دہشت گردی اک المیہ
افغانستان، عراق، لیبیا تے شام وچ جاری رہن والی جنگ نے نہ صرف خطے بلکہ پوری دنیا نوں غیر محفوظ بنا رکھیا اے
لكهت:رابعہ رحمٰن
دنیا دے ہر خطے وچ وسن والے انساناں دا دل درد وی محسوس کردا اے تے اکھاں درد ملن اُتے اتھرو وی بہاندیاں نیں پر جنہا درد تے اذیت ازل توں مسلماناں نوں مل رہیا اے ایس دی پوری دنیا گواہ اے دہشت گرداں نے جیہڑے ظلم مسلمان قوم اُتے کیتے یں ایس دی مثال نہیں ملدی پر مسلماناں دی مدد نوں اآن والے یا ایہناں لئی اواز بلند کرن والے آٹے وچ لون دے برابر نیں ایس لئی قربانیاں دی بھینٹ چڑھن والی مسلمان قوم نے اپنی مدد آپ دا بیڑہ چک لیا اے خاص کر پاکستان وچ داعش تے دوجی دہشت گرد تنظیماں دے خلاف قوم دے پتر قربانی اُتے قربانی دیندے چلے جا رہے نیں، چیف آف آرمی سٹاف دی ٹھیک حکمت عملی اپنان نال انتہائی موثر کاروائیاں نے کسے حد تیکر دہشت گرداں دا قلع قمع کر دتا اے۔ ہن جے دوجے ملک وی انج دی حکمت عملی اپنان تے ہر قوم ایہناں بربریت پھیلان والی تنظیماں دے خلاف برسر پیکار ہو جائے تے دنیا توں دہشت گرداں دا نام و نشان وی مٹ سکدا اے۔ حالیہ اک دہائی توں جاری دہشت گردی دے خلاف عالمی جنگ ختم ہوندی وکھائی نہیں دیندی۔ایس جنگ نے ہن دنیا دے بوہت سارے علاقیاں نوں اپنی تحویل وچ لے لیا اے کیوں جے دہشت گردی بوہت تیزی نال نہ صرف ودھ رہی اے بلکہ مزید بھیانک وی ہوندی جا رہی اے۔ ایہہ جنگ افغانستان، مشرق وسطیٰ یا افریقہ دے کجھ ملکاں تیکر ای محدود نہیں رہی بلکہ یورپ جہے ترقی یافتہ علاقے وی تیزی نال ایس دی لپیٹ وچ آندے جا رہے نیں۔
پیرس وچ ہون والے کئی واقعے ایس دی اک واضح مثال نیں۔ اکثر حملیاں دی ذمہ داری تیزی نال ودھدی ہوئی دہشت گرد تنظیم داعش قبول وی کر لیندی اے۔ عراقی حکومت دے مطابق برطانیہ تے فرانس سنے بوہت سارے یورپی ملکاں نوں دہشت گردی دی کاروائی دے بارے وچ جدوں وارننگ دتی گئی سی تے الزام تراشیاں، تجزیاں، دھمکیاں تے گرفتاریاں دا روایتی سلسلہ وی جاری رہیا سی تے کئی ملکاں نے داعش دے خلاف بھرپور کاروائی دا اعلان وی کر دتا سی۔یورپ سنے پوری دنیا وچ مذمت دا اظہار وی کیتا گیا سی۔ امریکہ تے کجھ طاقتور یورپی ملک خاص طور تے گل سمجھن دی کوشش نہیں کر رہے کہ اج دنیا اینی غیر محفوظ کیوں ہو گئی اے تے اک دے بعد دوجی دہشت گرد تنظیم کیوں جنم لے رہی اے۔ کیہ ایہہ حقیقت نہیں کہ بنیادی وجوہات دی تہہ تیکر اپڑن دی بجائے صرف اپنے اپنے مفادات دے حصول تے تحفظ دی خاطر دنیا نوں اگ تے لہو دے کھیڈ وچ مسلسل دھکیلیا جا رہیا اے۔
