پنجاب وچ اک نہیں دو تبدیلیاں دا امکان

لكهت:اشرف شریف

ساہیوال دے اکثر لوکاں وانگوں میں وی حیران ہویا کہ وزیراعلیٰ پنجاب عثمان بزدار تن دیہاڑ مسلسل شہر وچ بیٹھے رہے اوہناں نے کئی اعلیٰ افسراں نوں اپنے پھوپھا تیمور دے گھر سد کے میٹنگ کیتی۔ ساہیوال وچ کئی ترقیاتی منصوبیاں دا اعلان کیتا تے اک ای سڑک دا پچھلے دو ورھیاں وچ تن واری افتتاح کیتا اے۔ ایہ حیرانی ہور ودھ جاندی اے جدوں پتہ لگدا اے کہ گورنر پنجاب چوہدری سرور ہفتے وچ دو دیہاڑ ساہیوال وچ گزار رہے نیں۔ میں اوہناں دے پچھے ساہیوال جا اپڑیا جتھے معاملے اک نویں ڈھب تے ویکھے۔ چوہدری سرور مقامی سیاست وچ تھم دی حیثیت رکھن والے رائے حسن نواز چوہدری‘ زاہد تے وسیم رامے دے راہیں گھر گھر رابطہ کر رہے نیں۔ خاندان تے برادریاں دے سربراہواں نوں مل رہے نیں۔ ایہ سب کسے انتخابی تیاری ورگا اے پر ایتھے کوئی ضمنی انتخاب نہیں ہو رہیا الیکشن لئی 2023ء نوں اڈیکنا پوے گا۔ فیر ایہ ہنگامہ کاہدا اے۔ این اے 148 ہڑپہ تے کمیر دے علاقیاں تے مشتمل اے۔ ایس حلقے توں مسلم لیگ (ن) دے چوہدری اشرف ایم این اے منتخب ہوئے جد کہ اوہناں دے تھلے دیاں صوبائی سیٹاں تے وی مسلم لیگ (ن) دے ملک ارشد تے نویداسلم لودھی رکن پنجاب اسمبلی منتخب ہوئے۔ ایہناں دے مقابلے وچ پی ٹی آئی نے ڈھکو تے کاٹھیا برادری نال تعلق رکھن والے امیدوار کھڑے کیتے۔ حلقے وچ ارائیں برادری دا ووٹ سب توں وڈا اے پر تحریک انصاف دے سارے امیدوار غیرارائیں ہون دی وجہ نال چوہدری اشرف برادری دا ووٹ لے گئے۔ اوہناں دی جت دا مارجن چالھی ہزار توں ودھ ووٹ سن۔ایہ اک وڈا فرق اے جہنوں صرف جماعت دی بنیاد تے ووٹ حاصل کرکے ختم نہیں کیتا جا سکدا۔
چوہدری سرور تیزی نال اپنی ٹیم بنا رہے نیں۔ ارائیں ہون پاروں اوہ برادری دے وڈے دھڑیاں دی حمایت حاصل کر رہے نیں۔ لوکاں دے بہت سارے کم ہو رہے نیں۔ ایس حلقے وچ کروڑاں دے ترقیاتی منصوبے زیرتکمیل نیں۔ حلقہ ادھا ملتان روڈ دے سجے پاسے تے ادھا کھبا پاسے اے۔ دوویں حصے اک ریلوے پھاٹک دے راہیں ملدے نیں ۔ ایس پھاٹک تے رش پاروں مسئلے ودھ رہے سن۔ حکومت نے اوورہیڈبرج دی تعمیر شروع کر دتی اے۔ کئی تھاں تے واٹر فلٹر پلانٹ لگ رہے نیں۔ سڑکاں دی مرمت تے تعمیر دا کم ہو رہیا اے۔ چوہدری سرور دے مقامی ساتھیاں وچ چوہدری زاہد بہت وڈے سیڈبزنس دے مالک نیں۔ اوہ ہڑپہ وچ اپنی جیب توں ڈائیلسز مشین لگوا چکے نیں۔ چوہدری زاہد ارائیں نیں تے اوورسیز کمیشن ساہیوال دے ضلعی صدر وی۔ اوورسیز کمیشن پنجاب دے چیئرمین وسیم رامے ساہیوال نال تعلق رکھن والے تارکین وطن دی املاک تے قبضیاں دے خاتمے تے اوہناں دے مسئلے حل کرن لئی سرگرم نیں۔
