سینیٹ الیکشن : وزیر اعظم دی آمد اُتے اپوزیشن دی شدید نعرے بازی
اسلام آباد (پنجابی میڈیا گروپ ) وزیراعظم عمران خان دی قومی اسمبلی وچ آمد اتے حکومتی تے اپوزیشن دے ارکان آمنے ساہمنے آگئے تے شدید نعرے بازی کیتی ۔الیکشن کمیشن حکام نعرے لگان توں منع کردے رہے ۔تفصیلات دے مطابق بدھ دے دیہاڑے وزیر اعظم عمران خان سینیٹ الیکشن لئی ووٹ کاسٹ کرن لئی قومی اسمبلی حال اپرے تے حکومتی اراکین اسمبلی نے ڈیسک وجا کے وزیر اعظم دا استقبال کیتا تاہم ایوان وچ موجود پیپلز پارٹی ولوں شدید نعرے بازی کیتی تے جئے بھٹو دے نعرے لگاندے رہے۔ ایس موقع اتے ریٹرننگ افسر ولوں مسلسل تنبیہ دے باوجود وواں پاسیوں اراکین قومی اسمبلی نے نعرے بازی کیتی۔ الیکشن کمیشن حکام نے نعرے لگان توں منع کردیاں ہویاں تنبیہ کیتی کہاگر ہن نعرے لگائے گئے تے ایکشن لیا جاوے گا۔ ووٹ کاسٹ کرن دے بعد حکومتی اراکین نے وزیراعظم دے نال پرجوش مصافحہ کیتا تے ایڈوانس وچ حفیظ شیخ دی کامیابی دی مبارکباد دیندے رہے۔ ایس موقع اتے اراکین اسمبلی نے عمران خان دے نال سیلفیاں وی بنوائیاں۔ بعدازاں وزیر اعظم اپنے چیمبر وچ چلے گئے ۔





















