‘‘سینٹ الیکشن تے ضمیر فروش’’

سینٹ انتخابات وچ ارکان اسمبلی دی بھیڑ بکریاں وانگوں منڈی لگدی
اے تے کئی ارکان اسمبلیز اپنا ضمیر تے عوامی مینڈیٹ ویچدے نیں

تحریر: اکرم عامر سرگودھا

سینٹ انتخابات 2018ء دا شیڈول انائونس ہون توں کجھ دن پہلاں خیبر پختونخواہ دے ارکان اسمبلی دی نوٹاں دیاں گڈیاں وصول کردے ہوئے وائرل ہون والی ویڈیو نے ملکی سیاست وچ نہ صرف نواں پنڈورا بکس کھول دتا اے بلکہ ایس ویڈیو نے پی ٹی آئی دے کپتان تے حکومتی کابینہ دے ارکان دے موقف نوں وی جلابخشی اے کہ سینٹ انتخابات وچ ارکان اسمبلی دی بھیڑ بکریاں وانگوں منڈی لگدی اے تے کئی ارکان اسمبلیز اپنا ضمیر تے عوامی مینڈیٹ فروخت کردے نیں، حکومت کہندی اے کہ ایسے ہارس ٹریڈنگ نوں روکن لئی صدارتی آرڈیننس سینٹ الیکشن 2021 دے حوالے نال جاری کیتا گیا اے جس وچ آئندہ الیکشن شو آف ہینڈ دے تحت کرائے جان دا کہیا گیا اے، تے ایس ضمن وچ عدالت عالیہ سپریم کورٹ توں وی رجوع کیتا گیا اے، عدالت ایس حوالے نال جو فیصلہ یا تشریح کرے گی حکومت ایس اُتے عملدرآمد دی پابند ہوئے گی، منظر عام اُتے آن والی ویڈیو خیبر پختونخواہ دے موجودہ صوبائی وزیر قانون و انصاف سلطان محمد خان سنے دیگر ارکان اسمبلی نوں نوٹاں نال انصاف کردے نوٹاں دیاں گڈیاں وصول کردے واضح ویکھیا جا سکدا اے۔ کپتان دے حکم اُتے ویڈیو وچ سرفہرست نظر آن والے کپتان دے کھلاڑی سلطان محمد خان نے نہ صرف استعفیٰ دے دتا اے بلکہ کہیا اے کہ اوہ پی ٹی آئی دی ایس ضمن وچ بنائی گئی کسے وی احتساب کمیٹی دے ساہمنے پیش ہو کے اپنی بے گناہی ثابت کرن گے یعنی موصوف ہجے وی
’’الٹا چور کوتوال کو ڈانٹے‘‘
دے مصداق ڈھائی دا مظاہرہ کر رہے نیں، سلطان محمد خان نے صرف وزارت قانون توں استعفیٰ دتا اے جس وچ کہیا گیا اے کہ ویڈیو وائرل ہون اُتے مینوں اخلاقی ذمہ داری عائد ہوندی اے کہ میں اپنے عہدے استعفیٰ دے دیواں، سو وزیراعلیٰ خیبر پختونخواہ نے ایہہ استعفیٰ وی منظور کر لیا پر ایم پی اے دی نشست اُتے ہجے تیکر موصوف براجمان رہ کے ایوان توں بدستور مراعات لیندے رہنا چاہندے نیں، حالانکہ موصوف نے ٹویٹر اُتے شیئر کیتی جان والی استعفیٰ دی کاپی وچ اخلاقیات دا ذکر کیتا اے چاہیدا تے ایہہ سی کہ موصوف وزارت قانون دے عہدے دے نال اپنی ایم پی اے دی نشست توں وی استعفیٰ دے دیندے تاں جے حالیہ سینٹ الیکشن وچ جس دا شیڈول جاری ہو چکیا اے میں موصوف دوبارہ ووٹ فروخت نہیں کر سکدے؟
سو گل ہو رہی سی خیبر پختونخواہ وچ ارکان اسمبلی دے ووٹ فروخت ہون دی وائرل ہون والی ویڈیو دی تے ایس وچ واضح دسیا جا رہیا اے کہ 2018 وچ اک ارب 20 کروڑ روپئے خرچ کر کے ارکان اسمبلی دے ضمیر ویچ کے بڑے پُر اطمینان نوٹاں دیاں گڈیاں وصول کر رہے نیں۔
