پاکستان نوں جغرافیائی خدوخال پاروں نظر انداز نہیں کیتا جا سکدا: وزیر خارجہ
اسلام آباد( پنجابی میڈیا گروپ) وزیر خارجہ شاہ محمود قریشی کہندے نیں پاکستان نوں اوہدے جغرافیائی خدوخال تے جغرافیائی معاشی حیثیت پاروں نظر انداز نہیں کیتا جا سکدا۔ امریکا دے نویں صدر جوبائیڈن جنوبی ایشیائی خطے تے پاکستان دے حوالے نال واضح رائے رکھدے نیں، اوہ ماضی وچ امریکی فارن ریلیشنز کمیٹی دے متحرک تے فعال رکن سن، اوس ویلے جدوں وہ پاکستان تشریف لیائے تے میں اوہناں دا خیرمقدم کیتا سی۔ وزیر خارجہ آکھیا ترجیحات دے حوالے نال پاکستان تے امریکا دے نکتہ نظر وچ مماثلت وکھائی دیندی اے، افغانستان دے حوالے نال ساڈے نکتہ نظر وچ مطابقت اے، دوواں ملکاں وچکار آبادی، نوجواناں دے تناسب تے معاشی امکانات دے حوالے نال دوطرفہ تعاون دے فروغ دے بہت سارے مواقع موجود نیں، نویں امریکی انتظامیہ دا چین دے نال رویہ محاذ آرائی دا نہیں سگوں مسابقت دا اے، اسیں پاک چین اقتصادی راہداری دے تحت قائم خصوصی اقتصادی زونز وچ امریکی سرمایہ کاراں نوں خوش آمدید کہواں گے۔شاہ محمود قریشی دا کہنا سی مقبوضہ جموں و کشمیر وچ انسانی حقوق دے حوالے نال صورتحال انتہائی تشویشناک اے۔خوش آئند گل ایہہ اے کہ نویں امریکی انتظامیہ دا انسانی حقوق دے تحفظ دے حوالے نال واضح موقف اے۔





















