری نے کہیا سی کہ ایس وار اسیں میاں (نواز شریف ) نوں چھڈ دتا تے شاید اللہ وی سانوں معاف نہ کرے، کیوں جے ایہہ قوم تے ہاریاں دا چور اے، اسیں انج دے درندے نوں برداشت نہیں کر سکدے، جد کہ موصوف نے ایہہ وی کہیا سی کہ آپ (نواز شریف ) نے ہمیشہ ساڈی پیٹھ وچ چھرا ماریا اے، ایس وار اسیں تہاڈے بہکارے وچ نہیں آئواں گے نہ اسیں تہاڈے نال جاواں گے، بلاول بھٹو وی اپنے والد وانگوں میاں برادران نوں آڑے ہتھاں لیندے رہے نیں تے کہندے سن کہ میاں شہباز شریف نے سانحہ ماڈل ٹائون ملتان تے آشیانہ سکیم کرپشن دا جواب دینا اے۔ اسیں سب مل کے تخت رائے ونڈ دی آمریت نوں ڈیگاں اے، بلاول بھٹو نے ایہہ وی کہیا سی کہ میاں صاحب نے کشمیریاں لئی اک ’’ٹکہ ‘‘ دا کم نہیں کیتا، میں آپ (نواز شریف ) نوں مودی دا یار نہ کہواں تے کیہ کہواں جد کہ نواز شریف کہندے سن کہ زرداری صاحب 6 کروڑ ڈالر تہاڈے توں کتھوں لے کے آئے نیں، اسیں ایس ویلے تیکر چین نال نہیں بیٹھاں گے جدوں تیکر 6 کروڑ ڈالر پاکستان واپس نہیں لے آندے، ایہہ قوم دا پیسہ تے ، قوم دے لہو پسینے دی کمائی اے، لٹیرے زرداری نے پاکستان دی دولت لٹ کے سرے محل خرید لیا اے، میرا ناں وی نواز شریف نہیں کہ سرے محل نوں نیلام کر کے ساری رقماں قوم دے قدماں وچ نچھاور نہ کر دیواں، 2018ء وچ اک جلسے نال خطاب وچ میاں نواز شریف نے ایس گل نوں دوہراندے ہوئے آصف علی زرداری دے بارے وچ کہیا کہ سویٹزر لینڈ وچ کس دا 6 سو کروڑ روپئے اے، جے ایہہ رقم جلسہ دے شرکاء وچ ونڈ کیتی جائے تے جلسے وچ موجود ہر بندے دے حصے وچ 10 لکھ آئے گا، جد کہ شہباز شریف نے جواب وچ بلاول دے بارے وچ کہیا سی کہ پتر (بلاول بھٹو) اک کرپشن دا کیس تے ساہمنے آ گیا تے تسیں فیر والد دے نال لندن جا رہے او۔ جد کہ شہباز شریف ببانگ دہل کہندے سن کہ انتخابات دے بعد زرداری نوں لاڑکانہ کراچی، پشاور، لہور دی سڑکاں اُتے نہ گھسیٹیا تے میرا ناں شہباز شریف نہیں۔ شہباز شریف نے اک وار آصف علی زرداری ول اشارہ کردے ہوئے ایہہ وی کہیا سی کہ پیسے ساڈے حوالے کر دیو نہیں تے تہانوں تے تہاڈے لٹیرے ساتھیاں نوں نہیں چھڈاں گے۔
کپتان دی حکومت تے ساتھیاں وچ وی انج دے لوکاں دی بہتات اے جنہاں اُتے کپتان وزیراعظم بنن توں پہلے تنقید کردے رہے جس دا (ماضی دے حریف موجود حلیف ) کپتان نوں خوب جواب دیندے رہے ایہناں ای وچ ایم کیو ایم تے عوامی مسلم لیگ دے سربراہ شیخ رشید وی شامل نیں جنہاں اُتے کپتان نے تنقید کیتی سی۔ ہن ایم کیو ایم پی ٹی آئی دی حکومت دی اتحادی تے شیخ رشید وزیر داخلہ ( جیہڑا عہدہ سیکنڈ وزیراعظم تصور کیتا جاندا اے ) دے منصب اُتے فائز نیں۔
