کرپشن کرپشن کردی نی میں آپے کرپشن ہوئی

لكهت:صوفیہ بیدار

لو جی تبدیلی سرکار نوں اک ہور وڈا دھکا ٹرانسپرنسی انٹرنیشنل نے پچھلے دو ورھیاں وچ کرپشن چار ہتھ ودھ دا ڈیٹا دے دتا اے۔ پی ٹی آئی دے لائوڈ سپیکر مع اپنے لیڈر ہپلے تے ڈیڑھ دن ایس معمے نوں سمجھ ای نہیں سکے سگوں کریڈٹ لیند یرہے فیر بھلا ہووے شوشے باز اینکراں دی فوج دا جنہے رپورٹ دا چھیرا چھیرا کر کے پورے ملک نوں شام توں پہلاں سمجھا دتا وزیراعظم جو مسلم لیگ (ن) نوں ہمیشہ انگریزی دا طعنہ ماردے رہندے نیں ایہدے اردو ترجمے پڑھن دی تلقین کردے رہے۔ وزیراعظم دی کھڈاریاں والی انگریزی توں اجے تک سانوں جو فائدہ ہویا اے اوہ ساریاں دے سامنے ای اے اجے تے حال ایہہ وے ’’کرپشن کرپشن کردی نی میں آپے کرپشن ہوئی‘‘ کھڈاریاں والی انگریزی توں جاوید میانداد یاد آ گئے اوہ تے ایسے قبیل دے دوجے کھڈاری میچ جتن توں ایس لئی وی گھبراندے سن کہ بعد وچ انگریزی وچ انٹرویو دینا پیندا سی۔ تقریباً ساریاں نے اکو جیہا سکرپٹ یاد کر لیا First of all thanks to Allah almighty توں شروع ہو کے باقی کرکٹ ٹرمینالوجی کم ختم کرکٹ ٹرمینالوجی توں یاد آیا۔ فردوس عاشق اعوان سنے سارے وفاقی تے صوبائی وزیر شذیر اپنے آپ نوں ٹیسٹ کرکٹ نہیں تے گھٹو گھٹ فرسٹ کلاس کرکٹ دے کھڈاری ضرور سمجھدے نیں۔
وزیراعظم دے ٹریک سوٹ تے ایکسرسائز نے تے ہمراہ ورزش کرن والیاں دے چھکے چھڑائی رکھے ہن دیکھا دیکھی جوگرز تے ٹریک سوٹ توں علاوہ دوجے جعلی کھڈاریاں نے جیکٹاں وی پا لئیاں نیں وزیراعظم تے اپنی ازلی لاپرواہی تے ڈریس نس نہ ہون پاروں جیکٹ پا کے کابینہ دی صدارت کردے ہوئے بڑے نان سیریس لگدے نیں ایسے لئی سارے غیرذمہ دارانہ فیصلیاں نوں واپس لینا پیندا اے جہنوں یوٹرن کہندے نیں دیکھا دیکھی موٹے بھدے غیر ورزشی جثے‘ والی والے اراکین وی جیکٹ پا کے کرکٹ دی زبان بولدے نظر آئوندے نیں۔ کدی کدی میں سوچنی آں کہ جے کوئی انگریز امریکن تے دوجے انگریزی بولن والے ملک دا باشندہ ساڈی پارلیمانی تقریراں نوں سن رہیا ہووے یاں انگریزی دی طعنے بازی دا مطلب سمجھ جاوے تے کناں حیران ہووے گا کہ ایہناں نوں کیہ ہو گیا اے ساڈی زبان وچ قومی فیصلے کیوں کر رہے نیں۔ فیر اوہنوں پتہ لگے کہ ایہناں دے سارے ادارے‘ دفتر تے امراء دیاں پارٹیاں اک غیرملکی زبان وچ ای ہوندیاں نیں ہور تے ہور اسیں محبت دا حتمی جملہ I Love You وی انگریزی وچ جدوں تک نہ کہیے محبت تے پکی مہر نہیں لگدی۔
ایہدے وچ کوئی شک نہیں کہ ہر حکومت کوئی نہ کوئی Spacific نعرہ کوئی فلسفہ یاں کوئی عوامی کمزوری لے کے اٹھدی اے روٹی‘ کپڑے‘ مکان دا شاندار نعرہ تے لگ چکیا سی جو بھٹو توں ہو کے زرداری دی زر و دولت تھلے دم توڑ چکیا سی۔ پی ایم ایل این نے بار بار حکومت گنوا کے ووٹ نوں عزت دیو دا نعرہ مقبول کرنا چاہیا ہن رہ گئی پی ٹی آئی تے اوہ کیہ کردی اوہناں نے سوچیا ہنگ لگے نہ پھٹکڑی کرپشن کیوں جے ملک وچ سب توں وڈی فصل اے ایس لئی ’’کم چک دیو‘‘ کرنا کجھ تے ہے نہیں پچھلیاں دے منصوبے پچھلیاں دی دولت تے موجودہ کرپشن وی پچھلی کرپشن دے تسلسل وچ پا کے اللہ اللہ خیرصلیٰ پنج ورھے پورے کرو۔
