‘‘لانگ مارچ اپوزیشن دا کڑا امتحان’’

تحریر اکرم عامر سرگودھا

اپوزیشن ولوں کپتان تے ایس دی کابینہ دے کھلاڑیاں نوں دتی جان والی ڈیڈ لائن لنگھ چکی اے پر حکومت دا کوئی مہرہ مستعفی نہیں ہویا، پر توجہ طلب گل ایہہ وے کہ پی ڈی ایم دے سربراہ مولانا فضل الرحمان ، ضمنی و سینٹ انتخابات دے بائیکاٹ، اپوزیشن جماعتاں دے ارکان اسمبلی دے پی ڈی ایم دے پلیٹ فارم توں مشترکہ استعفے دین دی طرح اسلام آباد لانگ مارچ دی تاریخ دا اعلان وی مقررہ تاریخ اُتے نہیں کر پائے، لگدا اے ، اپوزیشن نوں ضمنی و سینٹ انتخاب، تے ارکان اسمبلی دے استعفیاں وانگوں لانگ مارچ دے اعلان اُتے وی پچھے ہٹنا پئے گا کیوں جے پیپلز پارٹی دے بلاول بھٹو زرداری، لانگ مارچ وچ شمولیت نہ کرن دا عندیہ دے چکے نیں تے مریم نواز ولوں بلاول دے اعلان دی حمایت دا امکان اے کیوں جے ماضی وچ بلاول بھٹو زرداری نے ضمنی تے سینٹ الیکشن لڑن دا اعلان کیتا تے مریم نواز نوں وی باامر مجبوری انج ای کرنا پیا، ہن مولانا فضل الرحمان بظاہر لانگ مارچ دی تاریخ دا اعلان کرن لئی اپوزیشن جماعتاں دی قیادت اُتے زور دے رہے نیں پر مسلم لیگ ن تے پیپلز پارٹی ضمنی انتخابات اُتے توجہ مرکوز کیتے ہوئے نیں تے جے ضمنی الیکشن وچ مسلم لیگ یا پیپلز پارٹی دے امیدواراں نوں خاطر خواہ کامیابی مل گئی تے فیر مولانا فضل الرحمان دا اسلام آباد لانگ مارچ دیوانے دا خواب ثابت ہوئے گا، کیوں جے مسلم لیگ ن دی مریم نواز واضح کہہ چکی اے کہ ضمنی انتخابات وچ کامیابی دی صورت وچ اسلام آباد لانگ مارچ دی لوڑ نہیں؟ ایہہ تے اے اپوزیشن دی اندرونی دی کہانی جیہڑی ایہہ وی واضح کردی اے کہ پی ڈی ایم وچ شامل دو وڈی جماعتاں وچ دوریاں دن بدن ودھ رہیاں نیں تے براڈ شیٹ معاملے وچ شامل بندیاں وچ ایہناں دونواں جماعتاں دی قیادت نمایاں اے جیہڑی احتساب ریفرنسز دی طرح براڈ شیٹ اُتے وی عوام نوں صفائیاں دے رہی اے تے کہہ رہی اے کہ ایہناں دا براڈ شیٹ معاملے نال کوئی تعلق نہیں مسلم لیگ ن دے سابق وزیراعظم شاہد خاقان عباسی، مریم نواز شریف، پیپلز پارٹی دے بلاول بھٹو زرداری تے کئی دیگر قائدین ببانگ دہل کہہ رہے نیں کہ پی ٹی آئی دی ناکام قیادت بالخصوص کپتان اپوزیشن دے خلاف انتقامی کاروائیاں کروا رہے نیں اوہ ایہہ وی کہندے نیں کہ اسیں ایہناں انتقامی کاروائیاں توں ڈرن والے نہیں، حکومت دے ہر وار دا ڈٹ کے مقابلہ کراں گے تے ایہنوں ٹف ٹائم دیاں گے تے ہر صورت کپتان دی حکومت نوں گھر گھلاواں گے پر ویلا لنگھن دے نال اپوزیشن حکومت نوں ٹف ٹائم دین دی بجائے آپ بکھردی نظر آ رہی اے۔ ایہو وجہ اے کہ اپوزیشن نوں اپنے ہر احتجاجی اعلان اُتے یوٹرن لینا پئے رہیا اے۔

