’’سرکاری ہسپتال تباہی دے دہانے اُتے ‘‘
ایم ٹی آئی ایکٹ لاگوں ہون توں بعد سرکاری ہسپتال دا کوئی ڈاکٹر پرائیویٹ پریکٹس نہیں کر سکے گا،
پر سرکاری ہسپتال وچ دوجی شفٹ وچ ڈاکٹر نوں پریکٹس دی اجازت ہوئے گی
تحریر: اکرم عامر
پورے ملک دے سرکاری ہسپتالاں دی اکثریت وچ طبی سہولتاں دا فقدان اے ملک دے 60 فیصد پنڈ دے علاقیاں وچ عوام دے علاج معالجے لئی سرکاری ہسپتال یا ڈسپنسری تیکر نہیں، جس دی وجہ نال متوسط تے غریب طبقہ مشکلاں دا شکار ہو کے سسک سسک کے دم توڑ رہیا اے، پاکستان تحریک انصاف دے سربراہ عمران خان نے برسر اقتدار آن توں پہلے کہیا سی کہ اوہ اقتدار وچ آئے تے تعلیم دے فروغ تے غریب عوام نوں مفت جدید طبی سہولتاں دی فراہمی نوں یقینی بنائواں گے، عوام نے شاید ایہو سوچ کے پی ٹی آئی نوں ووٹ دتا کہ اوہ (عمران خان ) اقتدار وچ آکے ایہناں دی تقدیر بدل دیاں گے، کپتان دی حکومت نے آندے ای سندھ، پنجاب، بلوچستان، گلگت بلتستان دے وڈے ضلعیاں دے سرکاری ہسپتالاں نوں خود مختار بنان لئی ایم ٹی آئی ایکٹ لاگو کرن دا اعلان کیتا اے جس اُتے محکمہ صحت دی نمائندہ تنظیماں نے شدید رد عمل دا اظہار کردے ہوئے ہسپتالاں وچ ہڑتال کیتی تے حکومت نے ایہناں صوبیاں وچ ایم ٹی آئی ایکٹ اُتے عملدرآمد روک دتا۔
2013ء وچ پی ٹی آئی دی حکومت کے پی کے وچ اقتدار وچ آئی تے خیبر پختونخواہ وچ ایم ٹی آئی آرڈیننس اُتے ورک کیتا گیا، تے 2015 وچ صوبہ دے کئی ہسپتالاں وچ پائلٹ پراجیکٹ دے طور اُتے ایس پراجیکٹ نوں لاگو کر دتا گیا، کے پی کے میں ہن ایم ٹی آئی دے اجرا توں ہن تیکر محکمہ صحت دی تنظیماں سراپا احتجاج نیں، حکومت ایس ایکٹ دے نفاذ نال جیہڑے نتائج برآمد کرنا چاہندی سی اوہ نہیں ہو سکے، ہن حکومت نے اسلام آباد دے تن وڈے ہسپتالاں، پاکستان انسٹی ٹیوٹ آف میڈیکل (پمز) ، پولی کلینک، نیشنل، انسٹی ٹیوٹ آف ری ہیبلیٹیشن وچ ایم ٹی آئی ایکٹ لاگو کر دتا اے جس اُتے اسلام آباد دے ڈاکٹرز تے محکمہ صحت دے اہلکار چھ ہفتیاں توں سراپا احتجاج نیں جد کہ حکومت نے ایس ایکٹ نوں آئندہ کجھ مہینے وچ پورے ملک دے ٹیچنگ سطح دے ہسپتالاں وچ مرحلہ وار لاگو کرن لئی پلان ترتیب دے لیا اے، ایسے طرح ایہہ سرکاری ہسپتال خود مختار ادارے ہو جان گے، جیہڑے ہسپتال وچ ہون والے اخراجات آپ پیدا کرن گے۔ ایم ٹی آئی ایکٹ دے تحت چلن والے ہر ہسپتال دے امور چلان لئی پنج رکنی بورڈ آف گورنر مقرر کیتے جان گے جنہاں وچ شعبہ صحت تے انتظامی تجربہ رکھن والے بندے شامل ہون گے۔ ایس آرڈیننس دے تحت سرکاری ہسپتالاں وچ آن والے مریضاں نوں پہلی شفٹ وچ ایمرجنسی تے او پی ڈی دی سہولت دن دو وجے تیکر مفت میسر ہوئے گی۔ شام دی شفٹ وچ ڈاکٹر ز فیس لے کے مریض چیک کرن گے، جد کہ سارے ٹیسٹ ہسپتالاں نال ہون گے تے ایہناں دی فیس وی ادا کرنی ہوئے گی جیہڑی موجودہ شرح توں کوئی گنا زیادہ ہوئے گی۔سرکاری ہسپتال دا کوئی ڈاکٹر پرائیویٹ پریکٹس نہیں کر سکے گا، پر سرکاری ہسپتال وچ دوجی شفٹ وچ ڈاکٹر نوں پریکٹس دی اجازت ہوئے گی، ڈاکٹر سرکاری ہسپتال وچ ہون والی آمدن توں خود مختار ہسپتال نوں حصہ دیوے گا۔ ایم ٹی آئی ایکٹ دے لاگو ہون دے بعد ہسپتال وچ کم کرن والے ملازمین بورڈ آف گورنر دے ماتحت ہون گے، ایہناں ملازماں نوں سروس سٹرکچر نہیں دتا جائے گا جس پاروں ایہناں ہسپتالاں دے ملازمین پنشن تے دیگر مراعات توں محروم ہو جان گے تاں ایہناں ملازماں دی تنخواہواں دوجے ہسپتالاں دے ملازمین توں زیادہ ہون گیاں۔
اسلام آباد دے تن ہسپتالاں وچ ایم ٹی آئی ایکٹ لاگو ہون تے دیگر ٹیچنگ ہسپتالاں وچ جلد لاگو ہون دی خبر اُتے ڈاکٹرز تے ہسپتالاں دے عملے وچ تشویش پائی جا رہی اے تے محکمہ صحت دی نمائندہ تنظیماں اسلام آباد دے ہسپتالاں وچ ایم ٹی آئی ایکٹ لاگو ہون اُتے احتجاج کر رہی اے جس پاروں اسلام آباد دے ہسپتالاں وچ علاج معالجہ دا نظام ٹھپ ہو کے رہ گیا اے تے مریض سسک رہے نیں جد کہ پنجاب تے دیگر صوبیاں وچ محکمہ صحت دی تنظیماں احتجاج لئی لائحہ عمل مرتب کر رہی اے جس دا اعلان ہفتہ رواں وچ متوقع اے چونکہ محکمہ صحت دی نمائندہ تنظیماں دے ذمہ داران دا کہنا اے کہ ایم ٹی آئی ایکٹ سرکاری ہسپتالاں دے ملازمین دے سر اُتے تولار ہوئے گا ایک ایکٹ نال ریگولر ملازمین بورڈ آف گورنر دے ماتحت ہو کے پنشن تے دیگر مراعات توں محروم ہو جان گے جنہوں کسے وی صورت قبول نہیں کیتا جائے گا۔
جناب کپتان عوام سوال کر رہے نیں کہ تسیں اقتدار وچ آ کے علاج معالجے دی سہولتاں شہر توں ودھا کے پنڈ دے علاقیاں وچ مفت فراہم کرن دا اعلان کیتا سی پر ایہہ تے ایس دے الٹ ہو رہیا اے، کپتان جی ایم ٹی آئی ایکٹ دے نفاذ نال سرکاری ہسپتال پرائیویٹ دی صورت اختیار کر جان گے تے علاج معالجے دی سہولت غریب عوام دی پہنچ توں دور ہو جائے گی ایس لئی ہسپتالاں نوں پرائیویٹ کرن دی بجائے ہسپتال وچ طبی سہولتاں دا فقدان دور کیتا جائے تاں جے عوام نوں طبی سہولتاں میسر آن نہیں تے کپتان جی عوام پہلے وانگوں سسک سسک کے مردے رہن گے تے تہاڈے وعدے وی پچھلی حکومتاں وانگوں ’’نعرہ ‘‘ ای ثابت ہوئے گا۔
