غزل
بابا نجمی
اُچا نعرہ لا کے بولو، بھٹو اج وی جیوندا اے
قاتل دے گھر جا کے بولو بھٹو اج وی جیوندا اے
ظالم نال کرو نہ گلاں فلسفیانہ رنگاں وچ
ڈنڈا ذرا وکھا کے بولو بھٹو اج وی جیوندا اے
من گئی اے دنیا ساری چانن والے ایدھر نیں
سچیو ڈھول وجا کے بولو بھٹو اج وی جیوندا اے
جہڑے لوک مُکا بیٹھے نیں شیشے دے لشکارے نوں
میرے شعر سنا کے بولو بھٹو اج وی جیوندا اے
اج نواں نہیں اٹ کھڑکا دیوے نال ہنیرے دا
اپنے پیر جما کے بولو بھٹو اج وی جیوندا اے
موڈھے اُتے رکھ صلیباں سر تے بنھو کفناں نوں
سُتے لوک جگا کے بولو بھٹو اج وی جیوندا اے
سارے شہر چ کلاّ بابا سچے اکھر لکھدا اے
ایہنوں اگے لا کے بولو بھٹو اج وی جیوندا اے