فلسطین دا حل طلب مسئلہ تے اسرائیل دی ظالمانہ پالیسیاں انصاف توں محروم مسلماناں نوں تشدد دی مزاحمت اُتے مائل کر رہیاں نیں۔ افغانستان، عراق، لیبیا تے شام وچ جاری رہن والی جنگ نے نہ صرف خطے بلکہ پوری دنیا نوں غیر محفوظ بنا رکھیا اے۔ صادم حسین دے بعد عراق، طالبان دے بعد افغانستان تے معمر قذافی دے بعد لیبیا، کیہ اج سب پرُامن تے خوشحال نیں؟ یقینا نہیں۔ کیہ امریکہ تے ایس دے اتحادی اپنے مفادات دی خاطر مختلف گروہاں نوں مضبوط تے مسلح نہیں کردے، کیہ اسرائیل دی مسلسل پشت پناہی امریکہ دے خلاف جذبات نوں مزید ابھار نہیں رہی؟ آخر ایہہ لوک کدوں تیکر اپنے آپ نوں دنیا نوں بے وقوف بناندے رہن گے۔ یقینا تہانوں سبنوں یاد ہوئے گا کہ روس دے صدر نے واشگاف لفظاں وچ کہیا سی کہ دنیا دے 40 توں ودھ ترقی یافتہ ملک داعش دی بالواسطہ مدد کردے نیں۔ اج بشارالاسد دے خلاف باغیاں نوں نہ صرف بھرپور مدد فراہم کیتی جا رہی اے بلکہ ایہناں نوں منظم تے مضبوط وی کیتا جا رہیا اے تے کل نوں جدوں ایہو باغی آپ امریکہ تے ایس دے اتحادیاں دے خلاف اٹھ کھڑے ہون گے تے فیر واویلا شروع کر دتا جائے گا۔پوری دنیا وچ ہون والے حملیاں نال امریکہ تے ایس دے اتحادیاں لئی اک واضح پیغام اے کہ اپنی حکمت عملی تے رویاں وچ تبدیلی لیائی جائے۔ غیر انصافی تے من پسند اُتے مبنی حکمت عملی نوں جاری رکھن دا نتیجہ ایسے طرح نکلے گا نہیں تے تعصبانہ تے اپنی من پسند حکمت عملی جاری رکھن دا نتیجہ ایسے طرح نکلے گا۔ اک داعش نوں ختم کرن نال کم نہیں چلے گا بلکہ کل کسے ہور ناں توں نویں تنظیم معرض وجود وچ آ جائے گی جویں کہ اج تیکر ہوندا آیا اے۔
لوڑ بنیادی وجوہات نوں جانچن تے فیر حقیقت پسندانہ تے متفقہ لائحہ عمل اپنان دی اے۔ ایس لئی مشاورت تے خلوص نیت دی لوڑ اے تے خاص طور تے مسلمان ملکاں نوں وی چاہیدا اے کہ اپنے مفادات دی خاطر دوجیاں دا آلہ کار بنن دی بجائے آزادانہ تے حقیقت اُتے مبنی حکمت عملی اپنان آخر کدوں تیکر اسیں دوجیاں لئی استعمال ہوندے رہاں گے۔ اونج وی ساڈے م”ذہب جیہڑے وضو لئی وادھو پانی ڈیگن توں وی منع فرماندے نیں اوہ بے گناہ انساناں دا لہو بہان دی اجازت کنج دے سکدا اے دہشت گردی اوہ ناسور اے جیہڑا اک انسانی جسم دے اندر پلدا اے تے ویلا لنگھن دے نال نال آتش فشاں وانگوں پھٹ جاندا اے۔ ایس ناسور نوں ختم کرن لئی سانوں اپنے مذہب، اپنی روایات تے اپنی تاریخ نوں پڑھنا چاہیدا اے تے جس طرح بابا بلھے شاہ نے کہیا ،علم بغیر عمل کجھ معنی نہیں رکھدا۔
