کورونا پاروںپنجاب دے 7 شہراں دے تعلیمی ادارے2ہفتے لئی بند کرن دا فیصلہ
اسلام آباد(پنجابی میڈیا گروپ)کورونا وائرس دے ودھدے ہوئے کیسز دے پیش نظر لہور سنے پنجاب دے 7شہراں وچ تعلیمی ادارے 2ہفتے لئی بند کرن دا اعلان کردتا گیا۔ شفقت محمود نے آکھیا پیر توں بہار دی چھٹیاں شروع ہون گیاں۔ معاون خصوصی ڈاکٹر فیصل سلطان نے وفاقی وزیر تعلیم شفقت محمود دے ہمراہ پریس کانفرنس کردیاں ہویاں آکھیا اے کہ کرونا کیسز دی شرح وچ اضافہ ہو رہیا ے۔ کرونا کیسز ودھن دے باعث ہسپتالاں اتے بوجھ ودھیا اے۔انتظامی ادارے سمارٹ لاک ڈائون اتے عمل کرن۔ اوہناں نے مزیدآکھیا اے کہ تفریحی پارک شام 6وجے بند کرن دا فیصلہ کیتا گیا اے۔ ریسٹورنٹس دے اندر کھان پین اتے پابندی برقرار روے گی۔ ریسٹورنٹس وچ آئوٹ ڈور ڈائننگ دی پالیسی جاری روے گی۔شفقت محمود نے مزیدآکھیا اے کہ لہور‘ فیصل آباد، گوجرانوالہ، گجرات، ملتان، راولپنڈی، سیالکوٹ دے تعلیمی ادارے 15 مارچ توں 2 ہفتے لئی بند کرن دا فیصلہ کیتا اے۔ ایہناں سارے شہراں وچ تعلیمی ادارے 28مارچ تیک بند رہن گے۔ فیصلے دا اطلاق سارے تعلیمی اداریاںاتے ہووے گا۔ پابندی دا اطلاق امتحانات والے سکولاں اتے نہیں ہووے گا۔ جہناں سکولاں وچ امتحانات ہو رہے نیں اوہ جاری رہن گے۔ دوجے پاسے نیشنل کمانڈ اینڈ آپریشن سینٹر دے تازہ ترین اعدادوشمار دے مطابق کورونا وائرس دے نال 43 افراد جاں بحق ہوگئے، جہدے بعد اموات دی تعداد 13 ہزار 324 ہوگئی۔ پاکستان وچ کورونا دے تصدیق شدہ کیسز دی تعداد 5 لکھ 95 ہزار 239 ہوگئی اے۔ پچھلے 24گھنٹیا ں دے دوران اک ہزار 786 نئے کیسز رپورٹ ہوئے۔





















