ضمیر لے لو کوڈیاں دے مُل

لكهت: سید علی عباسی کاظمی

روزوار پرنٹ میڈیا تے الیکٹرونک میڈیا اتے کرپشن تے لٹ مار دیاں چوکھیاں کہانیاں سنن نوں لبھدیاں نیں. وڈے وڈے سیاستدان تے بیورو کریٹ رشوت تے کرپشن وچ گوڈے گوڈے لتھے ہوئے دِسدے نیں. دنیا داری وچ ہر پاسے ای اک کھپ کھپیا تے رولا جیا مچیا ہویا اے بس نیتوں کھرا تے ایمان دار اوہی اے جس نوں موقع نہیں لبھا. کیوں جے ہر تھاں کرپشن, مار ڈھاڑ, ظلم تے بربریت دی کہانی سنن نوں لبھدی اے جس پاسے اکھ بھناو اوس تھاویں ای ظلم زیادتی دی اگ لگی ہوئی اے ایہناں گلاں نوں سنڑدیاں ویکھدیاں تے اپنے لفظاں وچ پرو کے تسبیح وانگ لوکائی تیکر اپڑاندیاں مینوں اپنے طور شیت کہ چوکھے وریاں دا ویلا لنگ چکیا اے. روزوار ای ایہ گلاں مڑ مڑ متھے وجدیاں نیں پتا نہیں کیوں؟ وڈے لوکاں یعنی سیاستداناں تے بیوروکریٹاں دی لٹ مار, ظلم زیادتی تے کرپشن ہر کوئی دسدا اے پر میں ایتھے اج نِکے لیول یعنی عام جئیے بندے دی کرپشن دا چرچا کرنا چاہواں گا. اوہ ایویں کہ 09 نومبر 2020 نوں میں انٹرویو دین گیا ساہیوال شہر اک مائیکرو فنانس بنک اچ اکانٹنٹ لئی. دفتر ٹایم نال پہنچ گیا تے میرا انٹرویو ہو گیا تے اس توں مگروں مینوں اوہناں آکھیا کے تسی کل توں آجا دفتر یعنی میری نوکری لگ گئی تے مینوں چوکھی خوشی ہوئی تے میں اگلے دن دفتر پہنچ گیا. پہلے پندرہ دن دی ٹریننگ دتی گئی جس وچ اوہناں سارے دفتری کم اکانٹس تے کھاتے مینوں دسے سکھائے پر ایس دے دوجے پاسے میری کوئی پچھ پریت یاں کاغذی کاروائی نہیں کیتی گئی کہ بندے دا کریکٹر کنج دا اے ایہ ساڈے نال کوئی دھوکا تے نہیں کرے گا. ٹھیک 02 دسمبر 2020 آلے دیہاڑے مینوں پوری برانچ دا چارج وی لبھ گیا یعنی ساری سیاہی سفیدی دا میں آپ مالک دو دسمبر جدوں مینوں پچھلے اکانٹنٹ جس نے مینوں سارا کم سکھایا سی نے مینوں سارا کجھ ہینڈ اوور کیتا جس وچ باقی تے سبھ پورا سی پر کیش وچ لگ بھگ 50,000 روپے دا گھاٹا سی. ایہ ویکھ کہ میں اوس اکانٹنٹ نوں تے اسٹنٹ برانچ مینیجر تے فیلڈ افیسر سبھ نوں دسیا کہ 50,000 تکر کیش گھٹ اے پر اکانٹنٹ سمیت سب نے آکھیا کہ ایہ روٹین دا کم اے بس چلائی جا جویں چلدا اے. 02 دسمبر وی لنگ گئی تِن وی چار وی ہولی ہولی گل 09 دسمبر تکر پہنچ گئی تے میں روزوار ایہ رولا رپا ساری برانچ وچ پاندا ساں پر کوئی کن وی نہیں سی دھردا 9 تریخ نوں ایریا مینیجر نے کہیا کہ کیش جمع کروا بنک اچ تے میں اوہنوں آکھیا سر میرے کول تے کیش اچ پجا ہزار تکر گھاٹا اے ایہ سن کے اوہ الٹا مینوں ای تئیں ہوگیا گل ہون دی دیر سی ساری برانچ وچ رولا پے گیا تے چیکنگ شروع ہو گئی کاغذاں دی پھرولا پھرالی تے ریکارڈ دی جانچ ہون لگ پئی تے پرانے کھاتے کھلن شروع ہوئے جدوں سارا کجھ ہوگیا تے گل قسم نیاں تے آگئی میں قسم دے دتی کیوں جے میں تے چور نہیں ساں. پرانا اکانٹنٹ قسم دین دی بجائے سدھا سدھا آپے ای من گیا کہ میں ایہ غلطی کیتی اے تے میں ایہ خمیازہ بھگتاں گا پر ایہ پیسے میں کلے نہیں کھادے ایہناں وچ پندراں ہزار ایریا مینیجر نوں دتے اٹھاراں ہزار برانچ مینیجر نوں دتے اٹھ ہزار فلاں فیلڈ افیسر نوں تے باقی میرے کول نیں. یعنی دال اچ کالا نہیں سی بلکے پوری دی پوری دال ای کالی نکلی. وگدی گنگا وچ ساریاں ای ہتھ دھوتے ہوئے سن اوس توں مگروں فلفور میں اوتھے ای استعیفا دتا تے گھر آ گیا. سوچن والی گل اے کہ ساڈے ملک واسیاں نوں کی ہوگیا اے نِکا ہووے یاں وڈا ملازم یاں افسر سرکاری ہووے یاں کہ پرائیویٹ جس دا جتھتے چک پے گیا اوہ چھڈدا نہیں تے ایتھے ضمیر اچے ٹبے تے کھلو کے واجاں ماردا پیا اے کہ ضمیر لے لو کوڑیاں دے مل. بس سچا کھرا اوہی اے جس نوں لبھیا نہیں.
