حکومت،اپوزیشن تے ایپکا احتجاج

پی ڈی ایم سربراہ مولانا فضل الرحمن نے متفقہ طور اُتے 26 مارچ نوں اسلام آباد وچ لانگ مارچ دا اعلان کردتا اے

اکرم عامر سرگودھا

پی ٹی آئی حکومت تے اپوزیشن وچ آنکھ مچولی جاری اے، 2018ء وچ جدوں پی ٹی آئی دی حکومت تے عمران خان وزیراعظم بنے سن تے ایس دن توں ای اپوزیشن جماعتاں دی قیادت نے کپتان تے ایس دی کابینہ دے کھلاڑیاں نوں آڑے ہتھاں لیا ہویا اے،بالکل ایسے طرح جس طرح کپتان 2015ء توں 2018 دے شروع تیکر مسلم لیگ (ن) دی حکومت نوں آڑے ہتھاں لیندے رہے نیں، اپوزیشن موجودہ حکومت نوں سلیکٹڈ، دھاندلی زدہ قرار دے کے احتجاج دا راہ اپنائے ہوئے اے، جنہوں موثر بنان لئی ماضی وچ اک دوجے دی حریف تے آپس وچ دست و گریبان رہن والی جماعتاں نے پی ڈی ایم دی صورت وچ اتحاد وی کر لیا تے اپوزیشن پی ڈی ایم دے پلیٹ فارم توں کپتان دی حکومت نوں گران لئی دن رات کوشاں اے، اپوزیشن ولوں 31 جنوری تیکر کپتان تے کابینہ نوں استعفے دین دی ڈیڈ لائن گزرن اُتے کپتان نے اپوزیشن نوں کڑی پیشکش کیتی سی کہ اوہ (اپوزیشن قائدین) کرپشن دا لٹیا ہویا پیسہ واپس قومی خزانے وچ جمع کرا دین تے اوہ (کپتان) اگلے دن استعفیٰ دے دین گے یعنی
“نہ نو من تیل ہو گا اور نہ ہی رادھا ناچے گی”
اپوزیشن دی ڈیڈ لائن لنگھن اُتے کپتان ، کابینہ تے کھلاڑیاں ولوں اپوزیشن اُتے کڑی تنقید کیتی گئی سی تے کہیا گیا سی کہ اپوزیشن وچ دم خم نہیں رہیا، تے ایس دا شیرازہ کھلر چکیا اے۔ اپوزیشن نوں ضمنی و سینیٹ دے انتخابات تے اپوزیشن ارکان اسمبلی دے پی ڈی ایم دے پلیٹ فارم توں اکٹھے استعفے دین دے اعلان اُتے لئے گئے یوٹرن وانگوں اپوزیشن اسلام آباد لانگ مارچ اُتے وی یوٹرن لوے گی، حکومتی وزراء ہجے ایہہ شور کر ای رہے سن کہ اپوزیشن نے مشترکہ اجلاس دے بعد بقول پی ڈی ایم سربراہ مولانا فضل الرحمن متفقہ طور اُتے 26 مارچ نوں اسلام آباد وچ لانگ مارچ دا اعلان کرن دے نال ایہہ وی کہیا گیا اے کہ اپوزیشن 10 فروری نوں محکمہ جات دے سرکاری ملازمین (ایپکا) دے احتجاج وچ بھرپور شرکت کرے گی، اپوزیشن نے ارکان اسمبلیز دے استعفیاں، سندھ دے علاوہ دیگر صوبیاں دے وزراء اعلیٰ، کپتان، قومی و صوبائی اسمبلیاں دے سپیکرز ، ڈپٹی سپیکرز دے خلاف عدم اعتماد دے معاملے نوں سیکنڈ آپشن دے طور اُتے رکھیا اے تے کہیا اے کہ جے اسلام آباد لانگ مارچ نال حکومت نہ گرائی جا سکی تے ایہناں ہر دو آپشنز نوں مرحلہ وار استعمال کراں گے جے تحریک عدم اعتماد وچ کامیاب نہ ہوئے تے فیر اسمبلیاں توں اپوزیشن اراکین دے استعفیٰ دے آپشن نوں استعمال کیتا جائے گا، اپوزیشن نے لانگ مارچ نوں موثر بنان لئی مختلف شہراں دے ڈویژنل مقامات اُتے احتجاجی جلسے تے ریلیاں کڈن دے شیڈول دا اعلان کر دتا اے، اپوزیشن نے 10 فروری نوں کلرکاں(ایپکا) دے اسلام آباد دھرنے وچ شمولیت دا وی باقاعدہ اعلان کیتا اے پر ایس گل دی وضاحت نہیں کیتی گئی کہ سرکاری محکمیاں دے ملازمین دے لانگ مارچ و احتجاج وچ اپوزیشن دی صرف قیادت شرکت کرے گی یا کارکنان وی شامل ہون گے۔ ایس توں کجھ دن پہلاں 2 فروری نوں آل ایمپلائز گورنمنٹ فیڈریشن آف پاکستان نے مرکزی قیادت مرکزی صدر افضل جدون جنرل سیکرٹری خالد جاوید سنگیڑا دی کال اُتے ملک گیر احتجاج کیتا اے۔ پنجاب دی صوبائی قیادت صدر ظفر علی خان جنرل سیکرٹری طاہر علی شاہ دی کال اُتے پنجاب دے مختلف شہراں ملتان ، ساہیوال ،شیخو پورہ، فیصل آباد ،جھنگ توں علاوہ سرگودھا وچ چوہدری پرویز اختر، پاکپتن وچچیئرمین خدا بخش وٹو صدر محمد عتیق بٹ جنرل سیکرٹری زاہد گوہر سکھیرا دی قیادت وچ احتجاج کیتا گیا۔ ایپکا رہنمائواں دا کہنا اے کہ وطن عزیز وچ اج توں 20 سال پہلے کلرکاں دے جیہڑے حالات سن ایس دور جدید وچ وی مہنگائی دی وجہ نال اونج دے اونج ای نیں۔ ایس طبقے دے نال ہر آن والی حکومتاں نے ہمیشہ سوتیلیاں جہیا سلوک کیتا اے۔
جان دی امان پائواں تے اپوزیشن ولوں پورے ملک دے محکمیاں دے ملازمین دے دھرنے وچ شرکت دا اعلان کیتا اے جیہڑی بھیڑی گل نہیں کیوں جے ہر دور وچ برسر اقتدار حکومت دے خلاف عوامی احتجاجاں وچ اپوزیشن جماعتاں دے نمائندے شرکت کردے رہے نیں پر اپوزیشن دا موجودہ سرکاری ملازمین دے احتجاج تے لانگ مارچ شرکت کرنا نا صرف تعجب خیز بلکہ مضحکہ خیز لگدا اے کیوں جے سرکاری ملازمین دو دہائیاں توں ہر دور حکومت دے خلاف چارٹر آف ڈیمانڈ (اپنے مطالبات) لئی احتجاج کردے چلے آ رہے نیں، ایہناں وچ پیپلز پارٹی تے (ن) لیگ دے لنگھے ادوار وی شامل نیں، مسلم لیگ ن تے پیپلز پارٹی جیہڑی کہ پی ڈی ایم دی بڑی اتحادی جماعتاں نیں دی قیادت نوں چاہیدا سی کہ اوہ ایہناں (سرکاری ملازمین) دے مطالبات اپنے ادوار وچ ہون والے سرکاری ملازمین دے احتجاج دے ویلے جنہوں اوہ اپنے دور حکومت وچ غلط تے موجودہ حکومت دے دور وچ درست قرار دے رہے نیں نوں تسلیم کر کے سرخرو ہو جاندے تے نہ صرف لکھاں دی تعداد وچ کلرک تے ایہناں دے خاندان ایہناں نال راضی ہو کے ایہناں دی جماعتاں نوں انتخابات وچ سپورٹ کردے تے اج ن لیگ تے پیپلز پارٹی دی قیادت نوں ایہہ دن نہ ویکھنے پیندے تے نہ ایہناں جماعتاں دی قیادت نوں کجھ دن بعد ہون والے کلرکاں دے احتجاج وچ شرکت دی تکلیف چکنی پیندی۔
سو گل کتھوں کتھے نکل گئی، گل ہو رہی سی اپوزیشن دے لانگ مارچ دی تے ایس احتجاج لئی 26 مارچ دی تاریخ مقرر کیتی جا چکی اے پر اپوزیشن نے ہجے تیکر ایہہ واضح نہیں کیتا کہ ایہہ دھرنا پی ٹی آئی دے دھرنے وانگوں لمبی مدت دا ہوئے گا یا اک روزہ۔
دوجے پاسے کپتان تے ایس دے کھلاڑیاں نے اک وار فیر واضح کیتا اے کہ اپوزیشن دھرنا دیوے یا لانگ مارچ اوہ کسے صورت اپوزیشن دی کرپٹ قیادت نوں این آر او نہیں دین گے تے ایہناں توں لُٹی ہوئی قومی دولت ہر صورت برآمد کر کے قومی خزانے وچ جمع کروان گے ، حکومتی ارباب اختیار نے ایہہ وی واضح کیتا اے کہ اوہ لانگ مارچ دے شرکا دا اسلام آباد وچ استقبال کرن گے، حکومت نے اپوزیشن دے ممکنہ لانگ مارچ نوں ثبوتاژ کرن لئی حکمت عملی وی ترتیب دینا شروع کر دتی اے تاں ایہہ ویلا دسے گا کہ حکومت اپوزیشن دے لانگ مارچ دے شرکاء دا استقبال کس طرح کردی اے کیوں جے موجودہ حکومت دے دور وچ کساناں، ینگ ڈاکٹراں، استاداں، لیڈی ہیلتھ ورکراں، ریڈیو پاکستان دے برطرف ملازماں سنے اسلام آباد وچ دیگر احتجاج کرن والیاں دا حکومت ولوں استقبال کوئی قابل رشک نہیں سی۔ بہرحال ایہہ گل عیاں ہو چکی اے کہ حکومت تے اپوزیشن وچ محاذ آرائی ویلا لنگھن دے نال ودھدی جا رہی اے جیہڑی کسے وی جمہوری ملک لئی چنگی ثابت نہیں ہوندی۔ ودھدی ہوئی سیاسی کشیدگی دے نتیجے جمہوریت تے سیاستداناں لئی خطرناک ثابت ہو سکدے نیں؟