کامیاب مذاکرات تے آخری اوور

لكهت: سعد اللہ شاہ

کدی کدی لگدا اے کہ حکومت تے لوک دو وکھریاں وکھریاں چیزاں نیں کہ گھوڑا گھاہ نال یاری لاوے گا تے کھاوے گا کیہ‘ ایتھے تے گھوڑے ویچن تے گھوڑے نسان والے دوویں موجود نیں۔ میں تہانوں شروع توں ای پریشان نہیں کرنا چاہندا کہ آخر تہانوں کالم وی پڑھانا اے۔ مینوں تے سراج الحق صاحب دا بیان پڑھ کے ہاسا آ گیا کہ اوہناں نے اپنے بیان وچ عجیب قافیہ پیمائی کیتی کہ گھوڑے کھوتے ملا دتے نیں گل اوہناں دی ٹھیک اے پر شاعرانہ نہیں کہ قافیہ دا صوتی خیال ضروری سی۔ اوہناں آکھیا کہ نوٹاں‘ لوٹیاں ، بوٹاں تے جھوٹھیاں دی سیاست ختم ہونی چاہیدی اے۔ ہن ویکھو کہ ایہدے وچ نوٹاں‘ لوٹیاں دا قافیہ وکھرا اے تے بوٹاں تے جھوٹھیاں دا وکھرا۔ اوہناں نے ایہ گل کرکے دریا نوں لوٹے وچ بند کر دتا اے کہ جہڑے لوک آپ وک جاندے نیں اوہ لوکاں دے حقوق دا تحفظ کیویں کرن گے۔ مزے دی گل تے ایہہ وے کہ ایہ وِکن والے قیمتی تے لوکاں دے ووٹاں نال ای ہوندے نیں۔ انج ہن تے ایہ تکلف وی نہیں رہیا یاں ایس طرح کہہ لوو کہ ہن ووٹ وی تکلف ای اے۔
ہن آئونے آں سرکاری ملازماں دے دھرنے تے 25فیصد ایڈہاک ریلیف ول‘ حکومت دی تے جیویں گھٹی وچ اے کہ کوئی چنگا کم وی چنگے طریقے نال نہیں کرنا۔ روزانہ مہنگائی ای اوہناں دا ٹریڈمارک اے۔ جدوں تسیں سرکاری ملازماں نوں کندھ نال لائو گے تے اوہ کیہ کرن۔ میں عبدالغفور ایڈووکیٹ نال وکیلاں دے رویے تے شکوہ کیتا تے کہن لگے کہ ایتھے کہڑا کم سدھے طریقے نال ہوندا اے حکومت نال اوہدی زبان وچ ای گل کرنی پیندی اے۔ انج وی کہیا جاندا اے کہ ماں وی بناں روئے بچے نوں ددھ نہیں دیندی۔ انج ماں تے ایہ حکمت عملی دے طور تے کردی اے نہیں تے اوہ تے بچے نوں گرم ہوا توں وی بچاندی اے اوہنوں پیار کردی اے جد کہ حکومت تے بلاثابت ہوئی اے۔ خرابی بسیار مگروں وچارے سرکاری ملازماں تے کہ جہناں وچ استاد وی سن کس انداز وچ تشدد کیتا گیا۔ دھوں دے مرغولے اٹھدے رہے ربڑ دیاں گولیاں چلدیاں رہیاں تے میدان جنگ دی صورت بنی رہی۔ سرکاری ملازم وی بار بار دے ڈسے ہوئے سن تے اوہناں نے اوہناں دے وعدیاں تے اعتبار کرن توں انکار کر دتا تے ہن وی کہن نوں مذاکرات کامیاب ہو گئے نیں تے تنخواہ وچ 25فیصد ایڈہاک ریلیف مل گیا اے پر تسیں ویکھدے جائو کہ حکومت ہن کیہ کرے گی۔ جو لٹن آئے ہون اوہ لٹدے نہیں۔ اللہ کرے میرا خدشہ غلط ہووے تے سرکاری ملازماں دے نال ہون والے وعدے پورے ہو جان کہ بظاہر تے ٹائم سکیل تے اپ گریڈیشن دا فیصلہ ٹھیک طور تے عمل پذیر ہو جاوے۔ وعدے کرن وچ تے انج وی خان صاحب شیر نیں۔ وعدے وچ تے سرائیکی صوبہ وی سرفہرست سی۔ انج چلدے چلدے اک کمال دی گل کر جاواں کہ لوکاں دے نمائندے وی حکمراناں دے نال رَل کے اپنا الو سدھا کردے نیں تے فیر جدوں انتخاب نیڑے آئوندے نیں تے اپنا الو کسی ہور ٹاہنی تے جا بٹھاندے نیں:
