چودھراہٹ دی پگ

لکھت: ابرار ندیم

وڈے چوہدری صاحب دی وفات مگروں پچھلے دس ورھے توں چودھراہٹ دی پگ ہن اوہناں دے اکلوتے پُتر چوہدری ہیبت خان دے سر اُتے اے جہناں دے رعب‘ دبدبے تے ہیبت دا ایہ عالم اے کہ اوہناں دی مرضی بناں اوہناں دے علاقے وچ چڑی دا بچہ وی پر نہیں مار سکدا۔ چوہدریاں دی شاید ای کوئی خوبی ہووے جو چوہدری صاحب دی ذات گرامی دا حصہ نہیں۔ خاص طور تے اعلیٰ نسل دے ریس والے گھوڑے تے کتے پالن دے معاملے وچ تے اوہ چوہدریاں دے وی چوہدری نیں۔ انج تے اوہناں دے ہور وی بہت سارے شغل نیں پر لڑائی والے کتے پالنا اوہناں دا وڈا شوق اے۔ انج نہیں کہ کتیاں وچ چوہدری صاحب نوں صرف لڑائی والے کتے ای پسند ہون۔ اوہناں دے کول کتیاں دے سکواڈ وچ بڑے خونخوار شکاری کتے وی موجود نیں جو چوہدری صاحب دی اک تھوڑی جہی ہش تے منٹاں وچ کسے وی شکار دی تکا بوٹی کر دین۔ ایہناں توں علاوہ چوہدری صاحب دے کول ڈیکوریشن ٹائپ کجھ بھوکن والے کتے وی نیں جو ڈیرے تے ہر آن جان والے نوں ویکھ کے اوہدے تے بھوکن لگ پیندے نیں جہناں دی گھبراہٹ ویکھ کے چوہدری صاحب انجوائے کردے نیں۔
چوہدری صاحب نوں کدھرے کوئی کتا پسند آ جاوے اوہ اوہنوں منہ منگی قیمت تے نہ صرف خرید لیندے نیں سگوں فیر اوہدی ٹہل سیوا تے وی پانی وانگوں پیسہ بہاندے نیں۔ دس باراں کمی کمین دن رات کتے دی خاطر مدارت لئی اوہدے اگے پچھے نسدے بھجدے پھاوے ہو جاندے نیں۔ پچھلے دیہاڑیاں چوہدری صاحب نے اک اعلیٰ نسل دا لڑن والا بڑا مہنگا کتا خریدیا۔ کسے شیر وانگوں اُچے قد کاٹھ تے چیتے ورگا پھرتیلا کتا سی ہے وی بڑا زبردست سی‘ جو وی اوہنوں ویکھدا تعریف کیتے بناں نہ رہندا۔ ملن جلن والیاں دے منہ چوں کتے دیاں تعریفاں سن کے چوہدری صاحب انج خوش ہوندے جیویں کتے دی نہیں اوہناں دی اپنی تعریف ہو رہی ہووے۔ کتے دی دیکھ بھال کمیاں تے چھڈن دی تھاں اوہ بطور خاص آپ وی اوہدی خاطرداری وچ سب توں اگے رہندے۔ ظاہر اے چوہدری صاحب دی عزت بے عزتی دا سوال سی۔ کتے دی دیکھ بھال وچ کجھ کمی رہ جاندی تے لڑائی وچ مخالفاں دے کتے توں ہارن دا ڈر سی جہدا سدھا سدھا مطلب صرف کتے دی ہار نہیں سگوں بھرے مجمعے وچ چوہدری صاحب دی اپنی کنڈ دا تھلے لگنا سی جو چوہدری صاحب نوں کسے قیمت تے منظور نہیں سی۔
چوہدری صاحب دی خدمت دا کم سی یاں کتے دی بنیادی وفاداری دا تقاضا کہ کتا وی دناں وچ چوہدری صاحب توں مانوس ہو گیا تے اوہناں دے اشاریاں نوں سمجھن ای نہیں اوہناں تے نچن وی لگ پیندا۔ چوہدری صاحب نوں پوری امید سی کہ ایس واری کتیاں دے دنگل وچ اوہناں دا شیرو ای جتے گا پر چوہدری صاحب تے کتے دوہاں دی بدقسمتی کہہ لوو کہ اینی محنت تے تیاری دے باوجود کتیاں دی لڑائی وچ چوہدری صاحب دا شیرو بھیڑی طرح ہار گیا۔ کتا کیہ ہاریا بھرے میلے وچ مخالفاں دے سامنے چوہدری صاحب دی مچھ تھلے ہو گئی غصے دے مارے چوہدری صاحب دا رنگ لال ہو گیا تے اکھاں رَتیاں ہو گئیاں۔ اوتھے میدان وچ کتے نوں سامنے دے اک رُکھ نال بنھن دا حکم دتا‘ زخماں نال چور لہولہان وچارا کتا اپنے انجام توں بے خبر ہن تک اپنے پھٹ چٹ رہیا سی۔ چوہدری صاحب نے اپنے گن مین دے ہتھ چوں بندوق لئی تے ڈاڈھے غصے دے عالم وچ ہارے کتے تے فائر کھول دتا۔ گولی کتے دی کنڈ دے نیڑے لگی تکلیف دی شدت نال کسے نے فوراً نسنا چاہیا پر گلے وچ بنھی سنگلی پاروں اوتھے ڈگ پیا پر چھیتی اٹھ کے ایدھر اودھر نس کے سنگلی تڑوان دی نکام کوشش کرن لگ پیا۔ سنگلی تڑوان لئی ایدھر ادھر ڈگدے ڈھیہندے کتے دیاں اکھاں وچ تکلیف تے حیرانی دے ملے جلے تاثرات سن جیویں اوہنوں یقین نہ ہووے کہ اوہدے تے گولی اوہدے ای مالک نے چلائی اے جہدے لئی اجے کجھ دیر پہلاں اوہ اپنی جان دی بازی لا رہیا سی۔ چوہدری صاحب دے سر تے اوس ویلے خون سوار سی اوہناں نے بے زبان کتے دے جذبات سمجھے بناں اوہدے تے اک ہور فائر کھول دتا جو کتے دیاں پسلیاں دے وچکاروں ہوندا ہویا شاید اوہد ے دل نوں چیر گیا۔ کتا ایس فائر نال زمین تے ڈگ گیا اوہدیاں اکھاں ہن وی کھلیاں سن پر ہن اوہناں وچ بے یقینی دی تھاں اپنے مالک دی بے وفائی دا گلہ تے افسوس سی۔ کتے دے کرب توں بے خبر چوہدری صاحب نے اپنی جھوٹی انا دی تسکین لئی اوہدے تے لگاتار تن چار فائر ہور کیتے جہدے بعد وچارا کتا ہور تڑپے بناں ویکھدیاں ای ویکھدیاں کسے کتے دی موت مر گیا۔ چوہدری صاحب نے اگے ودھ کے مردہ کتے نوں اک ٹھوکر ماری تے مخالفاں نوں سنان لئی اُچی آواز وچ کہیا۔ اوئے رحمیااگلی واری مقابلے لئی ہن توں ای کسے نسلی کتے دی تلاش شروع کر دے تے یاد رکھ اگلے دنگل وچ میرا کتا ہاریا تے کتے دے نال نال تینوں وی گولی مار دیواں گا۔٭٭