براڈشیٹ دی تھیلی
لكهت: صوفیہ بیدار
بادشاہت دے ٹُٹدے برجاں دے چھیتی بعد جمہوریت دے فلسفے نے طاقت نوں لوکاں تے حقیقی اسلحہ بردار طاقتاں وچ ونڈ دتا۔ فلسفے نے نعریاں‘ لکھتاں تے تقریراں دی حد تک بڑی پذیرائی کھٹی پر ’’طاقت‘‘ ای اوہ واحد عنصر اے جہدی ونڈ گھراں توں لے کے ایواناں تک کدھرے نہیں منی جاندی… بظاہر حلف بردار تقریباں تے صدر‘ وزرائے اعظم دی چھڑی بردار جرنیلاں دے نال 30سیکنڈ دی ملاقاتی ویڈیوز دا جاری ہونا سنے ایس کیپشن دے کہ اسیں اک پیج تے آں جہڑا بجائے خود اک مضحکہ خیزی وچ کنبدا ہویا جملہ اے بندہ پچھے تسیں اپنے اپنے کم کرو اک پیج دی کیہ لوڑ‘ ایس خیال نوں ہر ویلے پکا کیتا جاندا اے کہ عسکری طاقت ساڈے نال اے۔ خبردار ہشیار… بالکل ایس طرح حکومت کیتی جاندی اے کہ جیویں سرکاری ملازم اٹھ گھنٹے نوکری تے سولاں گھنٹے اوہنوں پکی کرن وچ گزاردے نیں۔ جدوں ایہ طے ہو گیا کہ کنگلے لوکاں نوں تخت و تاج تے سجا دتا جاندا اے اجہی سربراہی دتی جاندی اے جہدا نہ عوامی سربراہ نوں یقین آئوندا اے تے نہ ای بخشن والے دا دل مطمئن ہوندا اے ہر ویلے آنیاں جانیاں تے نظر رکھی جاندی اے۔ سیاستداناں نوں لڑایا جاندا اے طاقت ور نوں کدی وی بیان بازی تے نچلے درجے دی سازش کرن دی لوڑ نہیں ہوندی۔ قسماں ماڑے لوک کھاندے نیں جد کہ طاقتور ’’ڈب‘‘ وچ بنھی پستول دا صرف درشن کراندے نیں۔ ویلے دے نال نال اک دوجے نوں ذلیل کرن دے طریقے وی بدل چکے نیں۔ ’’پھپھے کٹنی‘‘ والی ذمہ داری دنیا بھر دیاں مستند کمپنیاں نے اٹھا رکھی اے سیاستداناں دی اخلاقی‘ کرداری تے اقتصادی کمزوریاں سنے ثبوت لبھنا ڈیٹے مرتب کرنا تے فیر تریجی دنیا دے ملکاں دے مقتدر اداریاں نوں ویچنا تے اوہدا معاوضہ وی اوہناں مظلوماں توں دوانا جہناں دے خلاف ایہ ثبوت اکٹھے کیتے گئے ہوندے نیں دورحاضر دا سب توں منافع بخش کاروبار اے۔ 1999ء وچ جدوں سیاسی شاخسانے دے نتیجے وچ کجھ سرکردہ لوکاں نوں نوکری توں کڈھیا گیا تے اوہناں نے اقتصادی بے ایمانیاں دا ڈیٹا اکٹھا کرن والے ’’موسوی‘‘ نال ملاقات دا پربندھ کرایا۔
جنرل مشرف نوں اوس ویلے دے اکابرین وچ طارق عزیز تے جنرل ندیم امجد تے ایناں اعتماد سی کہ طارق عزیز نوں تے پرنسپل سیکرٹری دی خاص حیثیت حاصل سی فواد ملک دا غصہ سیاستداناں نوں اوس صورت لے ڈبیا کہ مشرف نے براڈشیٹ مینجمنٹ نال ملاقات دی آمادگی ظاہر کرکے معاہدے دی تیاری دا اشارا دے دتا ایہ معاہدہ دنیا دے مضحکہ خیز ترین معاہدیاں وچ انج وی شمار کیتا جا سکدا اے کہ کیساں دی صرف نشاندہی تے وصولی رقم دے بناں ای ایس کمپنی دا ویہہ فیصد معاوضہ طے ہوندا تے نہ صرف ایہ کیس سگوں نیب وچ اپڑن والے کیساں وچ وی براڈشیٹ دا حصہ یقینی ہوندا۔ اوس ویلے دے پراسیکیوٹر جنرل نیب شیخ عظمت سعید تے ایسے لئی مسلم لیگ (ن) پٹ رہی اے کہ ایہ کیویں ممکن اے جہڑا ایس معاملے دا حصہ اے اوہنوں اوہدا سربراہ بنا دتا جاوے سس بہو دی لڑائی دا فیصلہ سوہرا یاں کوئی ہور بزرگ تے کر سکدا اے پر دوویں فریق نہیں۔ بعد وچ جنرل مشرف نے پینترا بدلیا تے ماڑی جہی سیاسی جمہوری حکومت تشکیل دے دتی اجہی So called جمہوری حکومت جو سارا عرصہ جنرل مشرف نوں سو ورھے وردی وچ ویکھن دی خواہش مند سی۔ قربان جائیے ایسی جمہوریت تے‘ مشرف دی موسوی تے براڈشیٹ وچ دلچسپی تے ایس وجہ توں ختم ہو گئی نوازشریف تے بینظیر باہرگھل دتے گئے باقی اوہناں نوں باوردی ویکھن دے خواہش مند ہتھاں وچ دف پھڑ کے ڈفلی وجا رہے سن ’’جگ جگ جیو مشرف پیارے‘‘ مشرف گانے گا رہے سن نچ رہے سن اوہ مُکے لہراندے تے سیاستداناں دے حوالے نال معروف جملہ کہندے Oh i am above all these ایہناں نوں براڈشیٹ معاہدے دی لوڑ پیندی‘ طاقتور سیاستداناں دے سامنے جد کہ سامنے پرویزالٰہی اینڈ کمپنی سی سگوں اوہناں دیہاڑیاں اک لطیفہ وی چلیا کہ 90شاہراہ دے دفتر نوں بدل دتا جاوے کہ اوہ سڑک نال اے لوک ہسدے کہ ’’ماں صدقے تہانوں کنہے مارنا‘‘ ایہ خطرے تے سچ مچ دے لیڈراں لئی ہوندے نیں ایس لئی مشرف نے وی اجہے ’’غیرت مند‘‘ سیاستداناں لئی براڈشیٹ توں جانکاری لین دی کوئی لوڑ نہ محسوس کردے ہوئے براڈشیٹ توں لاتعلقی تے معاہدہ ختم کرن دا اشارا دتا پر موسوی نوں تے چسکا پے چکیا سی تے دوجیاں قوتاں جو بھاگے داری چاہندیاں سن اوہ معاوضہ دوان تے اڑ گئیاں۔ ہن طاقتور مشرف کہوے کہ سانوں انج دے پیراں وچ پئے ہوئے ماڑیاں دیاں چغلیاں نہیں چاہیدیاں اوہ وی اینے بھاری معاوضے تے پر حصے دار کتھے رکدے‘ اجہے حالات وچ موسوی دی عمران خان نال ملاقات ہو گئی جہناں نے شہزاداکبر نال موصوف نوں ملوایا موسوی دا 39 ملین پائونڈ دا ویہہ فیصد معاوضہ جائیداداں وچ وی پا کے مطالبہ دہرا دتا بقول موسوی دی پریس کانفرنس شہزاد اکبر دا منگیا ہویا حصہ تے دوجیاں قوتاں دی پرسنٹیج دا ڈھیر رولا پایا موسوی جہدا کم ای لوکاں دے راز اکٹھے کرنا تے اوہناں نوں ویچنا اے اوہنے جا کے ملاقاتاں کرن والے پردہ نشیناں نوں کیویں بخشنا سی‘ جد کہ ایہ ’’کٹا‘‘ کھل کے ’’بیلے‘‘ وچ نچ رہیا اے تے حکومت پاکستان نے ایہ چوکھی رقم اسمبلی وچ فیصلہ کرکے بھر دتی اے۔
وزیراعظم دے رائے منگن تے اسمبلی دے کرداراں نے اوکے کیتا ایہنوں کہندے نیں ’’اک ای تھیلی دے چٹے وٹے‘‘ ایہ لوک ٹرکاں تے انجوائے منٹ کردے نیں جد کہ مالی معاملیاں وچ اکٹھے ہو جاندے نیں پی ٹی آئی دی فارن فنڈنگ نوں منی لانڈرنگ تے ہنڈی دے زمرے وچ آن دا اُکا ایہ مطلب نہیں وزیراعظم اوپن ہیئرنگ دا کہہ کے معاملے توں وکھ ہو جان تے نہ ای ایہ ایہدا حل اے اوہ شہزاداکبر نال ملاقاتاں موسوی دے بیان تے دوجے ثبوتاں دی روشنی وچ ہور ’’گند‘‘ نوں صاف کرن تے کدی کدائیں بقول کامران شاہد جہانگیرترین دے خلاف وی اک ادھ جملہ بول دیا کرو یاں فیر قنون بنا دیو ’’تہاڈی کرپشن کرپشن‘ ساڈی بس غلطی اے‘‘۔
قصر مختصر کہ عمران خان ٹائپ ہیرو لوک آخری ڈھلدی عمر والے تے والیاں دے فلمی ٹائپ ہیرو نیں جد کہ آن والی نسل کیلکولیشن کرے گی ددھ دا ددھ تے پانی دا پانی کوئی ایہناں جواباں نال دل نہیں بہلائے گا مراد سعید دی دو دو ارب والی تقریر تے ہن باقاعدہ لطیفیاں والی کتاب وچ شامل ہو چکی اے پی ٹی آئی لیڈر عندلیب دی جہڑی حالت جاویدچوہدری دے پروگرام وچ ہوندی جدوں جاوید چوہدری جاویدلطیف توں پچھدے نیں کہ تسیں اگے دے انتظام کیوں نہیں کر کے گئے تن چار سال بعد وی بجلی غایب نہ ہوندی‘ مہنگائی نہ ودھدی صرف الزام تراشی صرف پچھلی حکومت دا رونا کدوں تک نالائقی تے پردا پاوے گا۔٭٭
