شکرالحمدللہ!

بھلا ایہ کیویں ممکن اے تسیں کسے ہستی نوں اپنے ہتھاں نال غسل دے کے کفن پہنان مگروں قبر وچ اتاریا ہووے تے ایہدے باوجود تہانوں انج محسوس ہووے کہ اوہ ہستی ایتھے ای کدھرے تہاڈے آل دوالے موجود اے۔ ایہ سوال جے تسیں کسے اجہے بندے توں پچھو جنہے ایس فانی دنیا وچ اپنی کسی عزیز ہستی نوں ہمیشہ لئی کھو دتا ہووے تے اوہ جواب وچ تہانوں ایہ ضرور کہوے گا کہ مردے سمے تک دل دے نہ بھرن والے پھٹاں نال زندہ رہن لئی ایہ احساس ممکن ای نہیں سگوں رب کریم دی بہت وڈی عطاء وی اے۔ حقیقت اجہی شے اے جنہوں منے بناں کسے لئی کوئی چارا نہیں پر کجھ حقیقتاں اینیاں بے حم تے تلخ ہوندیاں نیں کہ اوہناں نوں سمجھن دے باوجود منن نوں دل نہیں کردا۔ ہر ذی روح جو دنیا وچ آئوندا اے اوہنوں اک دن رت دے حکم تے اپنے پیاریاں نوں ہمیشہ لئی چھڈ کے ایتھوں جانا اے۔ ایہ سلسلہ ازل توں جاری اے تے ابد تک رہوے گا پر ایہ دل اجیہا ناسمجھ تے نادان اے کہ منن نوں تیار ای نہیں۔
دوجے پاسے خالق کائنات دے کھیڈ وی عجیب تے نرالے نیں اک پاسے اوہنے ساڈے دِلاں وچ اپنے پیاریاں لئی پیار‘ محبت‘ چاہت تے مروت ورگا نازک احساس رکھیا اے تے دوجے پاسے ایہناں پیاریاں توں عارضی یاں دائمی جدائی ورگی کڑی آزمائش وی اے جہنوں صبر و رضا دے نال برداشت کرن لئی اسمان جناں اُچا حوصلہ تے پہاڑ ورگا مضبوط کلیجہ چاہیدا اے جو اللہ تعالیٰ دے خاص کرم دے بناں اوکھا ای نہیں ناممکن وی اے۔ 14جولائی 2020ء منگل دیہاڑے میرے تے میرے دوجے بھین بھراواں تے والدہ محترم لئی ایسے کڑی آزمائش دے آغاز دا دن سی جدوں والد محترم چوہدری گلزاراحمد خان تراسی ورھے دی عمر وچ اک ورھے تک کینسر ورگے موذی مرض دابڑی ہمت تے بہادری نال مقابلہ کردے ہوئے اپنے آبائی پنڈ مراڑہ شریف وچ ایس جہان فانی توں ہمیشہ ہمیشہ لئی کوچ کر گئے۔ اوہناں دی وفات دے دن توں اج تک شاید ای کوئی اجیہا دن یاں لمحہ گزریا ہووے جدوں اوہناں دی یاد میرے شامل حال نہ رہی ہووے۔ میری گڈی وچ اگلی سیٹ دے کھبے پاسے اوہناں دے اپنے ہتھ نال رکھی ہوئی پانی دی ادھی بوتل دوران ڈرائیونگ جتھے مینوں اوہناں دی موجودگی دا احساس دواندی اے اوتھے مینوں اپنے برابر دی سیٹ اوہناں دی عدم موجودگی دا احساس دوا کے اکثر رلا دیندی اے۔ اجہے بے بس لمحیاں دے بعد اپنے اتھرو پونجھدے ہوئے پتہ نہیں مینوں ہمیشہ ایہ احساس کیوں ہوندا اے جیویں میں والد صاحب دی یاد وچ اتھرو بہا کے کوئی عبادت کیتی ہووے خدا گواہ اے گھڑی بھر دے ایس رونے دے بعد دا سارا غبار دُھل جاندا اے۔
