ساڈی فورس ہر چیلنج نال نمٹن لئی چوکس نیں ،شیخ رشید
اسلام آباد(پنجابی میڈیا گروپ)وفاقی وزیر داخلہ شیخ رشید نے آکھیا اے کہ پلس تے سکیورٹی فورسز نے جاناں دا نذرانہ پیش کرکے امن قائم کیتا۔ افغانستان توں ٹی ٹی پی دوبارہ منظم ہو رہی اے۔ وزیر داخلہ شیخ رشید نے اسلام آباد وچ پریس کانفرنس دے نال خطاب کردیاں ہویاں آکھیا اے کہ ساڈی فورسز ملک نوں درپیش سارے چیلنجز دے نال نمٹن لئی چوکس نیں۔ لہور تے کراچی وچ ات گردی دے خطرات موجود نیں۔ وفاقی وزیر داخلہ شیخ رشید مستونگ تے وزیرستان وچ ات گرداں دے خلاف آپریشن دے دوران کالعدم تنظیماں دے اہم کمانڈرز دے مارے جان اتے ردعمل دے رہے سن۔ اوہناں نے ات گرداں دی سرگرمیاں وچ اضافے ولوں اشارہ کردیاں ہویاں آکھیا اے کہ افغانستان وچ ٹی ٹی پی دے ات گرد دوبارہ منظم ہو کے پاکستان وچ تخریبی کارروائیاں کرن دی منصوبہ بندی کررہے نیں۔ پچھلی شب مستون گ دے نیڑے سی ٹی ڈی نے خفیہ اطلاعا ت اتے ات گرداں دے ٹھکانیاں اتے چھاپہ ماریا جہدے دوران 5ات گرد ہلاک ہوگئے ۔ دوجے پاسے وزیرستان دے علاقیاں دتہ خیل تے زوئیدہ وچ وی سکیورٹی فورسز نے آپریشن کیتا۔ جہدے دوران 4ات گرد ہلاک ہوگئے۔ ہلاک ہون والے ات گرداں وچ کالعدم تحریک طالبان پاکستان (ٹی ٹی پی) دا اہم کمانڈر شامل سی، عبدالآدم نامی خطرناک اتگرد سیکورٹی فورسز دے خلاف 20 توںزائد کارروائیاں وچ ملوث سی۔





















