“رجب المرجب ” فضائل ،احکام تے بدعات

متکلم اسلام مولانا محمد الیاس گھمن

اللہ تعالیٰ نے سال دے بارہ مہینے مقرر فرمائے تے ایہناں وچوں چار مہینیاں (ذوالقعدہ، ذوالحج، محرم تے رجب)نوں عظمت والا قرار دتا۔ ایہناں وچ عبادت کرن دا اجرو ثواب زیادہ ملدا اے جیہڑا بندا ایہناں مہینیاں وچ برائیاں توں بچدا اے ایہنوں باقی مہینیاں وچ برائیاں توں بچن دی توفیق ملدی اے۔
رجب دا چن ویکھنے دی دعا:
عَنْ أَنَسِ بْنِ مَالِکٍ رَضِیَ اللہُ عَنْہُ أَنَّ النَّبِیَّ صَلَّی اللہُ عَلَیْہِ وَسَلَّمَ کَانَ إِذَا دَخَلَ رَجَبٌ قَالَ: اللَّہُمَّ بَارِکْ لَنَا فِی رَجَبٍ وَشَعْبَانَ وَبَلِّغْنَا رَمَضَانَ۔
(کتاب الدعاء للطبرانی،باب القول عند دخول رجب، الرقم: 911)
ترجمہ: حضرت انس بن مالک رضی اللہ عنہ توں مروی اے کہ جدوں رجب دا چن نظر آندا تے نبی کریم ﷺ انج دعا منگدے سن: اے اللہ ! ساڈے لئی رجب تے شعبان دے مہینیاں وچ برکتاں عطا فرما تے سانوں رمضان دا مہینہ نصیب فرما۔
فائدہ:رسول اکرم صلی اللہ علیہ وسلم دا رجب وچ برکت دی دعا منگنا ایس گل دی دلیل اے کہ ایہہ مہینہ برکتاں والا اے۔
رجب دی پہلی رات:
ایس مہینے دی پہلی رات دی فضیلت بوہت زیادہ اے تے ایس وچ دعائواں دا قبول ہونا حدیث مبارک توں معلوم ہوندا اے۔ حضرت عبداللہ بن عمر رضی اللہ عنہما توں روایت اے: پنج راتاں انج دیاں نیں جنہاں وچ منگی جان والیاں دعاواں نوں مسترد نہیں کیتا جاندا۔ شب جمعہ، رجب دی پہلی رات، پندرہویں شعبان دی رات تے عیدین دیاں راتاں۔(فضائل الاوقات للبیہقی، باب فی فضل العید، الرقم: 149)
کوئی عبادت خاص نہ کیتی جائے:
رجب دی پہلی رات فضیلت والی اے پر ایہہ خیال رہوے کہ ایس وچ اپنی طرفوں یا غیر مستند گلاں دی وجہ نال ایس وچ کوئی عبادت خاص نہ کیتی جائے جویں کہ کجھ علاقیاں وچ کجھ لوکاں نے کجھ شیواں نوں رواج دے رکھیا اے۔ دوجی ایہہ گل وی ذہن نشین رہوے کہ نفلی عبادتاں وچ اینی مشغولیت نہ کیتی جائے کہ فرائض و واجبات متاثر ہون یعنی پوری رات تلاوت، ذکر، اذکار، استغفار، درود پاک، نوافل وغیرہ اینی دیر تیکر نہ کیتی جان کہ فجر دی نماز قضا ہو جائے۔ مزید ایہہ کہ ایس وچ لوکاں نوں عبادت لئی بلان دا اہتمام نہ کیتا جائے۔
رجب دے روزے:
حضرت عطاء رحمہ اللہ توں مروی یاے کہ حضرت عروہ رضی اللہ عنہ نے حضرت عبداللہ بن عمر رضی اللہ عنہما توں پچھیا کہ کیہ اللہ دے رسول ﷺرجب دے مہینے وچ روزہ رکھیا کردے سن؟ ابن عمر رضی اللہ عنہما نے جواب دتا کہ جی ہاں آپ ﷺ ایس مہینے وچ روزہ رکھیا کردے سن تے ایس نوں عظمت والا مہینہ قرار دیندے سن۔ (جمع الوسائل فی شرح الشمائل، باب ماجا، فی صوم رسول)
