‘‘ندیم افضل چن مستعفی’’

ذرائع دے مطابق آپ پہلے ای کجھ وزراء دے رویاں توں ناراض سن

تحریر: اکرم عامر سرگودھا

ایس نے سانحہ مچھ اُتے کجھ سطراں دے ٹویٹ وچ جس دی تحریر کجھ انج سی ’’اے بے یارو مددگار مزدوروں کی لاشو میں شرمندہ ہوں‘‘ وچ ہزارہ دے شہداء نال اظہار افسوس کیتا بالکل ایسے طرح جس طرح پوری قوم ہزارہ دے شہداء نال تعزیت کر رہی سی۔ ندیم افضل چن نے وی کجھ وزراء تے معاونین خصوصی وانگوں وزیراعظم عمران خان نوں شہداء دے ورثاء دے ہاں فوری جا کے تعزیت کرن دا مشورہ دتا سی تے کپتان نے انج کرن دی بجائے ایہناں وزراء دی گل اُتے عمل کیتا جیہڑا سیاست وچ مفاہمت تے مشکل ویلے وچ مسئلے دا حل کڈن دی بجائے تصادم دی سیاست دے قائل نیں۔ تاثر ایہہ دتا گیا کہ وزیراعظم عمران خان دے ہزارہ دے شہداء دی تدفین توں پہلے ایہناں دے کول جانا کپتان لئی نیک شگون نہیں ہوئے گا عوام دی اکثریت ایس نوں تے ہم پرستی قرار دے رہی اے پر ندیم افضل چن نے اپنے ضمیر دے مطابق ٹویٹ دے الفاظ لکھے جس اُتے اوہ مطمئن سی۔ اوہ ’’جیالا‘‘ سی، پیپلز پارٹی وچ ایہنوں قدر دی نگاہ نال ویکھیا جاندا سی۔ سیاسی جماعتاں دے قائدین و کارکنان ایہنوں عزت و احترام دی نگاہ نال ویکھدے نیں کیوں جے اوہ تنقید برائے تنقید دا عادی نہیں، بلکہ تنقید برائے اصلاح دی سیاست اُتے عمل پیرا اے۔ اوہ سیاست وچ جمہوریت دی بقا لئی کم کرن والا محنتی کارکن اے۔ اقتدار وچ ہوئے یا اپوزیشن وچ ایس نے جمہوریت دی گڈی نوں منزل ول رواں دواں رکھن لئی فیول دی تھاں خون جگر دے کے ہر دور وچ اپنا کردار ادا کیتا اوہ تحمل مزاج، زیرک سیاست دان اے جیہڑا مشکل ویلے وچ اپنی قیادت تے دوستاں نال نبھا کرنا خوب جان دا اے، ایس دے پورے خاندان وچ سیاست دے منجھے ہوئے لوک موجود نیں ایہناں وچ کھلاڑی وی نیں تے جیالے وی۔ ایہناں دے والد حاجی محمد افضل چن صوبائی وزیر ، ماموں نذر محمد گوندل وفاقی وزیر، بھائی وسیم افضل چن، ایم پی اے رہے۔ دوجے بھرا گلریز چن ہن وی پی ٹی آئی دے منڈی بہاوالدین توں ایم پی اے نیں۔ اوہ 2008ء توں 2013 تیکر ایم این تے چیئر مین پبلک اکائونٹس کمیٹی قومی اسمبلی رہے، اوہ سیاست دے نشیب و فراز توں بخوبی واقف نیں ایس دی رشتہ داریاں وی سیاسی گھرانیاں وچ نیں۔