دنیا دا سب توں سوکھا کم یعنی الزام تراشی کرو اپنے جرم تے کرپشن ثابت ہو جاوے تے ایہدے جواب وچ وی شریکاں دی دگنی کرپشن دا رولا پاندے اٹھو تے کرپشن سوندے کرپشن کھاندے کرپشن ہر ویلے کرپشن دے گھوڑے تے بہہ کے تے اپنی زبان نوں اک پل وی لگام نہیں دینا‘ کدھرے کرپشن دا گھوڑا رک نہ جاوے لوکاں نوں روندے سسکدے مہنگائی تے تڑپدے ویکھ کے انتقام دا تماشا وکھائو ہتھ کڑیاں‘ قیداں‘ نیب مقدمے‘ معزولیاں تے جدوں سکرین تے آئو چنگے بھلے باریش ستر ستر ورھے دے لوکاں نوں چور ڈاکو‘ چور ڈاکو دی گردان سٹارٹ کر دیو اوہ لوک اپنے بچیاں‘ جوائیاں دے اگے ذلیل ہوندے رہن اوہ لوک بھاویں مسلمان ہون پاکستانی ہون پاکستان وچ خون پسینہ بہا کے کاروبار‘ نوکریاں کردے ہون اوہناں نوں ہر حال وچ ناں توں نہیں پکارنا چور چور ڈاکو ڈاکو کہنا کیوں جے اسیں تھاں تھاں کونے کھدرے وچ ’’کرپشن‘‘ لبھدے رہنا اے۔ سکینڈل لبھنے نیں نہ سانوں کاشتکاری وچ ترقی کرنی اے نہ ای صنعت و حرفت دا پہیہ چلانا اے سانوں تے ایہناں فیصلیاں بارے مل مالکان وچ چن کے پی ایم ایل دے لوک نشانہ بنانے نیں جہانگیر ترین‘ علیم خان تے دوجے کھرب پتی لوکاں دی شان وچ جملہ نہیں کہنا اساں مسلم لیگ (ن) تے کرپشن ثابت کرکے چھڈنی اے جدوں پنج ورھے پورے ہون گے لوک روٹی منگن گے خالی کرپشن دا بھانڈا کھڑکان توں بور ہو و تے کھوکھر محل ڈھا دیو فیر تبدیلی آ جاوے گی۔ وزیراعظم ایناں نہیں جان دے کہ تبدیلی بنان دا ناں اے ڈھان دا نہیں اج برصغیر وچ بناں آڈٹ دے فیصلیاں نے پتہ نہیں کنی تعمیرات کیتیاں تے اج اوہ عجائبات وچ شمار ہو کے بھارتیاں نوں کناں ریونیو د ے رہیاں نیں جے کوئی کرپشن دا وژن لے کے ایہناں نوں ڈھا دیندا کہ ایہناں دی فنانس دا حساب تے آڈٹ نہیں ہویا تے اج کھرباں روپیے دا ریونیو وی اوسے وژن دے نال ڈب جاندا۔ غرض اینے چھوٹے وژن دے نال ایہو کجھ ممکن سی نہیں تے جہناں وڈیاں بلڈنگاں تے شک ہووے اوہناں نوں قومی تحویل وچ لیندے نیں ملک دے اثاثے ڈھا نہیں دیندے جے کسے دن موصوف نوں واپڈا بلڈنگ تے شک ہو گیا کہ ایہدیاں بنیاداں وچ مسلم لیگ (ن) دے مزدوراں نے اٹاں لائیاں لائیاں نیں تے ہو سکدا اے موصوف اوہنوں وی پٹ دین۔ رہ گیا اینٹی کرپشن تے نیب دا دکھاوا تے اوہ موصوف اکثر کہندے رہندے نیں ایہ ادارے میرے تھلے نیں نہیں تے اوہ بنی گالا نہ ڈھا دیندے گورنر ہائوس دی کندھ نوں سلیوٹ کر کے لنگھنی آں کہ مر گئے تینوں ڈھان والے۔ سنیا اے پاگل خانے دی مضبوط کندھ وی اک واری ڈھان دا سوچیا گیا سی پر اندروں اوہ احتجاج ہویا کہ ادارے ٹُٹ گئے۔ہن تے زیادہ ای بری ہو گئی ہن تے کرپشن دے گھوڑے نے وی یوٹرن لے کے سارا الزام موجودہ تبدیلی سرکار دے سر مڑھ دتا۔ ہائے ہائے ایہ تے کرپشن ختم کرن آئے سن کرپشن کرپشن کردے آپ ای کرپشن ہو گئے۔٭