این آر او ہے کیہ؟

پاکستانی سیاست دی تریخ تے ہن تک ایہو دسدی اے کہ عسکری حکومت دے دور وچ سیاستداناں نے این آر او راہیں بیرون ملک قیام تے اسیری توں بچن دے حیلے کیتے تے جو دتے گئے اوہ این آر او سن۔ ہن کہڑا این آر او اے جہدا وزیراعظم رولا پاندے رہندے نیں بناں سیاق و سباق دے کوئی کیویں سمجھے کہ کہڑا این آر او کون منگ رہیا اے۔ این آر او وزیراعظم کس حیثیت وچ دین نہ دین دی رٹ لا رہے نیں۔ مشرف نے تے بطور عسکری طاقت دے این آر او دتا سی پر کیہ کھڈاری یاں کسے ذریعے نال بنن والے وزیراعظم وی انج کر سکدے نیں جد کہ سامنے کوئی مدعی وی نہ ہووے‘ ایہ تے انج ای ہویا بقول اقبال
ہم تو مائل بہ کرم ہیں کوئی سائل ہی نہیں
تے جے کوئی سائل ہے تے وزیراعظم اوہدا ناں دسن ظاہر اے وزیراعظم وچ ایناں رکھ رکھائو تے دیدلحاظ تے ہے نہیں کہ اوہ ناں نہ لے سکن۔ پرانے پنجاب دیاں عورتاں اپنے شوہر دا ناں عزت دے مارے نہیں سن لیندیاں۔ پرانیاں زباناں تے صوفیاء دے ہاں کھسم مالک و مختار نوں کہندے نیں اک معنی دشمن دا وی اے وزیراعظم جس طرح اپوزیشن دے لیڈراں دیاں شکلاں تے لہجے وگاڑ وگاڑ کے سانگ اتاردے نیں اوہناں توں ایہ امید نہیں کیتی جا سکدی کہ اوہ ادب وچ ناں نہیں لے رہے کھل کے کہن کہ میرے توں این آر او دی توقع کیوں کیتی جا رہی اے جے میں صرف عوامی ووٹاں نال آیا واں تے پارلیمانی نظام وچ تے ایہدی کوئی گنجائش نہیں حالاں کہ سسٹم دے ماتحت جے چلیا جاوے تے وزیراعظم کسے نوں ملک پاکستان وچ 17ویں گریڈ دی نوکری دین دے وی اہل نہیں۔ جے پوری اپوزیشن یاں کجھ بندیاں نوں این آر او دین جھٹ نال کہن میرے توں بلاول یاں شہبازشریف این آر او منگ رہے تے دوویں موصوف سکرین تے آ کے فوراً جھوٹا کرن یاں ثبوت منگن وزیراعظم موصوف یاد رکھن ہن چھوٹے چھوٹے گھراں وچ وی جرم تے ایس قسم دی ثبوت منگے جاندے نیں ایہ الزام تراشی دا آخری باب اے جو ہن ختم ہون والا اے جہدے تحت گھراں وچ بہوبیٹیاں تے الزامات لگے تے اوہ اپنے مقام توں فارغ ہوئیاں مینوں انج وی الزام تراش لوکاں توں بڑی نفرت اے۔
کجھ حوصلہ تے بندے وچ ہونا چاہیدا اے پوری اپوزیشن نوں چور ڈاکو کہن توں پہلاں ایناں ضرور سوچ لینا چاہیدا اے ایہدے وچ باریش نمازی‘ بڑے دیانتدار‘ اعلیٰ اخلاق‘ کردار دے لوک وی شامل نیں فیر انج وی اپوزیشن گھٹو گھٹ ملک دی ادھی آبادی توں ودھ اے تریجے کس کلیے دے تحت پی ٹی آئی چور ڈاکو نہیں‘ جد کہ ہر طرح دے قبضہ گروپ‘ چینی‘ آٹا مافیا موجود نیں تھوڑا جیہا حوصلہ کرکے ہن ڈاکو چور دی فرداً فرداً واردات‘ اوہدے ثبوت تے حقائق تحریری صورت وچ سامنے لیاندے جان‘ خالی چور ڈاکو کہن نال کم نہیں چلے گا۔ تہانوں ملک دے سب توں وڈے انتظامی عہدے تے بٹھا دتا گیا اے۔ عورتاں وانگوں کتی کمیٹی کہن دی تھاں مرداں وانگوں پرھیا لائو جرماں دی فہرست پڑھو جرح کرائو میڈیا نوں حقائق وکھان لئی استعمال کرو صرف اے آر وائی دے حقائق تے دنیا چور ڈاکو نہیں ہو سکدی۔ صابرشاکر جہڑے اپنے ناں دے الٹ نیں اپنے ٹی وی تے دتے گئے افتخارصاحب نوں بیان کہ اوہناں نوں قید کیتا گیا ذاتی رنجش پاروں ملکی تقدیر نال نہیں کھیڈیا گیا کیوں جے ذاتی سطح تے ساڈے ساریاں نال بہت کجھ ہو چکیا اے مینوں آپ تن ورھے لہور توں باہر سٹ دتا گیا نوکری وچ‘ پر ایہدا ایہ مطلب نہیں کہ میں ملکی حقائق نوں مدھ دیواں یاں ایہ کہواں کہ پی ایم ایل (ن) ملکی اثاثے نہیں بناندی اوہناں نوں سڑکاں تے پل بنانے نہیں آئوندے۔ ایس لئی وزیراعظم صاحب ذاتی اختلاف توں ذرا ہٹ کے ویکھو جے تسیں جہانگیر ترین نوں زراعت وچ ماہر ہون دی بناء تے سارے سیاسی تے دفتری پروٹوکول توڑ کے آفیشنل میٹنگاں وچ بٹھاندے رہے تے شہبازشریف توں لہور نوں خوبصورت بنان‘ سڑکاں دے جال پھیلان تے پلاں دے وسیع ٹریفک نوں کنٹرول کرن بارے مشورے لے سکدے او کیوں جے تسیں ملک دے واحد ایماندار بندے او ایس لئی ایہ ڈر وی نہیں کہ تسیں کک بیک لوو۔
شہزاداکبر ولوں وی موسوی چیکدا رہوے اسیں اکھاں بند کر لواں گے پر خدارا ملکی مشینری نوں چلا دیو رکے ہوئے پل سڑکاں منصوبے چالو کر دیو رہ گئی تہاڈی پسندیدہ تعلیم تے صحت تے ایہدا حشر تسیں ویکھ ای رہے او جو ہو رہیا سی اوہ تے ہون دیو بعد وچ اسیں پڑھ لکھ وی جاواں گے صحت وی صحت کارڈاں وچ ہو جاوے گی یقین کرو تہاڈے حلف چکن دے دن توں اج تک اڑھائی پونے تن ورھے وچ اک اٹ وی نہیں لگی جو ٹویا شہبازشریف دے منصوبیاں دا جتھے رہ گیا سی اوتھے دھرے دا دھرا شہبازشریف نوں یاد کر رہیا اے کرونا وی ڈینگی دی شکستگی تے مسکرا کے سوچ رہیا اے شہبازشریف تے مینوں جڑوں پٹ دیندے چلو ہن باقی گلاں چھڈو جلدی نال ناں دسو این آر او منگن والیاں دے تے اپنی اپوزیشن دے ہن لوکاں نے ہور قیداں دا مزا نہیں لینا کہ اوہ جس غربت دی غلامی وچ جا رہے نیں اوہناں نوں کجھ نہیں سجھ رہیا ہن چور ڈاکو دی گردان نال کم نہیں چل رہیا ملک وچ جنے چور نیں اوہناں نوں راتوں رات پھڑ لوو سزاواں دیو سانوں کیہ؟ سانوں تے تہاڈے ڈکشن‘ تہاڈے غصہ بھرے چہرے تے بڑے مایوس کن لہجے توں پریشانی اے تسیں کرکٹ دے میدان وچ نہیں نہ ای اسیں بھارت آں اسیں تہاڈے پاکستانی عوام آں جہناں وچوں کئی کروڑ نوں کرکٹ پسند ای نہیں۔ کوئی ہاکی پسند کردا اے کوئی فٹ بال کوئی ٹینس ایہناں کھیڈاں نوں فروغ دیو۔ سب توں پہلے اپنے خوشامدیاں دی جیکٹ اتروائو تے اوہناں دی کرکٹ ٹرمنالوجی بولنی منع کرائو کیوں جے اک مخصوص کھیڈ دی گل سجدی وی اے تے صرف تہاڈے تے‘ ایہناں خوشامدیاں نوں صبح شام نو نو میل دوڑ لوایا کرو تاں جے ایہ کھیڈ تے گل کردے چنگے لگن تے براہ کرام کھیڈ دا موضوع بڑا سنجیدہ سیاسی ملکی تے بین الاقوامی موضوعات توں وکھرا رکھیا کرو تے اگوں این آر او سیاق و سباق سنے پیش کرو نہیں تے جان دیو۔ ہوا وچ گلاں نہ کیتا کرو۔٭٭