2020ء وچ خیبر پختونخواہ اسمبلی وچ 11 نشستاں اُتے سینیٹر منتخب ہوئے سن، ایس ویلے ایوان وچ ارکان اسمبلی دے تناسب توں پی ٹی آئی دا ٹارگٹ سینٹ دی 6 نشستاں جتنا سی پر اوہ 5 اُتے کامیابی حاصل کر پائی سی، اک نشست اُتے کپتان دا کھلاڑی طمع نفسی لئی ووٹ فروخت کرن والے اپنے ارکان اسمبلیز دی وجہ نال ہر گیا سی، پیپلز پارٹی نے دو مسلم لیگ (ن) نے دو، جمعیت علماء اسلام نے اک تے جماعت اسلامی نے 1 نشست جتی سی، قومی وطن پارٹی، مولانا سمیع الحق شہید، عوامی نیشنل پارٹی، جمعیت علمائے اسلام دے ایس ویلے دے صوبائی امیر نصیب اللہ خان سینٹ الیکشن 2018 وچ کوئی نشست جت نہ پائے سن، ایہناں انتخابات وچ پی ٹی آئی ولوں فیصل جاوید، ایوب افریدی، فدا محمد جد کہ ٹیکنو کریٹ دی نشست اُتے اعظم سواتی، خواتین دی نشست اُتے ڈاکٹر مہر تاج روغانی، مسلم لیگ (ن) دے پیر صابر علی شاہ، ٹیکنو کریٹ نشست اُتے دلاور خان، پیپلز پارٹی دے بہرہ مند تنگی تے خاتون روبینہ خالد، جماعت اسلامی دے مشتاق احمد خان،جے یو آئی دے طلحہ محمود سینیٹر منتخب ہوئے سن۔
2013 توں 2018 تیکر وی کے پی کے وچ کپتان دی پارٹی پی ٹی ٓئی دی حکومت سی تے کپتان بڑے مان نال پورے ملک دے دوجے صوبیاں نوں چیلنج کر کے خیبر پختونخواہ حکومت دی کارکردگی، اپنے ارکان اسمبلی دی ایمانداری تے محنت دی مثالاں دیندے سن، پچھلے سینٹ انتخابات وچ خیبر پختونخواہ توں اک نشست ہارن اُتے کپتان تے پی ٹی ٓئی نوں سیاسی جھٹکا لگیا سی، تے کپتان نے ایس موقعے اُتے اک وڈا سیاسی فیصلہ کردے ہوئے 20 ارکان نوں پارٹی توں کڈ دتا سی جنہاں وچ سمیع اﷲ زیب، فیصل زمان، نرگس علی، وینا ناز، فوزیہ بی بی، نسیم حیات، نگینہ خان، سردار ادریس، عبید خان، زاہد درانی، عبدالحق، قربان خان، امجد آفریدی، وجیہ الزمان، بابر سلیم، عارف یوسف، جاوید نسیم، یاسین خلیل و دیگر شامل سن۔ جنہاں دے خلاف پارٹی ڈسپلن دی خلاف ورزی اُتے نوٹس لیا گیا تے منظر عام اُتے آن والی ویڈیو وچ نظر آن والے کجھ ارکان اسمبلی کپتان نوں ایس ویلے برحلف صفائیاں دیندے رہے، کئی ارکان نے تے ایس ویلے میڈیا دی وساطت نال مقدس کتاب اُتے ہتھ رکھ کے وی کہیا سی کہ اوہ ووٹ ویچن والیاں وچ شامل نہیں سن پر ہن ویڈیو منظر عام اُتے آ چکی اے تے ماضی وچ صفائیاں دین والے سابق و موجودہ ارکان اسمبلی منظر عام توں سردست غائب ہو چکے نیں۔ توجہ طلب گل ایہہ وے کہ خیبر پختونخواہ دے وزارت قانون توں استعفیٰ دین والے سلطان محمد خان ہن وی کہندے نیں کہ اوہ اپنی صفائی پیش کرن گے تے بے قصور ثابت ہون گے۔
ویڈیو سیکنڈل وچ گوکہ چیئر مین سینٹ صادق سنجرانی جیہڑے کہ خلاف توقع کامیاب ہوئے سن پیسے تقسیم کردے نظر نہیں آ رہے، تاں ارکان اسمبلی دی ووٹاں دی خرید دا براہ راست فائدہ صادق سنجرانی نے چکیا سی تے اوہ چیئر مین سینٹ بنے سن، ویڈیو سیکنڈل منظر عام اُتے آن دے بعد کجھ حلقیاں نے الزام عائد کیتا کہ ماضی وچ ووٹاں دی خرید و فروخت اُتے ارباں روپئے صادق سنجرانی نے خرچ کیتا سی تے ہن چیئر مین سینٹ وی حلفا صفائیاں دے رہے نیں کہ ویڈیو سکینڈل نال ایہناں دا کوئی تعلق نہیں تے ایتھے پچھنا ایہہ سی کہ فیر ارکان اسمبلی نوں اک ارب 20 کروڑ روپئے کس نے تقسیم کیتے، کیوں جے ویڈیو وچ جیہڑے پیپلز پارٹی دے ایم پی اے پیسے تقسیم کردے نظر آ رہے نیں ایہناں دی اینی سکت نہیں کہ اوہ اک ارب 20 کروڑ روپئے ارکان اسمبلی نوں دے سکن؟