رجب دے روزہ داراں لئی جنتی محل:
حضرت عامر بن شبل رحمہ اللہ توں مروی اے کہ حضرت ابوقلابہ رحمہ اللہ فرماندے نیں: جنت وچ اک عظیم الشان محل ایہناں لوکاں لئی اے جیہڑے رجب وچ روزے رکھن والے نیں۔ (فضائل الاوقات للبیہقی، الرقم: 17)
رجب وچ زکوٰۃ:
کجھ لوک کم علمی دی وجہ نال ایس مہینے دے بارے وچ ایہہ اعتقاد رکھدے نیں کہ زکوٰۃ رجب دے مہینے شب معراج وچ فرض ہوئی، حالانکہ ایہہ درست نہیں۔ زکوٰۃ معراج والی رات فرض نہیں ہوئی بلکہ معراج والی رات نماز فرض ہوئی، لہٰذا زکوٰۃ دی شرطاں پوری ہوندے ای جدوں سال لنگھ جائے تے رجب دا انتظار کیتے بغیر زکوٰۃ ادا کر دینی چاہیدی اے نہیں تے انسان گناہگار ہوندا اے۔
رسم تبارک:
کجھ لوک ماہ رجب دے جمعے والے دن یا کسے ہور دن وچ اک مخصوص رسم کردے نیں کہ ایصال ثواب لئی میٹھی روٹیاں اُتے سورۃ تبارک الذی(سورۃ الملک)41 وار پڑھواندے نیں فیر ایہناں روٹیاں نوں کھاندے نیں:ایصال ثواب دا ایہہ طریقہ درست نہیں، لوکاں نے از خود ایہہ طریقہ کڈ لیا اے، شریعت وچ ایصال ثواب لئی ایس طرح دی کوئی قیود نہیں ۔
وڈی بی بی دی کہانی:
کجھ خواتین رجب دی 22 ویں رات نوں نہا دھو کے بڑے اہتمام دے نال میدہ، شکر، گھیو، ددھ تے مختلف میوہ جات تو مرکب اک پکوان بناندے نیں تے اک خاص برتن وچ پا کے اک نظم پڑھدی اے تے ایہنوں وڈی بی بی دی داستان دے ناں توں موسوم کردی اے، ایہنوں داستان عجیب وی کہندے نیں کجھ خواتین تے ایس کہانی پڑھوان دی منت مندے نیں تے ایس بے اصل تے غیر مسند کہانی پڑھن نوں باعث ثواب سمجھدیاں نیں۔
لکڑہارے دی جھوٹی کہانی:
کجھ داستان تراش لوکاں نے اک کہانی گھڑی اے کہ مدینہ منورہ دا اک لکڑہارہ روزی کمان لئی کسے دوجے ملک چلا گیا تے ایس لکڑہارے دی بیوی نے پیٹ پالن لئی مدینہ دے بادشاہ کول صفائی کرن دی نوکری کر لئی

اک دن جدوں اوہ صحن وچ جھاڑو دے رہی سی تے امام جعفر صادق ایس نال رستے توں لنگھے تے ایہہ فرمایا:’’ جے کوئی مشکل توں نجات حاصل کرنا چاہندا ہوئے تے اج 22 رجب نوں پوریاں پکا کے دو کونڈیاں وچ بھر کے میرے ناں دی فاتحہ دلوائے تے ایس دی ہر مراد پوری ہوئے گی جے پوری نہ ہوئے تے قیامت دے دن ایس دا ہتھ ہوئے گا تے میرا گریبان۔ ‘‘
