علم نجوم تے پنجاب

زویا اشرف

ساڈے آل دوال سانوں وکھ و وکھ فطرت دے لوک وسدے دسدے نیں ۔کجھ لوک اج وچ رہنا پسند کردے نیں، ایہ اوہ لوک ہوندے نیں جیہڑے اج توں اگے جھات وی پاؤنا پسند نہیں کردے ۔ کجھ لوک اوس کل نوں چیتے کردے رہندے نیں جیہڑا لنگھ گیا اے، تے کجھ لوک ایہو جیہے ہوندے نیں جیہڑے آپ دی اکھ نوں آن والے ویلےا تے رکھدے نیں ۔ آن آلے ویلے دی پیشگوئی کرن دے بتیرے طریقے ہوندے نیں ۔ انسان آپ دے علم تے تجربے دی روشنی وچ آن والے کل دی پیشگوئی کردا اے، پر کجھ لوک ایہو جئے وی ہوندے نیں جیہڑے زمینی علم تے تجربات دی روشنی باجھوں آسماناں وچ وَسن آلی روشنیاں دی مدد نال زمین اتے وسن آلے بندیاں دے کل دی پیشگوئی کردے نیں۔ اوہناں دی پیشگوئی کرن دا مُڈھ انسان دا نہیں سگوں تاریاں تے سییارے دا سبھاؤ ہوندا اے ۔ علم نجوم اک قدیم علم اے جیہدا ذکر دنیا دی قدیم کتاباں وچ لبھدا اے ۔ کوئی نہیں جاندا کہ ایہ علم کاہنوں، کدوں تے کنج شروع ہویا۔ پر ایس علم نوں سکھن تے منن والے ہر دور وچ رہے نیں ۔
علم نجوم ویلے دے پہیے دے وَکھ و وَکھ پھیریاں دے علم دا ناں اے۔ اوہ پھیرے جنہاں دا مُڈھ تاریاں تے سیاریاں دے سفر ہوندے نیں ۔انہاں دی بنیاد اتے اک نجومی اک دیہاڑ توں لے کے ہزار ورہیاں تیکر پیشگوئی کردا اے ۔علم نجوم وچ 12برج ہوندے نیں، جیہڑے انہاں تاریاں تے سیاریاں دا گھر منے جاندے نیں ۔ ہر برج نال کجھ چنگی تے کجھ ماڑی خصوصیات جوڑیاں جاندیاں نیں۔ گھر وانگ وکھ و وکھ ستاریاں تے سیاریاں نال وی اَڈ و اَڈ خصوصیات نوں سانجھ دتی جاندی اے۔ نجومیاں دی پیشگوئی ایس گل اتے مبنی ہوندی اے کہ کیہڑا سیارہ کیہڑے ویلے کیس گھر توں لنگھدا پیا اے ۔ اک ہور گل جیہڑی علم نجوم وچ بہوں اہمیت رکھدی اے اوہ اے دو یا دو توں ودھ سیاریاں دا جوڑھ ۔ جدوں اک سیارہ دوجے سیارے دے کولوں لنگھدا اے ، اوہنوں جوڑھ آکھیا جاندا اے۔
میں تہانوں 2020 وچ ہوئے دو جوڑھاں بارے دسنا چاہنی آں جیہدی چرچا علم نجوم دی دنیا وچ کدوں دی ہوندی پئی سی۔ ایہ دوویں جوڑھ علم نجوم وچ بہوں اہمیت رکھدے نیں۔ پہلاں اسیں گل کراں گےسیارہ زحل تے سیارہ پلوٹو دے اوس جوڑھ بارے جیہڑا 2020 دے شروع وچ ہویا ۔ سیارہ زحل تے سیارہ پلوٹو دا جوڑھ ہر35 کو ورہیاں دے آگے لاگے ہوندا اے ۔ انہاں دا جوڑھ ویلے دے35ورہیاں دے پھیرے نوں شروع کردا اے ۔ تاریخ وچ جدوں وی ایہ جوڑھ ہویا اے دنیا اتے کسے نہ کسے روپ وچ بدلاؤ آیا اے ۔ اوس بدلاؤ دے سبھاؤ دا مُڈھ اے ہوندا اے کہ ایہ جوڑھ کیہڑے برج وچ ہوندا پیا اے ۔ 1914 وچ ایہ جوڑھ برج جوزا وچ ہویا سی۔ اوس ورہے شروات ہوئی سی پہلی جنگ عظیم دی ۔1947 وچ جدوں ایہ جوڑھ برج اسد وچ ہویا تے اوس دوران بھارت نوں برطانیہ توں آزادی لبھی ، پاکستان وجود وچ آیا، پنجاب دی تاریخی وَنڈ ہوئی، انٹرنیشنل مانیٹری فنڈ دا آغاز ہویا تے اسرئیل بنیا۔1982 وچ جدوں ایہ جوڑھ برج تلا وچ ہویا تے دنیا اتے معاشی مارکیٹ وچ ری سیٹ ہویا تے ایڈز نامی بیماری دا آغاز ویکھن نو ں ملیا۔
