بلّے وئی بلّے

ارشاد بھٹی

کوئی دس رہیا اے 2018ء وچ اسلام آباد دے اک گھر وچ لیپ ٹاپ تے عمران خان نوں خیبرپختونخوا وچ سینٹ ڈنکی ٹریڈنگ دیاں 15 ویڈیو وکھائیاں گئیاں۔ لیپ ٹاپ میموری وچ دو فائلاں سن‘ اک وچ پنج ویڈیو جد کہ دوجی فائل وچ پندراں‘ پنج ویڈیو والی فائل اوپن نہ ہو سکی کوئی سنا رہیا اے اسد قیصر‘ پرویزخٹک نوں تحقیق‘ تفتیش کیتے بناں بے قصور قرار دینا زیادتی‘ کوئی دس رہیا اے ڈنکی ٹریڈنگ اک پاسے پی ٹی آئی نے تے اپنے ممبران نوں کدھرے ہور ووٹ نہ دین لئی وی پیسے دتے کوئی پچھ رہیا اے اوہ 20 صوبائی ممبراں دا کیہ ہویا‘ جہناں نوں مبینہ ڈنکی تے پارٹی چوں کڈھیا گیا سی۔ کوئی سوال کر رہیا اے جے 2018ء وچ ڈنکی ٹریڈنگ کرداراں دا پتہ لگ چکیا سی تے فیر کجھ ڈنکی ٹریڈنگ کرداراں نوں فیر ٹکٹ کیوں دتے گئے‘ وزیر کیوں بنایا گیا۔ کوئی کہہ رہیا اے پی ٹی آئی وچ ڈنکی ٹریڈنگ ہوئی‘ پی ٹی آئی نے پی ٹی آئی ملزماں لئی پی ٹی آئی لوکاں تے مشتمل کمیٹی بنا دتی۔ کوئی کہہ رہیا اے ایس ویلے سینٹ ڈنکی ٹریڈنگ دی ویڈیو سامنے لیانا‘ سپریم کورٹ تے اثرانداز ہون دی کوشش۔ کوئی کہہ رہیا اے ایہ رولا رپا مطلب سینٹ الیکشن اوپن بیلٹنگ دیاں کوششاں اصل وچ عمران خان تے پی ٹی آئی دا اپنے ممبراں دا مخالفاں نوں ووٹ دین دا ڈر‘ اتحادیاں دا اندر کھاتے کدھرے ہور ووٹ پائے جان دا ڈریاں پی ٹی آئی دے ارکان دے وِک جان دا ڈر‘ بھانت بھانت دیاں بولیاں‘ طرح طرح دے مفروضے‘ رنگ رنگ دے تجزیے۔ سینٹ ڈنکی ٹریڈنگ دی ویڈیو تے ایناں رولا‘ حیرانی ہو رہی اے‘ انج لگ رہیا اے جیویں ایمانداراں دے ملک وچ پہلی بے ایمانی ہو گئی۔ انج لگ رہیا اے دیانتداراں نے اپنے دیس وچ پہلی بددیانتی پھڑ لئی۔
اک چنی منی ویڈیو نوں ایویں ای بدنام کیتا جا رہیا اے ایہ تے اوہ ملک اے جتھے ڈاکٹر عاصم حسین اعترافی ویڈیو آئی سی۔ کیہ بنیا‘ پھاہے چڑھن توں پہلاں صولت مرزا دی ویڈیو آئی‘ کیہ ہویا‘ سر تے قرآن رکھ کے ذوالفقار مرزا دی ویڈیو کنہوں یاد اے‘ 35والیمز‘ 10والیمز‘ ٹی ٹی راج کپوراں دی ویڈیو‘ کجھ ہویا‘ ایتھے کمزور یادداشتاں‘ مضبوط معدے‘ لکڑ ہضم‘ پتھر ہضم‘ ایتھے 2018ء نوں رویا جا رہیا اے۔ ہن جو کجھ ہو رہیا اے‘ ہون جا رہیا اے ایہدے تے کوئی دھیان نہیں۔ ایتھے جدوں سپ کاروائی پا کے نکل جان فیر باجماعت لکیراں پٹیاں جاندیاں نیں جدوں سب کجھ ہو جاوے اودوں باجماعت پچھتایا جاوے‘ ہور سنو‘ خوشیاں منائیاں جا رہیاں نیں ڈھول کٹے جا رہے نیں‘ سینٹ ڈنکی ٹریڈنگ تے تحقیقاتی کمیٹی بن گئی‘ اجے تک کمیٹیاں‘ کمیشناں نال ڈھڈ نہیں بھرے‘ حمودالرحمن کمیشن توں ایبٹ آباد کمیشن سگوں قرضے کمیشن تک‘ دوائیاں کمیشن توں شوگر کمیشن تک آٹا‘ کنک‘ کمیٹیاں توں پٹرول‘ نجی بجلی گھر کمیٹیاں تک کیہ تیر چلا لئے‘ جو سینٹ ڈنکی ٹریڈنگ تے چلا لین گے۔ کمیٹی بن گئی تے کیہ‘ شفاف تحقیقات ہو گئی تے کیہ‘ ملزماں دا تعین ہو گیا تے کیہ‘ منطقی انجام‘ بالکل نہیں‘ ایس بدبودار نظام وچ کجھ نہیں ہونا‘ قدم قدم تے چوردروازے‘ پتلی گلیاں۔ قربان جاواں اپنی اپوزیشن تے‘ سینٹ اوپن بیلٹنگ قنون سازی تے ساتھ نہیں دے رہی‘ بغض عمران‘ صرف بغض عمران‘ نہیں تے نوازشریف کہہ چکے نیں ایہ سینٹ ہارس ٹریڈنگ مکروہ فعل ایہنوں ختم کرنا ہووے گا۔ اسحاق ڈار‘ احسن اقبال ایہنوں گھٹیا عمل قرار دے چکے‘ بلاول بھٹو ایس خریدوفروخت بھری کرپشن ختم کرن دا نعرہ لا چکے نیں‘ اپوزیشن کئی واری ڈسی جا چکی اے‘ جدوں محسن لغاری پنجاب اسمبلی توں ووٹ لے کے سینیٹر بنے‘ سارے روئے دھوئے ایہ کیہ ہو گیا جدوں پی ٹی آئی امیدوار چوہدری سرور لیگی ووٹ لے کے سینیٹر بنے‘ لیگی بک بک روئے‘ جدوں بلوچستان وچ ڈنکی ٹریڈنگ ہوئی‘ اپوزیشن نے ایہ سب ختم کرن دیاں بڑھکاں ماریاں‘ جدوں کے پی وچ ڈنکی ٹریڈنگ ہوئی‘ اپوزیشن نے ایہ چور دروازہ بند کرن دیاں قسماں کھادیاں‘ جدوں اپوزیشن دی چیئرمین سینٹ عدم اعتماد نکام ہوئی مطلب جدوں 40سینیٹرز جت گئے‘ 63 ہار گئے‘ اودوں خواجہ آصف نے الزام آصف زرداری تے مڑھدے ہوئے آکھیا کہ سیکرٹ ووٹنگ ظلم‘ بلاول بھٹو نے اپنے سینیٹراں توں استعفے لے کے کہیا سیکرٹ ووٹ نہیں ہونی چاہیدی۔
اللہ مغفرت کرے حاصل بزنجو مرحوم دی‘ کیہ ساڈے منہ تے کالک مل دتی گئی‘ رضاربانی بولے‘ مینوں سینٹ وچ بیٹھے شرم آ رہی اے۔ پرویز رشید نے حاصل بزنجو دی وفات تے تقریر کردے ہوئے سینٹ وچ کہیا‘ بزنجو صاحب توں معذرت‘ 14 ضمیر فروشاں نے اوہناں نوں دھوکھا دتا ہور تے ہور 14مئی 2006ء نوں لندن وچ پی پی‘ ن لیگ نے جس میثاق جمہوریت تے دستخط کیتے اوہدی اک شق سی کہ اقتدار وچ آ کے سینٹ الیکشن اوپن بیلٹ کراں گے پر پنج ورھے پی پی اقتدار وچ رہی‘ پنج ورھے لیگیاں نے اقتدار ہنڈایا‘ میثاق دی ایہ شق کسے نوں چیتے نہ آئی‘ ہن کیوں نہیں منظور اوپن بیلٹنگ‘ ایس لئی کہ ہن اوپن سینٹ بیلٹنگ دا محرک عمران خان اے۔ ایس لئی ساریاں نوں توقع عمران خان دے ممبر ٹٹن گے ایس لئی ایس واری سنھ عمران خان دی پارٹی نوں لگن دا ڈر اے۔
سینٹ اوپن بیلٹنگ تے سپریم کورٹ وچ صدارتی ریفرنس نوں اک پاسے رکھو‘ من لیا آرڈیننس نہیں آ سکدا۔ من لیا سپریم کورٹ وی ترمیم نہیں کر سکدی‘ الیکشن کمیشن دی رائے نوں اک پاسے رکھو‘ آئین پاکستان دی سن لینے آں۔ آئین دی دفعہ 226 کہوے وزراء اعلیٰ‘ وزیراعظم دے دو الیکشن اوپن باقی سارے الیکشن خفیہ‘ آئین دی دفعہ 217-B کہوے سارے الیکشن آئین پاکستان دے تحت ہون گے آئین دی دفعہ 288 کہوے ترمیم پارلیمنٹ وچ ہووے گی تے آئین دی دفعہ 239 کہوے آئینی ترمیم ٹوتھرڈ مجارٹی نال ہوے گی۔ ہن ٹو تھرڈ مجارٹی حکومت دے کول نہیں‘ اپوزیشن ساتھ نہیں دے رہی‘ باقی تسیں آپ سمجھ جائو۔ ہاں جے اپوزیشن دے آقاواں نوں ریلیف ملن دی آس ہووے‘ کیساں وچ ڈِھل دین دا چانس ہووے‘ کوئی لنگڑی لولی ڈیل دا موقع نکل آوے تے ایہو سب ملک و قوم دی بہتری لئی ہسی خوشی آئینی ترمیم کر لین گے۔ چلو ایہ سب اپنی تھاں‘ مینوں قرضیاں وچ بال بال جکڑی اپنی قوم نوں مبارکباد دینی اے جنہوں ملو‘ جس پاسے نکل جائو سینٹ انتخابات فارمولے ڈسکس ہو رہے نیں۔ کنہوں کنیاں سیٹاں ملن گئیاں‘ ایس واری جہانگیر ترین فیکٹر کنہوں فائدہ اپڑان والا اے‘ زرداری صاحب کس گریٹ گیم وچ مصروف‘ کس دھڑے توں کٹے ووٹ ٹُٹن گے‘ کہدیاں کنیاں سیٹاں ہون گئیاں‘ چیئرمین سینٹ کون ہووے گا‘ گلی گلی‘ محلے محلے وچ ایہ بحث‘ انج لگ رہیا اے مہنگائی‘ بیروزگاری‘ غربت سنے سارے مسئلے حل ہو چکے نیں بس ہن سینٹ میلہ سجے گا تے فیر اسیں ترقی دی موٹروے تے ہوواں گے۔ بلّے وئی بلّے۔
(بشکریہ روزنامہ جنگ)