قوم دا لٹیا پیسہ واپس کر دین تے میں استعفیٰ دین نوں تیار آں: وزیر اعظم
اسلام آباد( پنجابی میڈیا گروپ) وزیراعظم عمران خان نے اپوزیشن نوں وڈی پیشکش کردیاں آکھیا اے جے اوہناں دے لیڈر قوم دا لٹیا ہویا پیسہ واپس کر دین تے میں اپنا استعفیٰ دین نوں تیار آں۔وزیراعظم نے ایہ گل کابینہ دے اجلاس وچ آکھی۔ کابینہ اجلاس وچ اپوزیشن دے استعفیاں دی ڈیڈ لائن ختم ہون دے ذکر تے وزیراعظم نے اپنے استعفے دی پیشکش کردیاں آکھیا کہ اوہناں دے رہنما قوم دا لٹیا ہویا پیسہ واپس کرن، میں استعفیٰ دین نوں تیار آں۔ نوازشریف، زرداری تے فضل الرحمان ملک دا لٹیا پیسہ واپس کرن۔ وزیراعظم دا کہنا سی استعفے دین لئی ہمت تے جرات چاہیدی اے جہڑی ایہناں وچ نہیں، جے ایہناں وچ استعفے دین دی ہمت ہوندی تے این آر او کرکے ملک توں نہیں بھجدے۔ اوہناں دا کہنا سی اپوزیشن نے لانگ مارچ کیتا نہ لوکاں نوں اکٹھا کر سکی۔ پوری حیاتی جھوٹے وعدے کیتے تے ایس وار وی استعفیاں دا جھوٹھ بولیا۔ استعفے دین لئی اخلاقی جرات تے کردار دی لوڑ ہوندی اے۔





