ایس واری فیر ایہ جوڑھ آپ دے نال اک بدلاؤ دی لہر لے کے آیا اے۔ ایس وار دا سیارہ زحل تے سیارہ پلوٹو دی جوڑھ برج جدی وچ 12جنوری 2020 نوں ہویا ۔ جدوں سیارہ زحل نے اکتوبر2019 وچ سیارہ پلوٹو دے نیڑے دا سفر شروع کیتا تے علم نجوم دے ماہرین دا کہنا سی کہ جوں جوں سیارہ زحل تے سیارہ پلوٹو دی نیڑتا ودھ دی جائے گی توں توں سانوں ایس جوڑھ دے اثرات ویکھن نوں لبھدے جان گے۔ اوہناں دا ایہ وی مننا سی کہ جدوں فروری وچ سیارہ مریخ ایہناں دے نال رلت کریگا اودوں جیہڑے وی حالات دنیا اتے ٹردے پئے ہون گے اوہ زور پھڑ لین گے۔12 نومبر2019 نوں کرونا وائرس دا پہلا کیس جگ دے مورے آیا۔10 جنوری2020 نوں ، جدوں ایہ جوڑھ ہوندا پیا سی، اودوں کرونا وائرس دی وجہ توں پہلی موت دی خبر آئی۔ فروری16نوں سیارہ مریخ نے وی سیارہ زحل تے سیارہ پلوٹو دے نال برج جدی وچ رلت کیتی تے30 مارچ تیکر برج جدی وچ ای رہیا۔ ایہ اوہ ویلا سی جدوں ساری دنیا لاک ڈائون دے پلے پے گئی سی ۔
پچھلی واری جدوں سیارہ زحل تے سیارہ پلوٹو دا جوڑھ برج جدی وچ ہویا سی اوہ ورہا1018 دا سی۔ اودوں مارٹن لوتھر کنگ نے کیتھولک چرچ نظام دے خلاف ہلا بول دتا سی۔ علم نجوم دا مننا اے کہ ایس وار فیر35 ورہیاں وچ دنیا دے کھوکھلے نظام ڈِگن گے تے اوہناں دے نال نال مذہب وچ وی بہوں وڈا بدلاؤ ویکھن نو ںلبھے گا ۔
ایس واری جنوری2020 وچ ہون آلے جوڑھ وچ اک ہور اہم سیارہ موجود سی۔ سیارہ زحل تے سیارہ پلوٹو دے جوڑھ وچ سیارہ مشتری نے وی رلت کیتی ، جیہدے کرکے ایس جوڑھ دی اہمیت ہور ودھ گئی ۔ ایہو جیہاتن سیاریاں دا جوڑھ پچھلی واری 1894 قبل مسیح وچ ہویا سی۔ ایہ اوہ ویلا سی جدوں قدیم بابل ثقافت دا جنم ہویا سی ۔
ہن اسیں گل کراں گے دوجے وڈے جوڑھ بارے جیہڑا ورہے دے آخیرلے حصّے وچ ہویا ۔21 دسمبر2020 نوں ہویا سیارہ زحل تے سیارہ مشتری دا جوڑھ ۔ ایس وار انہاں دوناں سیاریاں دا جوڑھ برج دلو وچ صفر ڈگری اتے ہویا ۔ ایس جوڑھ دی وی اڈیک علم نجوم دی دنیا کدوں دی کردی پئی سی۔ پچھلی واری ایہ جوڑھ2001 وچ ہویا سی ، جیس ورہے امریکا وچ ورلڈ ٹریڈ سینٹر اتے حملہ ہویا تے دنیا پرت کے رہ گئی سی ۔ ایہ جوڑھ جنوری وچ ہوئے جوڑھ نالوں وڈا جوڑھ منیا جاندا اے کیونکہ ایس جوڑھ نے تھاں اتے ای کنے ویلے دے پھیریاں نوں شروع کیتا اے ، جویں20 ورہے ،200 ورہے ،2000 ورہے۔ علم نجوم دے حساب نال ایس ویلے اسیں اوس دور وچ پیر دھر چکے آں جنوں نجومی “برج دلو دا زمانہ” آکھدے نیں ۔ ایس زمانے دی خصوصیات نوں برج دلو دی خصوصیات نال سانجھ دتی جاندی اے۔
