’’ویلنٹائن ڈے‘‘

ویلنٹائن ڈے دی فرسودہ رسم نے یورپی ملکاں وانگوں امت مسلمہ نوں وی ایس دن دی ذہنی غلامی وچ مبتلا کر دتا اے

تحریر: اکرم عامر

پوری دنیا وچ قوماں دی غلامی وچ سب توں خوفناک قسم ذہنی غلامی اے۔ جیہڑی نسلاں دے بعد قوماں دی تباہی دا سبب بن دی اے جدوں نسل نوبگڑ جائے تے ایس دی آن والی ملت و قوم تباہ و برباد ہو جاندیاں نیں، ایس دی وڈی وجہ دنیا وچ فرسودہ روایات دی بہتات اے جنہوں اسیں بغیر تحقیق دے پھیلانا شروع کر دینے آں، فیر ایس نوں اینا عروج اُتے اپڑا دینے آں کہ اوہ قوماں دی روایت، رسم و رواج تے فیر ثقافت جہی محسوس ہون لگدیاں نیں، ایہناں ای وچ ویلنٹائن ڈے وی شامل اے جیہڑا 14 فروری نوں پاکستان سنے پوری دنیا وچ بڑے جوش و جذبے نال منایا جاندا اے۔ ایس دن دی تشریح شروع کراں تے ایس حوالے نال بوہت ساری روایتاں نیں جیہڑی اک کالم وچ لکھنا ممکن نہیں تاں اک روایت اے کہ ویلنٹائن ڈے بت پرستاں دی رسم اے جس نے یورپ توں جنم لیا، زمانہ قدیم وچ غیر شادی شدہ نوجوان منڈے کُڑیاں اک تہوار منایا کردے سن، کُڑیاں محبت دے خط لکھ کے گلدان وچ جیہڑا سرخ گلاب دے پھُلاں وچ رکھیا ہوندا سی پا دیندیاں سن، ایہنوں محبت دی لاٹری دا ناں دتا جاندا سی، روم دے نوجوان منڈے ایس گلدان توں اپنی لاٹری کڈ دے سن، جس کُڑی دے ناں دا خط منڈے دے ہتھ لگدا اوہ منڈا ایس کُڑی نال کجھ عرصے بعد دن دا تعین کر کے کورٹ وچ شادی کر لیندا، ایس دوران شادی توں پہلے پریمی جوڑے آپس وچ ہم آہنگی، راہ و رسم تے محبت نوں ودھان لئی ملاقاتاں کردے سن، ایہہ رسم ختم ہون دی بجائے ودھدی ای چلی گئی جنہوں سینٹ ویلنٹائن ڈے دا ناں دے دتا گیا، ایس بیماری نے حالیہ کجھ ورھیاں وچ پاکستانی نوجوان نسل نوں بُری طرح اپنی لپیٹ وچ لے رکھیا اے جس دی وجہ سوشل میڈیا، الیکٹرانک میڈیا تے پرنٹ میڈیا اُتے ایس فرسودہ رسم دی بیجا تشہیر اے۔
جویں جویں ایہہ دن نیڑے آ رہیا اے، پوری دنیا وانگوں پاکستان وچ وی پریمی جوڑیاں تے عاشق مزاجاں نے ایس دن نوں منان لئی کئی دناں توں تیاریاں شروع کر رکھیاں نیں، نکے وڈے شہراں وچ پھُلاں خاص طور تے لال گلاب، دل نما کھلونے، کارڈز، دل دی طرح بنے چاکلیٹ سنے ویلنٹائن ڈے اُتے پریمی جوڑیاں لئی راحت و تسکین دا باعث بنن والی لاتعداد شیواں نوں دکانداراں نے سٹالاں دی صورت وچ سجا دتا اے جتھے ایس دن نوں منان والے جوڑے بڑی تعداد وچ خریداری وچ مصروف نیں جیہڑے خرید کردہ تحفے 14 فروری نوں اک دوجے نوں ونڈن گے۔ تے ویلنٹائن ڈے منان گے۔
موجودہ دور وچ ’’ہیر رانجھا، لیلہ مجنوں، سسی پنوں، شیری فرہاد‘‘ جہی محبت تے ناپید اے پر موجودہ دور وچ رسمی عشق و محبت تے ویلنٹائن ڈے جہی فرسودہ روایات نے ملک دے تعلیمی اداریاں دے طلبا و طالبات نوں بُری طرح اپنے سحر وچ جکڑ رکھیا اے جس دے نتیجے وچ کئی بھیانک واقعے وی رپورٹ ہوئے نیں، ہجے کجھ دن پہلاں ای دی تے گل اے جدوں لہور دے اک پرائیویٹ تعلیمی ادارے دے طالب علم نے اپنی ہم جماعت کُڑی نوں ’’پریم‘‘ دے چکر وچ بغیر نکاح دے حاملہ کر دتا، صورتحال ایہہ سی کہ فقرے منڈے دے کول اسقاط حمل لئی وی پیسے نہی سن تے کُڑی نے