اگوں 09 دسمبر 2020 نوں گھر آون توں بعد رات چوکھی ٹینشن اچ لنگی کیوں جے کرونا دی وجھا نال پہلے ای اینی بیروزگاری اے اتوں جیہڑی نوکری لبھی سی اوہ وی چھڈ دتی. 10 دی سویر ہوئی تے مینوں اک رشتے دار دا فون آیا کہ چائنا والیاں نے جیہڑا سی پیک بنایا اے اوتھے اک ارام گاہ تے مینیجر دی سیٹ لئی توں آجا میں گل کر لئی اے تے میں دس تریخ نوں ای اپنا ٹیا ٹمبا تیار کیتا تے 11 دسمبر اوتھے پہنچ گیا. تے پچھلے مینیجر کولوں حساب کتاب ویکھیا لین توں پہلاں پچھ پریت کیتی تے اوتھے وی کتی چوراں نال رلی ہوئی ای ویکھی. تھوڑا جیا حال سنا دیندا واں کہ ہینڈ اوور لین ویلے مینوں 8,000 روپے کیش نقدی دتا گیا تے میری ذمہ داریاں کی سن بھلا 1,31,280 روپئے بجلی دا بل تارنا سی, فیر روزوار 5000 دا جنریٹر لئی ڈیزل لازمی لینا اے, فیر روزوار دوآں ٹک شاپاں لئی 30,000 توں 40,000 ہزار روپئے دی پرچیزنگ وی کرنی اے(بسکٹ,چپس,کپ کیک, گولی ٹافی, جوس, بوتل, پیزا, شوارما, بریانی), فیر مینیجر دے تھلے والے عملے( 4 کیشیئر, 4 سیل مین, 2سکیورٹی گارڈ, 1مالی, 8 سویپر, 2 سپروائزر سویپر) کل رلا کے لگ بھگ 21 بندیاں دیاں تنخواہاں جیہڑیاں پچھلے دو مہینیاں توں نہیں دتیاں گئیاں دینیاں سن لگ بھگ 4,73,741 روپے ایہ سارے لکھاں روپئے دی ادائیگی کرنی اے تے مینوں ہینڈاوور اچ صرف 8,000 روپیا نقدی دتا گیا اے. ہن کرپشن کویں کہ دودھ 70 روپے کلو لے کے مالکاں نوں 110 روپے کلو دسناں, روٹی 7 روپے دی لے کے 10 روپے دی لکھنی, سبزی 150 دی لیا کے 400 دی دسنی, پٹرول 100 دا پوا کے 300 دا لکھنا, فیر شاپ وچوں چک کے جو مرضی کھا لو کوئی پچھ گِچھ نہیں. یعنی مینیجر توں لے کے سویپر تکر جس دا جتھے دا لگا اوہ کھلوندا نہیں. حلال توں وکھ حرام کمان نوں شیر نیں کیوں جے حلال اچ پوری نہیں پیندی
آکھن نوں اسی مسلمان آں سچے نبی(ص) دا کلمہ پڑھن والے تے منہ مومناں کرتوت کافراں کی صرف ایہ ہنیر ساڈے دیس وچ ای اے ٹھیک اے کرپشن تے دنیا دے شیت کہ ہر ملک اچ ہوندی ہووے گی پر سوچن والی گل اے کہ اسلام دے ناں اتے بنیا ملک اسلامی جمہوریا پاکستان جس دے حکمران تے کجا لوکائی وی حرام دی کمائی نال اپنا ڈھڈھ بھری جاندی اے. ایہ وی سچ اے کہ جس طرحاں دی عوام اوس طرحاں دے حکمران ایہ حکمران ساڈے اتے ٹھیک مسلط نیں کوئی کسے نوں نہیں پچھدا ایتھے بلکے حرام کمان کھان وچ اک دوجے دی سامبھ کردے نیں یعنی ونڈ کھا تے کھنڈ کھا والا قایدہ تے حلال کمان کھان والے نوں ایتھے بے وقوف تے چبل سمجھیا جاندا اے.
سوچن لایق گل کہ ساڈی اے سوچ جس نوں اسی اپنی فطرت اچ رلا چکے آں ایہ کدوں مکے گی حالاں کہ ہر نوٹ (پیسے) اتے لکھیا ہوندا اے کہ رزق حلال عین عبادت اے. پر ایس سبھ کجھ دا پتا ہون توں وکھ وی اسی ایہ رزق حرام چھڈن لئی تیار نہیں کیوں؟ کیوں جے حلال رزق تھوڑا اے تے ساڈی رزق حلال نال پوری نہیں پیندی تے ایہ حرام کمائی ساڈی نس, نس بلکے نسلاں وچ رچ وس گئی اے. کاش کوئی سمجھے ایس ضمیر دی واج نوں کہ ضمیر لے لو کوڑیاں دے مل