ایہہ کہہ کے لکڑہارے دی بیوی نے منت منی کہ میرا شوہر جس نوں گئے ہوئے بارہ ورہے ہو چکے نیں جیتا جاگدا واپس آ جائے تے ڈھیر سارا مال وی نال لے آئے تے میں امام جعفر صادق دے ناں دے کونڈے کراں گی۔ جس ویلے ایہہ خاتون منت من رہی سی عین ایسے ویلے ایس دے شوہر نے اک جنگل وچ سوکھی جھاڑی اُتے کلہاڑی چلائی تے کسے سخت شے نال لگی تے ڈگ گئی جس تھاں کلہاڑی ڈگی ایس نے اوتھے زمین کھودی تے ایہنوں بوہت سارا خزانہ ملیا۔ اوہ ایس خزانے نوں لے کے مدینہ آیا ایس نے اک خوبصورت محال تیار کرایا تے اپنی بیوی دے نال ایس محل وچ ہنسی خوشی زندگی لنگھان لگیا۔ لکڑ ہارے دی بیوی نے اپنے شوہر دا ایہہ واقعہ وزیر دی بیوی نوں دسیا تے حضرت امام جعفر صادق دے ناں دی کونڈیاں دی ایہہ تاثیر دسی تے وزیر دی بیوی نے ایس کونڈیاں والی گل نوں جھوٹ سمجھ کے ایس دا انکار کیتا جس دی وجہ نال ایس اُتے ایسے دن ایہہ مصیبت آئی کہ بادشاہ نے وزیر نوں ملک بدر کر دتا چنانچہ اوہ وزیر اپنی بیوی دے نال محل توں نکلیا تے جنگل دی راہ لئی۔
رستے وچ ایس وزیر نے اپنی بیوی توں کجھ رقم لئی تے اک خربوزہ خریدیا تے خربوزے نوں اک کپڑے وچ لپیٹ کے سفر شروع کیتا۔ دوجے پاسے ایہہ ہویا کہ بادشاہ دا پتر (شہزادہ) قتل ہو گیا، شہر تے گردونواح وچ شاہی پولیس شہزادے دے قاتل دی تلاش وچ گھم رہی سی جدوں ایہہ وزیر اپنی بیوی دے نال اک تھاں توں لنگھیا تے ایس دے کول کپڑے وچ خربوزہ سی پولیس نے شہزادے دے قتل دے شبہ وچ ایس وزیر تے ایس دی بیوی نوں گرفتار کر لیا تے ایہناں نوں دربار شاہی وچ لیایا گیا۔ بادشاہ دے حکم اُتے ایس کپڑے نوں کھولن دا کہیا گیا جس وچ خربوزہ سی۔ بھرے دربار وچ جدوں ایس کپڑے نوں کھولیا گیا تے ایس وچ خربوزے دے بجائے شہزادے دا خون نال لت پت سربرآمد ہویا۔ بادشاہ ہور زیادہ غضبناک ہویا تے حکم دتا کہ کل سویرے ایہناں نوں پھانسی دے دتی جائے۔ رات جیل وچ وزیر تے ایس دی بیوی نے بوہت غور کیتا کہ آخر ساڈے توں کیہ جرم ہویا اے جس دی سانوں ایہہ سزا مل رہی اے تے وزیر دی بیوی کہن لگی کہ مینوں انج لگدا اے کہ میں امام جعفر صادق دے کونڈیاں دا انکار کیتا اے جس دی وجہ نال ساڈے اُتے ایہہ مصیبت تے پریشانی نازل ہوئی اے۔ چناچہ جیل وچ اپنے ایس جرم اُتے توجہ کیتی تے منت منی کہ اوہ امام جعفر صادق دے ناں دے کونڈے بھرن گے۔ منت منن دی وجہ نال ایہناں دی پریشانی انج ختم ہوئی کہ گمشدہ شہزادہ صحیح سلامت واپس آگیا جس دی وجہ نال بادشاہ نے ایہناں دونواں دی قید توں رہائی دا حکم جاری کیتا۔ بادشاہ نے ایس وزیر نوں دوبارہ اپنے دربار وچ وزیر مقرر کیتا تے ایس وزیر دی بیوی نے امام جعفر صادق دے ناں دے کونڈے بھرن دی منت پوری کیتی۔