خوش خیالی نے بھی کیا معجزہ سامانی کی
اب ہمیں کاغذی پھولوں سے بھی خوشبو آئے
چلو چنگا ہویا کہ مارکٹائی دا انت چنگا ہویا کہ مطالبے من لئے گئے تے ملازماں نے ڈی چوک وچ رقص کیتا۔ انج اوہ شکرانے دے نفل ادا کردے تے چنگا سی۔ خیر خوشی دا اظہار اے پر پرویز خٹک‘ شیخ رشید تے علی محمد دی شیلنگ تے تشدد تے معذرت وی تے ضروری سی۔ چلو شکوے شکایت کیہ کرنے کہ ہوندا ہواندا تے فیر وی کجھ نہیں ہن ویکھو کہ ساڈے مرغزار کالونی وچ بڑے پربندھ دے نال پچھلے دیہاڑے سویرے نو وجے توں اڑھائی وجے تک بجلی نہیں آئوندی تے ہن اوہناں نے اک ہور دن داء لانا شروع کر دتا اے تے ایہ کوئی دن متعین نہیں سوموار یاں بدھ۔ اخبار وچ وزیر ولوں خبر لگ جا ندی اے کہ غیراعلانیہ لوڈشیڈنگ نہ کیتی جاوے ایہ اوناں ای بے معنی بیان اے جس طرح ساڈے محترم وزیراعظم مہنگائی دی ہر لہر تے کہندے نیں مہنگائی نوں کنٹرول کیتا جاوے جیویں کہ ایس چڑیل نوں کنٹرول کسے نے مریخ توں آ کے کرنا اے۔ ٹیلی فون نیٹ والیاں دا وی سن لوو جدوں خراب ہوندا اے تے اوہناں دیاں تسلیاں تے بہہ جانے آں تے اوہ بڑی پھرتی نال اُتوں تھلے فون کردے نیں تے فیر اک فون نمبر دیندے نیں کہ جے ہن وی ٹھیک نہ ہووے تے ایہدے تے رابطہ کرو تے فیر ایہ نمبر کدی نہیں ملدا۔ کوئی مرے یاں جیوے نظام انج ای چلنا اے تبدیلی والے وی ایہدے مرہون منت نیں کیہ کریئے۔
چلو آخر وچ کرکٹ دا تذکرہ کر دینے آں کہ سانوں ایہدے نال وی پرانا عشق اے خاص طور تے رضوان نوں ٹونٹی ٹونٹی وچ سنچری بنان تے مبارک دینی اے ایہ سوکھا نہیں سی۔ دوجے پاسے زیادہ خوشی دی گل ایہہ وے کہ اوہ دوجے پاکستانی تے دنیا دے دوجے وکٹ کیپر نیں جہناں نے تناں فارمیٹ یعنی ٹیسٹ‘ ون ڈے تے ٹونٹی ٹونٹی وچ سنچری سکور کیتی اے۔ رضوان نے تے آئوندیاں ای اپنے ہون دا احساس دوا دتا سی تے ایہ وی کہ اوہنوں کیوں نظرانداز کیتا جاندا رہیا۔ ساڈے دوست محمد عباس مرزا نے پوسٹ لا دتی سی کہ آخری اوور غلط دے دتا گیا اے۔ خیر اسیں سنسنی خیزی دے بعد تن رنز توں میچ جت گئے پر مینوں آخری اوور دی گل توں اک ہور آخری اوور یاد آ گیا۔ جے تہانوں لہور قذافی سٹیڈیم دا میچ جہڑا پاکستان تے بھارت وچکار ہویا سی یاد ہووے تے اوس ون ڈے میچ وچ آخری اوور سلیم جعفر نوں دتا گیا سی۔ اوس اوور وچ اوہنوں 18 رنز پئے سن۔ مزے دی گل ایہہ کہ پاکستان 18 رنز توں ای ہاریا سی۔ میں کیوں جے اوس میچ وچ اوتھے موجود سی اک ہور گل یاد آ رہی اے کہ سری کانت آئوٹ ہون تے کھڑا رہیا تے کیپٹن عمران خان نے اوہنوں فیر کھیڈن لئی کہیا۔ خان صاحب وچ بڑی سپورٹس مین سپرٹ سی بس سی توں اگے میں کجھ نہیں لکھ سکدا کہ غالب دا شعر یاد آ رہیا اے:
تھی وہ اک شخص کے تصور سے
اب وہ رعنائی خیال کہاں