مسلم لیگ نوں توڑن دی کوشش کرن والے آپ ٹُٹ رہے نیں: مریم نواز
اسلام آباد( پنجابی میڈیا گروپ)مسلم لیگ(ن) دی نائب صدر مریم نواز نے آکھیا اے نوازشریف دے بیانیے دا ڈنکا اج پورے دیس وچ وج رہیا اے۔ مسلم لیگ نوں توڑن دی کوشش کرن والے آپ ٹُٹ رہے نیں۔ اسلام آباد وچ مسلم لیگ (ن) دی جنرل کونسل دے اجلاس نال خطاب کردیاں کہنا سی ایہ لوک سینیٹ الیکشن وچ شکست مگروں شکست خوردہ شکلاں لے کے ٹی وی تے آ گئے سن۔ کہندے نیں سینیٹ الیکشن وچ پیسہ چلیا، کیہ ضمنی الیکشن وچ وی پیسہ چلیا سی؟ پیسہ نہیں چلیا، (ن) لیگ دی ٹکٹ چلی اے۔ اوہناں دا کہنا سی کوئی کسے غلط فہمی وچ نہ رہوے۔ مسلم لیگ (ن) دا ورکر جاگ چکیا اے۔ لوک سرکار جاؤن دی دعاواں کر رہے نیں۔ میں ممبران قومی اسمبلی نوں وی دوواں ہتھاں نال خراج تحسین پیش کرنی آں۔ ساڈے سارے ارکان نے ونازشریف دے کہن تے یوسف رضا گیلانی نوں ووٹ دتا۔ مریم نواز دا کہنا سی نوازشریف نوں اک جھوٹے اقامے تے باہر کیتا، اوہناں دا خیال سی کہ ایہ لوک سمجھ رہے سن کہ شہباز شریف، حمزہ شہباز، شاہد خاقان ، خواجہ آصف تے احسن اقبال نوں جیل سُٹ کے (ن) لیگ نوں توڑ دین گے۔





