ہن اسلام آباد لانگ مارچ دی ڈیڈ لائن دا ویلا آ چکیا اے کہ مریم نواز تے بلاول جنہاں دی جماعتاں پی ڈی ایم دی اہم اتحادی نیں مولانا فضل الرحمان توں دور ہوندیاں نظر آ رہیاں نیں پر مولانا فضل الرحمان جنہاں دی اپنی جماعت جمعیت علمائے اسلام وچوں جیدراہنما مولانا شیرانی دی قیادت وچ الگ جمعیت علمائے اسلام وجود وچ آ چکی اے پر مولانا فضل الرحمن ہن وی پرعزم نیں تے کہہ رہے نیں کہ اوہ اپنے پتے سوچ سمجھ کے کھیڈ رہے نیں۔ بقول مولانا فضل الرحمان اپوزیشن ارکان اسمبلیز پی ڈی ایم دے پلیٹ فارم توں استعفے وی دین گے تے لانگ مارچ وی ہوئے گا؟ دوجے پاسے وفاقی وزیر داخلہ پاکستان شیخ رشید احمد جنہاں دے خیالات اپوزیشن دے بارے ضمنی تے سینٹ انتخابات وچ حصہ لین تے ارکان اسمبلیاں دے استعفیاں دے حوالے نال ثابت ہو چکے نیں، ہن شیخ رشید نے وڈا دعویٰ کیتا اے کہ اپوزیشن لانگ مارچ نہیں کرے گی، جے اپوزیشن لانگ مارچ کر کے اسلام آباد آئے گی تے ایہناں دا استقبال کراں گے ایتھے سوال ایہہ پیدا ہوندا اے کہ جے اپوزیشن لانگ مارچ کردی اے جس دا چانس آٹے وچ لون دے برابر اے تے کیہ ایہناں دا استقبال وی ایسے طرح کیتا جائے گا جس طرح اپنے حق لئی احتجاج کرن والے اساتذہ، ایم ٹی آئی ایکٹ اُتے احتجاج کرن والے ینگ ڈاکٹرز تے کنٹریکٹ اُتے کم کرن والی لیڈی ہیلتھ ورکرز تے دیگر احتجاجی ملازمین دا کیتا گیا سی۔ لگدا اے شاید اپوزیشن ایہناں استقبالاں نوں بخوبی بھانپ چکی اے تے ایسے وجہ نال لانگ مارچ دا اعلان کرن توں پہلے سارے پہلوئواں اُتے سوچ بچار کر رہی اے۔ موجودہ حالات وچ لگدا انج اے کہ اپوزیشن دی ہر جماعت ایہہ چاہندی اے کہ قربانی دوجی جماعت دے کارکن دین تے فائدہ ایہناں دی جماعت چکے۔
سو گل کتھوں کتھے نکل گئی گل ہو رہی سی اپوزیشن ولوں حکومت نوں دتی گئی 31 جنوری تیکر دی ڈیڈ لائن دی جیہڑی لنگھ چکی اے پر کپتان وی موجود نیں ایہناں دے کھلاڑی تے حکومت وی ، تاں کپتان نے اپوزیشن قائدین نوں مشروط پیشکش کیتی اے کہ اوہ قوم دی لُٹی ہوئی دولت واپس قومی خزانے وچ جمع کرا دین تے اوہ (کپتان) فوری طور اُتے مستعفی ہو جان گے، کپتان نے ایہہ پیشکش کر کے گھاٹے دا سودا نہیں کیتا کیوں جے ہر برسر اقتدار آن والی سیاسی جماعت نے ملکی خزانے نوں بے دردی نال لٹ کے اپنی تجوریاں بھریاں نیں ایس بنا اُتے ملک دیوالیہ ہون دے نیڑے اے تے ملک دے سربراہ در در پھر کے ملک چلان لئی قرضہ منگ رہے نیں جے کپتان دی مشروط شرط من کے اپوزیشن دی قیادت اپنے ذمہ رقم وچوں ادھی رقم وی واپس کر دیندی اے تے نہ صرف ملک دا قرضہ اتر جائے گا بلکہ پاکستان ترقی دی نویں راہ اُتے گامزن ہو جائے گا، کپتان دے ایس بیان اُتے اپوزیشن نے چپ سادھ لئی اے ویکھنا ایہہ وے کہ ہن اپوزیشن کپتان دی دتی گئی آفر اُتے عمل کردی اے یا فیر پی ڈی ایم دے سربراہ مولانا فضل الرحمان اسلام آباد لانگ مارچ دا اعلان کردے نیں تے حکومت آن والے ویلے وچ ایس لانگ مارچ نوں روکن لئی کیہ حکمت عملی اختیار کردی اے، ایہہ فیصلہ آن والا ویلا کرے گا۔