میں کدی وی اک سلجھیا ہویا تابعدار بچہ نہیں رہیا اپنے سارے بھراواں وچ مینوں ایہ اعزاز حاصل اے کہ اپنیاں شرارتاں تے نالائقیاں پاروں والد صاحب توں سب توں ودھ پھینٹی میں کھادی اے تے ایہ وی دس دیواں کہ میں ایہ پھینٹی ہمیشہ اپنی محنت تے میرٹ تے کھادی اے۔ اج مینوں جدوں کدی اکلاپے وچ مونا واپڈا کالونی بھلوال وچ گزرے بے فکری تے شرارتاں نال بھرے اوہ دن تے واقعات یاد آئوندے نیں تے والد صاحب نوں اپنے نال نہ پا کے بے اختیار اکھاں چھلک جاندیاں نیں۔ بھاویں مونا واپڈا کالونی مینوں پہلے وی بڑی پیاری سی پر والد صاحب دے نال ایتھے گزرے زندگی دے خوبصورت ترین دیہاڑیاں پاروں ایہ تھاں مینوں ہن ہور وی پیاری ہو گئی اے۔ مینوں مان اے کہ ساڈے والد صاحب اک باکردار‘ اصول پرست‘ محنتی‘ ہمدرد تے سچے کھرے انسان سن۔ والد صاحب نے نہ صرف سانوں ہمیشہ نیکی تے اچھائی دی تعلیم دے نال دوجیاں دی مدد کرن دی تلقین کیتی سگوں ایس حوالے نال اوہناں نے عملی طور تے اپنی مدد آپ دے تحت اپنے آبائی پنڈ وزیر پور مراڑہ وچ اہلیان علاقہ تے آل دوالے دے ہزاراں غریب‘ نادار تے مستحق بندیاں نوں علاج معالجے دی فوری تے بنیادی سہولتاں دی فراہمی لئی اپنے دادا دے ناں تے الفضل ہسپتال دی تعمیر دا بیڑا وی اٹھایا۔ شکرالحمد للہ ساڈے خاندان تے اہل علاقہ دی خوش بختی اے کہ نویں ورھے دے شروع تے والد صاحب دی وفات دے چھ مہینے بعد اہلیان علاقہ دی اک چوکھی گنتی دی موجودگی وچ صوبائی وزیر مذہبی امور و اوقاف پنجاب پیر سید سعیدالحسن شاہ دی خصوصی شرکت تے دعا دے نال والدہ محترمہ دے ہتھوں ایس کارخیر دا افتتاح ہو گیا اے۔
ہسپتال دی افتتاحی تقریب وچ دعا توں پہلاں پیر سید سعیدالحسن شاہ نے اپنے خصوصی خطاب وچ والد محترم چوہدری گلزاراحمد خان تے ممتاز سیاسی تے سماجی شخصیت ستارہ شجاعت تایا جی چوہدری بشارت احمد خان مرحوم دی اہلیان علاقہ لئی خدمات نوں بھرویں الفاظ وچ خراج عقیدت پیش کیتا تے ہسپتال دے قیام نوں اہل علاقہ دے علاج معالجے لئی سلاہن جوگ قرار دیندے ہوئے اپنے ہر ممکن تعاون دا یقین دوایا تے ایس کارخیر وچ برکت لئی دعا فرمائی۔ ایس موقعے تے صوبائی وزیر پیر سید سعیدالحسن شاہ نے اپنے خطاب وچ عوامی فلاح و بہبود دے ایس منصوبے دی تعمیروتکمیل وچ وڈے بھائی رانا آصف ندیم اوہناں دے پُتراں رانا نعمان آصف‘ رانا عمر آصف ایڈووکیٹ‘ رانا بلال آصف تے چھوٹے بھراواں رانا عمران ندیم‘ رانا کامران ندیم تے راقم دے نال خاندان دے دوجے بندے چوہدری خالد محمود منہاس‘ سلیم رضا سلہری تے رانا بشارت دیاں کاوشاں نوں وی سراہیا جو اہل علاقہ دی خدمت لئی وقف ایس ہسپتال دی تعمیر لئی ایہدے آغاز توں تکمیل تک ہر مرحلے وچ دامے‘ درمے تے سخنے پیش پیش رہے۔ اللہ تعالیٰ اگے دعا اے کہ اوہ اپنے خصوصی فضل و کرم نال اہلیان علاقہ دی خدمت دے ایس چراغ نوں ہمیشہ روشن رکھے تے عوامی خدمت دا سلسلہ قیامت تک چلدا رہوے۔