غزل
یونس بھٹی
دفتر باہر قطار تے ویکھو بابو جی
ہوندے لوک خوار تے ویکھو بابو جی
سوکھی گل نہیں ساڈی تھاں تے وی
کڈھ کے دن دو چار تے ویکھو بابو جی
ماڑے وی انسان تہانوں لگن گے
جھٹ لئی ’’میں‘‘ نوں مار تے ویکھو بابو جی
غیب جے آٹا چینی گھیو روزانہ ای
آ کے کدی بزار تے ویکھو بابو جی
دل دے وچ سکون تے تکنا، ماڑے دا
اک دن بُتا سار تے ویکھو بابو جی
بھٹی دیوے توں ای دیوے بلدے نیں
چانن کجھ کھلار تے ویکھو بابو جی