برج دلو دے زمانے نوں نجومی اوس ویلے دی چھیڑھ دسدے پئے نے جتھے انسان دے بنائے کھوکھلے تے دقیانوسی قوانین دا مک مکا ہوویگا ، جتھے آپ دے ذاتی منافعیاں توں ودھ کے انسانی اصلاح نو ں ترجیح دتی جائے گی ، جتھے انسانی حقوق دتے جان گے تے غربت، جاہلیت تے انپڑھتا مک جائے گی ۔ ایس کرکے عیسائی تے مسلمان نجومیاں دا مننا اے ک اگلے 20توں 30کو ورہیاںوچ سانوں عیسیٰ  دا نزول ویکھن نوں لبھ جائے گا ۔ یہودی نجومیاں دا وی مننا اے کہ2020 توں اسیں اوس ویلے وچ پیر دھر چکے آں جیہدے وچ اوہناں دا مسیحا آن والا اے۔ مسلمان نجومیاں دا مننا اے کہ ایسے ویلے وچ حضرت مہدی  دا وی نزول ہوویگا تے غزوہ ہند وی ہوویگی ۔
2020 یقیناً اک تاریخی ورہا ثابت ہویا اے۔ ایہدے وچ نہ صرف کرونا وائرس کرکے کنی جندڑیاں متاثر ہوئیاں، سگوں جگ اتے سیاست نے وی پاسا پرتنا شروع کیتا، جیہدے اثرات سانوں کلا آپ دے ملک پاکستان وچ ای نہیں ، سگوں امریکا توں لے کے گوانڈ دے ملک بھارت تیکر ویکھن نوں لبھدے نیں ۔ جے اسیں خصوصاً پنجاب دی گل کریئے تے اوہدے وچ سانوں کنے مہینے توں جاری چڑھدے پنجاب آلے پاسے دی کسان ہڑتال دسدی اے۔بطور اک مسلمان، اک پنجابی تے اک پاکستانی ہون دے ناتے میرے چت وچ بتیرے سوال کھلوندے پئے نیں۔
جے علم نجوم دی روشنی ہیٹھ کیتیاں گئیاں پیشگویاں سچ ہوئیاں ، تے آن والا ویلا بر صغیر لئی کیہو جیہا ہوویگا ؟ ایتھے دے لوکاں دا مستقبل کیہ ہوویگا ؟ آن والے ورہے پاکستان لئی بطور ملک تے پنجاب لئی بطور اک قوم کنج دے ثابت ہون گے؟ کیہ اسیں اوہ لوک ہووانگے جیہڑے حضرت مہدی  تے عیسیٰ  نوں آپ دی اکھاں مورے ویکھاں گے ؟ کیہ غزوہ ہند دا ویلا آن اپڑیا اے؟ میرے سوہنے دیس پنجاب دی بولی تے ثقافت دا مستقبل کیہ ہوویگا ؟ علم نجوم ولوں دتی گیاں پیشگوئیاں وچ کوئی سچائی ہووے یا نہ ہووے، اک گل تے پکی اے ، آن آلے ویلے وچ ہن پنجاب وچکار لمکیا نہیں رہ سکدا۔ یا پنجاب پنجابی بولنوں نت ہٹ کے پنجابی زبان دا اخیر کریگا ، یا فیر پنجاب دی زمین اتے پنجابی بولی تے ثقافت دا بول اُچا ہو جائے گا۔
میری دعا اے کہ پنجاب پنجابی بولنوں کدی نہ ہٹے۔ کیونکہ جے ایہ ہوگیا تے ایس دا مطلب کلا پنجابی بولی دا اخیر نہیں، سگوں پنجابی سیان دا اخیر ہوویگا۔ ایس توں پہلاں کہ پنجابی زبان تے سیان ،سنسکرت ،تے عبرانی جیہی بولیاں وانگ ویلے دی دھول وچ گواچ کے تاریخ بن جان ، سانوں سُتیاں نوں جاگ جانا چاہیدا اے ۔ جے اسیں مذہبی پیشنگوئیاں ول ویکھئے تے مشہور صوفی شاہ والی الله ﷬ دی پیشنگوئی ساڈے واسطے اک وڈا اشارہ اے جیہدے وچ اوہناں نے دسیا سی کہ بھارت دی بت پرست قوم پاکستان وچ داخل ہون دے مگروں دریائے اٹک تیکر اپڑ جائے گی ۔ ہن میں تہاڈے اتے چھڈنی آں کہ تسی کویں ایس پیشنگوئی وچ لکے ہوئے رازاں تیکر اپڑ دے او ۔