موبائل سگنلز نہ آن دا معاملہ واقعی سنجیدہ اے، میرے گھر وچ وی بعض اوقات سگنلز نہیں آئوندے : چیف جسٹس

لہور (سٹی رپورٹر) لہور ہائیکورٹ نے پنجاب بھر وچ موبائل سروس سگنلز نہ آن دے خلاف درخواست اتے وفاقی سرکار تے موبائل کمپنیاں کولوں جواب طلب کرلیا۔ چیف جسٹس لہور ہائیکورٹ جسٹس محمد قاسم خان نے جوڈیشل ایکٹوازم پینل دی درخواست اتے سماعت کیتی ۔ چیف جسٹس قاسم خان نے ریمارکس دتے نیں کہ موبائل سگنلز نہ آن دا معاملہ واقعی سنجیدہ اے، میرے گھر وچ وی بعض اوقات سگنلز نہیں آئوندے۔درخواست گزار نے موقف اپنا کہ پی ٹی اے نے موبائل فون کمپنیاں نوں سگنلز کوالٹی چنگی بنان دا حکم دین دی بجائے ٹال دتا۔ پی ٹی اے نے آکھیا اے کہ کسی دوجی موبائل کمپنی دے نال سروس حاصل کرلین۔ ہسپتالاں سنے دیگر پبلک مقامات اتے موبائل فون دے سگنلز نہیں آئوندے موبائل فون کمپنیاں صارفین کولوں بوہت وڈیاں رقوم اکٹھیاں کر دیاں نیں پر صارفین نوں سہولیات فراہم کرن وچ نکام نیں۔ عدالت دے نال استدعا اے کہ عدالت موبائل فون کمپنیاں نوں جدید آلات استعمال کرن دا حکم دین ۔

اپنا تبصرہ گھلو