سو گل کتھوں کتھے نکل گئی گل ہو رہی سی سینٹ انتخابات وچ ارکان اسمبلی دے ووٹاں دی خریدوفروخت روکن لئی آئندہ سینٹ انتخابات اوپن ووٹاں دے ذریعے کران دی جس بارے اپنے ادوار اقتدار وچ مسلم لیگ ن تے پیپلز پارٹی کہندی رہی اے کہ سینٹ انتخابات نوں شفاف کران لئی انتخابی طریقہ کار وچ تبدیلی لیائی جانا ضروری اے ایہناں جماعتاں نے ایس ویلے اوپن بیلٹ دے ذریعے سینٹ الیکشن کران دا عندیہ وی دتا سی، ہن پی ٹی آئی دی حکومت نے سینٹ انتخابات اوپن بیلٹ دے ذریعے کران لئی آرڈیننس جاری کر دتا اے جو سپریم کورٹ دے فیصلے توں مشروط اے۔ ہن اپوزیشن واویلہ کر رہی اے کہ پی ٹی آئی حکومت نے سینٹ الیکشن دا طریقہ کار تبدیل کر کے دھاندلی دا پروگرام بنا لیا اے پر ویڈیو چیخ چیخ کے بیا ن کر رہی اے کہ ماضی وچ سینٹ الیکشن وچ ووٹ خریدن والیاں وچ پی ڈی ایم وچ شامل پیپلز پارٹی دے ایم پی اے علی محمد باچا واضح نظر آ رہے نیں۔ ایہہ ویڈیو بوہت کجھ بیان کر رہی اے تے دس رہی اے کہ ملک وچ کون پیسے دی سیاست دے بل بوتے اُتے اقتدار وچ آندے نیں تے فیر قومی خزانے نوں کس طرح بے دریغ طریقے نال لٹ کے منی لانڈرنگ کر کے بیرون ملک اثاثے بناندے نیں۔ تاں ہن سینٹ انتخابات دا شیڈول جاری ہو چکیا اے تے سینٹ الیکشن ہون جا رہے نیں جس لئی 100 دے لگ بھگ امیدواراں نے کاغذات نامزدگی جمع کروا دتے نیں۔
پیپلز پارٹی، ن لیگ تے دیگر جماعتاں وانگوں پی ٹی آئی نے وی پرانے کھلاڑیاں نوں سینٹ الیکشن دے میدان وچ اتاریا اے حالانکہ کپتان کہندے سن کہ اوہ نوجواناں نوں اگے لیان گے پر کیوں جے سیاست بے رحم تے مفادات دا ناں اے ایسے بنا اُتے کپتان پرانے کھلاڑیاں دے ہتھوں مجبور ہو گئے تے نوجواناں نوں ساہمنے لیان دی بجائے ایہناں نوں پرانے سیاسی گرگوں دے ساہمنے گھٹنے ٹیکنے پئے، سو گل فیر ایدھو اودھے نکل گئی، گل ہو رہی سی سینٹ الیکشن وچ ہارس ٹریڈنگ روکن دی تے ایس ضمن وچ حکومت عدالت عالیہ نال رجوع کر چکی اے تے معاملہ عدالت وچ زیر سماعت اے، جے عدالت عالیہ سپریم کورٹ نے صدارتی آرڈیننس 2021 جیہڑا کہ صدر مملکت عارف علوی نے سینٹ الیکشن دے حوالے نال جاری کیتا سی نوں معطل نہ کیتا تے فیر سینٹ الیکشن اوپن بیلٹ دے ذریعے ہون گے تے ایہناں ارکان اسمبلی جیہڑے الیکشن مہم دے دوران بھاری رقم خرچ کر کے ضمیر ویچن لئی الیکشن لڑ کے اسمبلیاں وچ آندے نیں نوں مایوسی دا ساہمنا کرنا پئے گا تے جے آرڈیننس معطل کر دتا تے سینٹ الیکشن خفیہ بیلٹ دے ذریعے ہویا تے ایہناں ضمیر فروش ارکان اسمبلی دیاں ’’موجاں ہی موجاں‘‘ ہون گیاں۔ تاں ایس لئی قارئین تے عوام نوں عدالت عظمی دے فیصلے تے سینٹ الیکشن دے پولنگ دے دن دا انتظار کرنا ہوئے گا۔