فیصل واوڈا نا اہلی کیس :جواب جمع کران لئی 8 فروری تک مہلت دیدتی
اسلام آباد (پنجابی میڈیا گروپ) اسلام آباد ہائیکورٹ نے نااہلی لئی دائر درخواست اتے وفاقی وزیر فیصل واوڈا نوں جواب جمع کران لئی 8 فروری تیک مہلت دیدتی۔جمعرات نوں اسلام آباد ہائی کورٹ دے جسٹس عامر فاروق نے کیس دی سماعت کیتی۔ وکیل فیصل واوڈا نے درخواست خارج کرن لئی متفرق درخواست دائر کیتی اے ۔جسٹس عامر فاروق نے آکھیاکہ اسلام آباد ہائی کورٹ دے لارجر بنچ دا خواجہ آصف کیس وچ فیصلہ موجود اے۔وکیل جہانگیر جدون نے آکھیا اے کہ الیکشن کمیشن دے وکیل نے فیصل واوڈا دے کاغذات نامزدگی تے بیان حلفی عدالت وچ پیش کیتے۔ کیس وچ سولہویں پیشی اے۔عدالت نے فیصل واوڈا توں اک سال پہلاں جواب طلب کیتا سی جہڑا ہن تیک نہیں دتا گیا۔جسٹس عامرفاروق نے آکھیاکہ اسیں فیصل واوڈا نوں جولائی 2023 تیک دی تاریخ دے دیندے آں اسیں آکھیا سی کہ فیصل واوڈا عدالت وچ جواب جمع کران۔بعدازاں عدالت نے فیصل واوڈا نوں جواب جمع کران لئی 8 فروری تیک مہلت دیندیاں ہویاں کیس دی سماعت ملتوی کر دتی۔





