بظاہر ایہ عجیب گل اے کہ عام انتخابات توں دو ڈھائی ورھے پہلاں اک اجیہا حلقہ پی ٹی آئی دی توجہ دا مرکز بن رہیا اے جتھے اوہنوں جتن لئی پنجاہ ہزار ووٹ ہور لینے ہون گے۔ رائے حسن نواز دا ووٹ بینک اے اوہنا ںدے ووٹ بینک دی وجہ نال سید صمصام بخاری نے رینالہ دی تھاں ساہیوال دے لاگے صوبائی حلقے توں الیکشن جتیا۔ صمصام بخاری ایس ویلے پنجاب کابینہ وچ شامل نیں۔ چوہدری سرور وی رائے حسن نواز تے انحصار کر رہے نیں۔ چوہدری سرور نے اپنے آبائی علاقے ٹوبہ ٹیک سنگھ وچ انتخابی تیاریاں شروع کر رکھیاں نیں۔ اوہناں دا ہوم ورک دسدا اے کہ اوہ مرکز وچ کوئی اہم ذمہ داری نبھان دے خواہش مند نیں۔ چوہدری سرور گورنر نیں آئین دی رو نال گورنری چھڈن دے دو ورھے توں پہلاں اوہ کسے انتخابی عمل وچ بطور امیدوار شریک نہیں ہو سکدے۔ ہڑپہ توں اوہناں دے الیکشن لڑن دی خبر نوں ٹھیک من لیا جاوے تے فیر ایس گل دا امکان موجود اے کہ اگلے کجھ ہفتیاں وچ چوہدری سرور گورنر شپ توں سبکدوش ہو سکدے نیں۔ انج ہویا تے نویں گورنر دی تعیناتی ہووے گی۔ نواں گورنر پی ٹی آئی توں لیا جاندا اے یاں اتحادیاں دی دلجوئی دا سامان ہوندا اے ایہ معاملے دلچسپی دا کارن ہون گے۔ طیور اپنیاں اپنیاں بولیاں بول رہے نیں۔
کجھ لوک وڈیاں تبدیلیاں دی خبر دے رہے نیں۔ اپوزیشن ایہناں خبراں تے تبصرہ کرن توں گریز کر رہی اے اوہنوں پتہ اے کہ ایہ سب حکومت دا داخلی انتظام اے۔ اپوزیشن نوں کدھروں حصہ ملن دی آس نہیں۔ تونسہ تے ساہیوال وچ کہانیاں دے ٹوٹے کھلرے ہوئے نیں۔ ایہناں ٹوٹیاں نال تحریک انصاف دے پیر پھٹڑ ہو سکدے نیں۔ ساہیوال وچ تے پی ٹی آئی کارکن تے مقامی ذمہ دار رِنج وکھائی دیندے نیں کہ انتظامی مشینری اوہناں نوں اجنبی سمجھدی اے تے دو تن حویلیاں دے پھیرے لا کے نوکری پکی کر رہی اے۔ ایہ سوال تے ہن وی تشنہ جواب اے کہ آخر گورنر تے وزیراعلیٰ بیک وقت ساہیوال تے کیوں مہربان ہو رہے نیں۔
پنجاب وچ اک تبدیلی آن دی اطلاع کدھروں نہ کدھروں باہر آ چکی اے دوجی تبدیلی آثار توں ظاہر ہو رہی اے۔ اک انتخابی حکمت عملی نوں ورتن دے اشارے نیں فرض کرو اک آرڈیننس راہیں جنوبی پنجاب نوں عبوری صوبہ بنا دتا جاندا اے تے عثمان بزدار نوں اوتھے گھلیا جا سکدا اے۔ دوجا ایہ کہ اوہناں سارے انتخابی حلقیاں تے دھیان دتا جاوے جتھو ں ن لیگ بھاری مارجن نال جتی۔ ایہدے نال اگلے انتخابات دی فوٹو وچ نویں رنگ ابھر سکدے نیں۔ تحریک انصاف نے جے انتخابی تیاری شروع کر دتی اے تے فیر تن ورھے توں رکے ترقیاتی فنڈز دا منہ وی کھولنا پوے گا۔ اک نقشہ بنا کے ویکھو ایس نقشے وچ کردار تے چہرے بدل دتے جاندے اختیارات گورنر‘ وزیراعلیٰ تے سپیکر وچ ونڈن دی تھاں اک ای بندے نوں بااختیار بنا کے پنجاب اوہدے حوالے کر دتا جاوے تے کیسا لگے گا؟۔٭٭