ایہہ 2018 دے وسط دی گل اے جدوں کپتان عمران خان ایس جیالے ورکر نوں پی ٹی آئی وچ شامل کران لئی ایہناں دے آبائی پنڈ پنڈ مکو آئے، جتھے وڈا جلسہ ہویا، ایس ویلے پی ٹی آئی دے سربراہ نے کہیا سی کہ اوہ (عمران خان) خوش قسمت اے کہ ایہناں دی سیاسی ٹیم وچ اک ’’ہیرا ‘‘ دا وادھا ہویا اے۔ پی ٹی آئی کپتان نے ایس ویلے ندیم افضل چن تے ایس دے سیاسی خاندان دی شان بارے بوہت کجھ کہیا سی تے ایس دا جذبہ پہلے توں مضبوط ہو چکیا سی، اوہ اپنے حلقہ دے عوام لئی بوہت کجھ کرنا چاہندا، پی ٹی آئی دے زیرک کھلاڑی ندیم افضل چن دے ٹیلنٹ نوں بخوبی جان دے سن، ایسے بنا اُتے کپتان نے اقتدار وچ آ کے ایہنوں اپنا معاون خصوصی سیاسی امور بنایا، اوہ اپنے عہدے نال انصاف کر رہیا سی تے کپتان اُتے برسن والی اپوزیشن نوں دلائل نال زیر کردا رہیا کہ مچھ سانحہ پیش آ گیا، اوہ شیشے دے محل وچ بہہ کے سیاست وچ نہیں آیا سی، ایس نے جدوں ہوش سنبھالیا تے ایس دا پورا خاندان ملکی سیاست وچ اہم رول ادا کر رہیا سی، عوامی نمائندہ ہون دی حیثیت نال ایس نے سانحہ مچھ اُتے عوامی جذبات دی ترجمانی دا ٹویٹ کیتا، تے کپتان نوں عوامی مشورہ دتا کہ اوہ فوری طور اُتے سانحہ مچھ دے شہداء نال جا کے ملن تے ایہناں دے دکھ نوں بطور وزیراعظم اپنا دکھ سمجھن، ذرائع کہندے نیں کہ اوہ پہلے ای کجھ وزراء دے رویاں توں ناراض سی کیوں جے ہن دی وار اقتدار وچ ہون دے باوجود ندیم افضل چن دے حلقے دے عوام دے کم ایس تواتر نال نہیں ہو رہے سن جیہڑے ماضی وچ اقتدار دے دوران ہوئے جس اُتے اوہ اپنے ضمیر دے مطابق پورا نہیں اتر رہے سن۔ حلقہ دے عوام دا وی ندیم ا فضل چن اُتے دبائو سی کیوں جے بطور معاون خصوصی وزیراعظم عوام ایس توں بوہت ساری توقعات امیداں رکھے ہوئے سن، اوہ گاہے بگاہے کپتان نوں سرگودھا دی تحصیل بھوال نوں ضلع بنان دا وعدہ وی یاد دلاندا سی، جس اُتے وزیراعظم مسلسل ٹال مٹول نال کم لے رہے سن۔ ذرائع دے مطابق پارٹی دے وزراء و معاونین دے اجلاس وچ کپتان نے کہیا سی کہ جیہڑا ایہناں (کپتان) دی پالیسی توں اختلاف رکھدا اے تے مستعفی ہو جائے تے ندیم افضل چن نے ایس گل نوں ضمیر اُتے بوجھ سمجھیا تے اپنا استعفیٰ وزیراعظم نوں بھجوا کے سرکاری مراعات واپس کر کے آپ بوریا بستر سمیٹ کے اپنے حلقہ یاراں وچ واپس آ گیا۔
کوئی وی حکومت، ایوان ہوئے یا فورم اوہ حق گل کہہ گزردے تے ایس اُتے ڈٹ جاندے نیں، کوئی وی پارٹی برسر اقتدار ہوئے اوہ اپنے حلقہ دے عوام دے مسائل حل کران دی جدوجہد وچ مصروف دکھائی دیندا اے، موصوف عہدہ، رتبہ، اقتدار نوں پس پشت پا کے ہر دور دے حاکماں توں ببانگ دہل اپنے حلقہ دے عوام لئی ایہناں دا حق منگ دا اے۔ اوہ ملکی سیاست وچ شرافت دا علمبردار تے جمہوری اقدار نوں پروان چڑھان والا سپاہی اے، اوہ اصولاں دی سیاست دا قائل تے انتقامی سیاست توں نفرت کردا اے۔ موصوف نے ہمیشہ فرنٹ لائن اُتے سیاست دا کھیڈ کھیڈیا، منڈی بہائوالدین نال تعلق ہون دے باوجود اوہ سرگودھا دے حلقہ 88 توں الیکشن لڑدا آ رہیا اے کیوں جے اوہ عوامی خدمت دا قائل تے ہمہ وقت حلقہ تے ضلع دے عوام نال رابطہ وچ رہندا تے ہن وی اے۔ اوہ جاذب، ملنسار تے ورکر شخصیت ہون دی بنا اُتے 2008 وچ منڈی بہاوالدین نوں چھڈ کے سرگودھا دی ایس حلقے توں الیکشن لڑ کے 8 ہزار ووٹاں دی لیڈ نال ایم این اے بنیا تے اوہ 2008ء توں 2013ء تیکر قومی اسمبلی وچ چیئر مین پبلک اکائونٹس کمیٹی اُتے ملک و قوم دی خدمت وچ پیش پیش رہیا۔ تے ایس نے اپنے عہدے نال خوب انصاف کردے ہوئے (پی اے سی) وچ اہم فیصلے کیتے جیہڑے سیاسی تاریخ وچ ہمیشہ ایہناں دے ناں نال منسوب رہن گے۔
وزیراعظم عمران خان نے ندیم افضل چن دا استعفیٰ خلاف توقع منظور کیتا، حالانکہ وزیراعظم نوں کئی وزراء و معاونین خصوصی نے مشورہ دتا سی کہ اوہ ندیم افضل چن دا استعفیٰ مسترد کر دین کیوں جے انج کارکن پارٹیاں دا قیمتی اثاثہ ہوندے نیں پر کپتان وی تے اکھڑ نیں۔ سو ندیم افضل نے عہدہ توں استعفیٰ دتا جنہوں منظور کیتا گیا تے سیاسی حلقیاں، الیکٹرانک، پرنٹ و سوشل میڈیا اُتے نویں بحث چھڑ گئی، کوئی کہہ رہیا اے کہ ندیم افضل چن کھلاڑی توں جیالا یا متوالا بنن جا رہے نیں تے کوئی کہندا اے کہ اوہ (ندیم افضل چن) تا وقت موجودہ حکومت چپ رہن گے تے آئندہ انتخاب تیکر اوہ کوئی فیصلہ کرن گے، ایہہ وی کہیا گیا کہ اوہ آئندہ آزاد الیکشن لڑن گے۔
تاں بادی النظر وچ ندیم افضل معاون خصوصی دے عہدہ توں مستعفی ہوئے نیں۔ پی ٹی آئی دی بنیادی رکنیت توں نہین؟ اوہ ہن وی پی ٹی آئی وچ نیں، جس دی مثال گورنر پنجاب چوہدری سرور دے دورہ منڈی بہائوالدین تے دورہ سرگودھا دے موقعے اُتے ویکھن وچ آئی، ہر دو مقام اُتے ایہناں دا استقبال کرن والیاں وچ بطور پی ٹی آئی ورکر ندیم افضل چن پیش پیش رہے، کیوں جے اوہ اصول تے اپنے کسے جمہوری موقف اُتے سمجھوتہ نہیں کردے، خواہ ایہناں دے ساہمنے کنہی ای طاقتور شخصیت کیوں نہ ہوئے ایس لئی ایس نے حکومتی عہدہ توں استعفیٰ دتا اے بطور پارٹی ورکر اپنے حلقہ دے عوام خاص طور تے پی ٹی آئی ورکراں دے جھرمٹ وچ ایہناں دے کم کروان لئی متحرک نظر آ رہیا اے۔ آخر وچ ندیم افضل چن دے مشہور زمانہ ڈائیلاگ دے نال اجازت چاہنا واں۔ ’’ مختاریا مر جانی دیا اپنا استعفی قبول ہو گیا ای تے حکومت نے وی دس دتا ای‘‘۔