نیب دا تعلق کسے سیاسی جماعت نال نہیں، ریاست پاکستان نال اے: چیئرمین نیب
اسلام آباد( پنجابی میڈیا گروپ) چیئرمین نیب آکھیا اے مقدمیاں نوں قنون دے مطابق منطقی انجام تک اپڑانا نیب دی اولین ترجیح اے۔ نیب دا تعلق کسے سیاسی جماعت نال نہیں بلکہ ریاست پاکستان نال اے۔ تفصیل دے مطابق چیئرمین نیب جاوید اقبال دی زیر صدارت اعلیٰ سطح دا اجلاس ہویا جہدے وچ نیب دی مجموعی کارکردگی دا جائزہ لیا گیا۔ چیئرمین نیب آکھیا ملک توں بدعنوانی دا خاتمہ، لٹی رقماں دی واپسی، منی لانڈرنگ تے میگا کرپشن مقدمیاں نوں قنون دے مطابق منطقی انجام تک اپڑانا نیب دی اولین ترجیح اے۔ اوہناں آکھیا نیب دا تعلق کسے سیاسی جماعت نال نہیں بلکہ ریاست پاکستان نال اے۔ نیب نے مقدمیاں نوں نبیڑن لئی شکایتاں دی جانچ پڑتال، انکوائری تے انویسٹی گیشن لئی 10مہینے دا عرصہ مقرر کیتا اے جہدے مثبت نتائج آ رہے نیں۔ چیئرمین نیب جاوید اقبال دا کہنا سی نیب دی ملزمان نوں سزا دوان دی شرح 68.88فیصد اے جہڑی دوجے انسداد بدعنوانی اداریاں توں ودھ اے۔





