یونیورسٹی فیس دے بہانے رقم اپنے گھر توں منگوائی تے ایس رقم نال کُڑی دا پرائیویٹ ہسپتال وچ اسقاط حمل کرایا جا رہیا سی کہ حالت وگڑگئی ، نوجوان کُڑی نوں لے کے سرکاری ہسپتال جا رہیا سی کہ ایس دی موت واقعہ ہو گئی تے متذکرہ نوجوان کُڑی دی لاش ہسپتال وچ بے یارومددگار سٹ کے نس گیا، ایہہ ایسے کُڑی دی لاش سی جنہوں منڈے نے راہ و رسم ودھان دے دوران سہانے سپنے وکھائے ہون گے، پلس نے کُڑی دی لاش چھڈ کے نسن والے اسامہ نامی نوجوان دے علاوہ اسقاط حمل کرن والے پرائیویٹ ہسپتال دے عملہ سنے کئی بندیاں نوں حراست وچ لے لیا اے۔ ایتھے قابل توجہ امر ایہہ وے کہ ایس طرح دے پریمی جوڑیاں دے بغیر نکاح دے پیدا کردہ بچے آئے دن کسے نہ کسے شہر دے کچرے دے ڈھیر اُتے زندہ یا مردہ پائے جاندے نیں جنہاں نوں جانور نوچ رہے ہوندے نیں۔
ایسے واقعیاں دی اک وجہ کلمہ طیبہ دے ناں اُتے بنن والی ریاست مدینہ پاکستان دے تعلیمی اداریاں وچ طلبا و طالبات دا مخلوط تعلیمی نظام، بے پردگی، دین توں دوری تے تاخیر نال بالاں دی شادیاں نیں جس دی وجہ نال ملک وچ انج دے خطرناک واقعیاں وچ خوفناک حد تیکر وادھا ہو چکیا اے کیوں جے نوجوان منڈے کُڑیاں آپس وچ گپ شپ نال معاملہ دوستی تیکر ودھان دے بعد بغیر نکاح جسمانی تعلقات وچ تبدیل کر لیندے نیں تے فیر کئی دیگر شہراں وچ لہور وانگوں کُڑی دی میت نوں بے یارومددگار چھڈن جہے واقعے رونما ہوندے نیں۔
اللہ پاک نے مرد نوں جوان ہوندے ای اپنی نگاہواں نیچی رکھن تے عورتاں نوں پردے دا حکم دتا اے تے عورتاں نوں نامحرم نال کسے قسم دے تعلقات (Interaction) توں منع کیتا گیا اے۔ والدین نوں منڈے تے کُڑیاں دے نکاح وچ تاخیر نہ کرن دی ہدایت کیتی اے تے ایہہ وی کہیا اے کہ والدین اپنے بالاں دی دین اسلام دے احکامات دے مطابق تربیت و پرورش کرن، پر ساڈی ریاست تے عوام مادر پدر آزاد تے جدیدیت (Moderation) دی لعنت وچ مبتلا ہو کے اسلام تے اسلامی احکامات اُتے عمل توں دور ہوندی جا رہی اے جس دا خمیازہ وی سانوں بھگتنا پئے رہیا اے تے آئے دن روز امت مسلمہ نویں نویں مسلیاں دا شکار ہو رہی اے۔
سو گل کتھوں کتھے نکل گئی گل ہو رہی سی ذہنی غلامی دی تے ویلنٹائن ڈے دی فرسودہ رسم نے یورپی ملکاں وانگوں امت مسلمہ نوں وی ایس دن دی ذہنی غلامی وچ مبتلا کر دتا اے۔ ایہہ دن جیہڑا 14 فروری نوں پوری دنیا وچ منایا جائے گا دے حوالے نال کفار دے نال امت مسلمہ دی نوجوان نسل وی تیاریاں وچ مصروف اے، تے لوڑ ایس امر دی اے کہ اسلامی ملکاں دے سربراہان خاص طور تے پاکستان دے کپتان عمران خان جیہڑا کہ ملک نوں ریاست مدینہ بنان دے دعویدار نیں نوں چاہیدا اے کہ ایس فرسودہ رسم و رواج اُتے فوری طور اُتے پابندی عائد کرن تے ایس دن دے حوالے نال سامان دی فروخت نوں سرکاری طور اُتے منع قرار دتا جائے، ایس دن دے حوالے نال ہر طرح دی تقریبات دا انعقاد کرن والیاں نوں قانون دی گرفت وچ لیایا جائے تاں بنے گا ریاست مدینہ تے جے انج نہ کیتا گیا تے جس شدت نال نوجوان نسل ویلنٹائن ڈے جہی فرسودہ روایت دی لت وچ مبتلا ہو رہی اے آن والے کجھ ورھیاں بعد ایس لعنت اُتے قابو پانا مشکل ہوئے گا۔