ہن کپتان دی حکومت نے اقتدار وچ آ کے حسب سابق اپوزیشن نوں رگڑا دینا شروع کیتا تے دونویں جماعتاں دے قائدین ساری تلخیاں بھُل گئے 2019 وچ پیپلز پارٹی تے ن لیگ وچ قربت ہوئی تے پی ڈی ایم دا اتحاد معرض وجود وچ آ گیا ، آیا، ایسے بنا اُتے مریم نواز لہور توں لمبا سفر کر کے بے نظیر شہید دی برسی وچ شریک ہوئیاں تے اکثریتی جیالاں دے اجتماع نال خطاب وچ ایہہ وی انکشاف کیتا کہ سب توں پہلے میاں نواز شریف بے نظیر بھٹو دی خبر گیری لئی گئے تے ڈاکٹرز نے ایہناں نوں (میاں نواز شریف ) نوں بے نظیر دی شہادت دی خبر سب توں پہلے دسی، تے ہسپتال توں باہر آ کے میاں نواز شریف نے جیالاں نوں سینے نال لا لیا، مریم نواز شریف نے ایہہ وی کہیا کہ ایہناں دے خاندان نوں بے نظیر بھٹو دی وفات دا بوہت دکھ ہویا تے ایہناں دے گھر وچ سوگ دا عالم سی تے سب اتھرو بہا رہے سن، ایس توں پہلاں مریم نواز یا مسلم لیگ ن یا میاں برادران وچوں ایس طرح دا انکشاف کسے نے نہیں کیتا۔ توجہ طلب امر ایہہ اے کہ 13 ویں برسی تقریب نال آصف علی زرداری نے خرابی طبیعت دے باوجود ویڈیو لنک دے ذریعے خطاب کیتا جد کہ ایس توں پہلاں لہور وچ مریم نواز نے اعلان کیتا سی کہ جلسے نال آصف علی زرداری تے میاں نواز شریف ویڈیو لنک دے ذریعے خطاب کرن گے، میاں نواز شریف نے جلسے نال خطاب کیتا سی پر آصف علی زرداری نے بیمار ی دی بنا اُتے خطاب نہیں کیتا سی۔ ایہہ وی عوام دے ذہناں وچ ابھر رہیا اے تاں ایہہ گل خوش آئند اے کہ مریم نواز نے بلاول بھٹو زرداری نوں بھرا کہیا اے، ایس نال جیالیاں تے متوالیاں وچ تنائو گھٹ تے بھائی چا رے دی فضا نوں فروغ ملے گا۔
سو گل کتھوں کتھے نکل گئی، گل ہو رہی سی اپوزیشن تے حکومت وچ جاری جنگ دی تے اوہ زور و شور نال جاری اے، اپوزیشن جنوری وچ یکے بعد دیگرے جلسے تے مختلف ڈویژنل مقامات اُتے مظاہرے کرن جا رہی اے، حکومت ایس دا کس طرح سدباب کردی اے ایس لئی کجھ وی کہنا قبل از وقت اے، تاں ماضی طرح بدستور غربت دی چکی وچ پس رہی اے، آٹا چینی گھیو، دالاں حتیٰ کہ ضروریات زندگی دی ساری شیواں عوام دی پہنچ توں دور ہو گئیاں نیں۔ دوائیاں دی مہنگائی نے موتاں وچ وادھا کر دتا اے ہن عوام کسے مسیحا دے آن دی منتظر اے جیہڑا آئے تے ایہناں لئی دو ویلے دی روٹی دی فراہمی آسان بنائے۔