ایہہ وے اوہ من گھڑت کہانی جس دی وجہ نال لوک 22 رجب نوں کونڈے کردے نیں۔ ایسے طرح دی بے اصل بے سند تے فضول واقعہ اُتے یقین کرنا، ایس نوں صحیح سمجھنا سب ناجائز تے حرام نیں۔
کہانی گھڑن دی وجہ:
اصل ایہہ وے کہ ایس دن سیدنا امیر معاویہ رضی اللہ عنہ دا یوم وفات اے کجھ بغض صحابہ رکھن والے لوکاں نے سیدنا امیر معاویہ رضی اللہ عنہ دے یوم وفات اُتے خوشی منان لئی ایہہ کہانی گھڑی اے تے اک منظم منصوبہ بندی دے تحت جلیل القدر صحابی رسول دے یوم وفات اُتے خوشی منان دا پروگرام بنایا۔
ایمان توں محرومی دا اندیشہ:
ساڈے سادہ لوح مسلمان ایہنں عام خیرات سمجھ کے برکت دے طور اُتے کھا لیندے نیں۔ چنگی طرح یاد رکھو ایہہ ناجائز تے حرام اے تے خاص طور تے جدوں جلیل القدر صحابی رسول دے یوم وفات اُتے خوشی منان دی وجہ نال ہویا تے اندیشہ اے کہ اللہ تعالیٰ ایمان توں ای محروم نہ فرما دین۔ ایس لئی آپ وی ایس توں بچو تے اپنے دوست احباب رشتہ داراں تے دیگر مسلماناں نوں وی ایس توں بچائو۔
ہزاری روزہ:
کجھ لوک رجب دی 27 ویں تاریخ نوں روزہ رکھنا ضروری سمجھدے نیں تے ایس دا ثواب اک ہزار روزیاں دے برابر سمجھدے نیں جد کہ کجھ لوک ایس نوں مریم روزے دا چن وی کہندے نیں۔ ایہہ سراسر جھوٹ اے ایس لئی ایہہ اعتقاد رکھنا ضعف الاعتقادی اے۔
صلوٰۃ الرغائب:
کجھ لوک رجب دی پہلی رات جمعہ جد کہ کجھ لوک 27 ویں رجب نوں اک نماز پڑھدے نیں جنہوں ’’صلوٰۃ الرغائب‘‘ کہیا جاندا اے۔ ایس دی کل بارہ رکعتاں ہوندیاں نیں ہر رکعت وچ سورۃ الفاتحہ تے اک سورۃ نال ملاندے نیں جدوں بارہ رکعتاں توں فارغ ہوندے نیں تے ایسے تھاں بہہ کے ست وار سورۃ الفاتحہ پڑھدے نیں تے ایس دے بعد سبحان اللہ والحمد للہ ولا الہ الا اللہ واللہ اکبر ولا حول ولا قوۃ الا باللہ العلی العظیم چار وار پڑھدے نیں تے فیر سویرے اٹھ کے روزہ رکھدے نیں ایس دے بعد ایہہ اعتقاد رکھدے نیں کہ ایس طرح کرن نال سو سال نیکی کرن دا ثواب ملے گا۔ ایہہ سراسر بے بنیاد تے جھوٹ اے ایس طرح دی فضیلت کسے حدیث وچ مذکور نہیں۔
اللہ تعالیٰ سانوں شریعت اسلامیہ دے مطابق عمل کرن دی توفیق عطا فرمائے تے بے بنیاد من گھڑت گلاں توں بچن دی توفیق نصیب فرمائے۔آمین بجاہ النبی الامی الکریم صلی اللہ علیہ وسلم