کشمیری طلبہ نال اِک دن
جدوں جتھے بالاں توں مستقبل دے حوالے نال پچھیا گیا اکثریت نے کہیا کہ فوج وچ بھرتی ہون دے خاہش مند آں
عتیق انور راجہ
جمعے دی شام فالکن کمپلیکس پاکستان ایئر فورس کلب یا (AFOHS) لہور اپڑیا تے ڈی جی پی آر وچ تعینات پرنٹ میڈیا دی سربراہ باہمت تے باوقار محترمہ روبینہ خالد نے مسکراندے ہوئے جی آیاں نوں کہیا۔ ایسے سویر ملک سلمان صدر پاکستان فیڈریشن آف کالمسٹ نے میسج کیتا ، کل 27 فروری اے ایس دن سائٹ فائونڈیشن دے نمائندے سانوں اوتھے چار پنج سکولاں دا دورہ کروان گے۔ اسیں میڈیا دے دوستاں دے نال دو دن لئی وادی نیلم دی سیر نوں جا رہے آں۔ تسیں اک سینئر لکھاری او ایس لئی اسیں چاہنے آں کہ تسیں اپنی مصروفیات وچوں ویلا کڈدے ہوئے ساڈے نال چلو۔ قارئین تہانوں یاد ہوئے گا کہ دو سال پہلاں 27 فروری دے دن ای ساڈی ایئر فورس دے بہادر جواناں نے دشمن دیش بھارت دے دو جہاز ڈیگے سن تے فیر ایہناں دے پائلٹ ابھی نندن نوں چاہ پلا کے جذبہ خیر سگالی دے تحت واپس گھل دتا سی۔ رات 10 وجے دے نیڑے ٹی وی اینکرز، تجزیہ کار تے کالم نگار وی اوتھے اپڑ گئے۔ مظفر آباد توں پنج کلو میٹر پہلے دریائے نیلم دے کنارے بنے اک ہوٹل وچ ناشتہ توں بعد دوستاں دے آپس وچ تعارف کروایا گیا۔ دوبارہ سفر شروع ہویا تے بارش دی خوشگوار پھوار ادھ کلے شیشیاں توں گڈی وچ ساڈی ساہواں نوں مہکان لگی۔ ساڈا پڑاو ’’کٹہن ‘‘ دے مقام اُتے سی۔ جدوں اسی اوتھے اپڑے تے بارش بوہت تیز ہو رہی سی۔موسم بوہت چنگا سی پر صحافیاں دے چہریاں اُتے اک بے چینی وی واضح ویکھی جا سکدی سی یعنی ہر ویلے سب دی خبر رکھن والے تے سب نوں خبر اپڑان والیاں دا رابطہ دنیا توں کٹ چکیا سی۔ پتہ چلیا کہ ایس علاقے وچ صرف اک ای نیٹ ورک دے سگنل آندے نیں۔ یا بارش وچ ارام دہ بستریاں وچ بہہ کے ماضی دیاں کہانیاں سنی سنائیاں جان یا ہمت کر کے نیڑے کسے دکان توں اوتھے چلن والی سم دا حصول ممکن بنایا جائے۔ سب لوک اپنے کمریاں وچ جا لُکے پر ملک توصیف میرے نال سم دی تلاش وچ نکل پیا۔ کافی تلاش دے بعد اک دکان نظر آئی پر فنگر مشین بجلی بند ہون دی وجہ نال سانوں وسدی بارش وچ واپسی دی راہ لینی پئی۔ کہ انج سڑک کنارے اک چاہ خانہ نظر آیا تے فوراً ایس ول لپکے۔ رات ڈائنگ ہال وچ کھان توں بعد شعر و ادب دی محفل جمی تے سب نے کجھ نہ کجھ سنا کے داد وصول کیتی۔
اگلی سویر نماز دے بعد باہر ویکھیا تے اسمان صاف نظر آ رہیا سی ۔ جدوںناشتے لئی بلایا گیا تے دھپ نکل چکی سی۔ اک وار فیر ناشے دی میز اُتے روبینہ جی میرے نال سب توں پہلے موجود سن۔ بوہت جلدی اسیں کنڈل شاہی واٹر فال دے کنارے بنے مصطفائی سکول دے باہر موجود ساں۔ جدوں علاقے وچ بجلی دی لوڑ پورا کرن لئی پن بجلی دا یونٹ لایا گیا تے پانی دے حصول لئی کیتی جان والی کوشش دے نال کنڈل شاہی واٹر فال وی تیار کر لئی گئی۔ لکڑی دے کمریاں وچ بیٹھے قوم دے معمار واقعی پرجوش نظر آ رہے سن۔ نعت سنن دی فرمائش کیتی تے بچے تیار سی، تقریر لئی کہیا گیا تے اک بچے نے کمال ای کر دتا تے فیر اک طالب علم نے روایتی ماہےے ٹپے سنا کے میلہ لُٹ لیا۔ ایس توں بعد اسیں مزید تن سکولاں وچ گئے۔ سکول دے پرنسپل نے دسیا کہ ایس علاقے وچ لوک بوہت غریب نیں تے ایہناں نوں اپنے بالاں دے تعلیمی اخراجات پورے کرن وچ کافی مشکل سی۔ انج سائٹ فائونڈیشن والیاں نے ساڈے نال رابطہ کیتا تے بالاں دی سکول فیس، یونیفارم ، سٹیشنری، تے کمپیوٹر سسٹم مہیا کرن دا سلسلہ شروع کر دتا۔ سانوں اک انج دی بچی نال ملوایا گیا جس دے ماں باپ بھارتی گولا باری دی وجہ نال شہید ہو چکے سن۔ آپ ایس دے اک ہتھ دی انگلیاں گولے دا شیل لگن نال کٹ چکیاں سن پر اوہ باہمت بچی نہ صرف اپنی تعلیم جاری رکھے ہوئے سی بلکہ گھر وچ موجود اپنے اک بھرا دی پرورش دا ذمہ وی ایس دے سر سی۔ ہر کدھرے بچے بوہت پرجوش تے پر امید نظر آئے۔ جدوں جتھے بالاں توں مستقبل دے حوالے نال پچھیا گیا اکثریت نے کہیا کہ فوج وچ بھرتی ہون دے خاہش مند آں۔
ہجے دل وچ خواہش سی کہ مزید اوتھے رکیا جائے پر مسافر نوں آخر واپسی دی راہ لینی ای ہوندی اے۔ مظفر آباد وچ روایتی کشمیری کھانے دا لطف لے رہے ساں کہ اے ایس پی خرم تے اے سی سٹی راجہ صداقت خان ملک سلمان تے میڈیا دے نمائندیاں نال ملن چلے آئے۔ رات اسلام آباد چاہ دا اہتمام سی اوتھے ملک سلمان دے دوست جیہڑے حال ای وچ فوج توں ریٹائر ہوئے نیں ایہناں نوں دسیا گیا کہ کشمیر دے طلبہ دا فوج وچ بھرتی ہون دا جذبہ کنج دا اے جس اُتے صاحب نے فرمایا کہ میری ذاتی رائے اے کہ سب بالاں نوں سائنس، آئی ٹی تے دوجے تعلیمی شعبیاں وچ وی اپنی قابلیت نوں منوان دی کوشش کرنی چاہیدی اے۔
