مریم نواز نوں دوبارہ بلانا احتساب دے منہ اُتے چپیڑ اے، مریم اورنگزیب
لہور( پنجابی میڈیا گروپ ) مسلم لیگ ن دی ترجمان رہنما مریم اورنگزیب نے آکھیا اے کہ مریم نواز نوں دوبارہ بلانا احتساب دے مونہہ اتے طمانچہ اے۔نوازشریف نوں ملک توں ات گردی ختم کرن دا صلہ سزائے موت دی چکی‘بہناں تے بیٹیاں دی گرفتاری دی صورت وچ دتا گیا۔ لہوروچ میڈیا دے نال گل بات کردیاں ہویاں ترجمان مسلم لیگ ن مریم اورنگزیب داآکھنا سی کہ اج ملک اتے سلیکٹڈ ٹولہ مسلط اے تے ملک وچ اج مہنگائی دی شرح 16فیصد اے۔ شریف برادران نے ہمیشہ میثاق جمہوریت دی گل کیتی سی۔ پچھلے وزیراعظم میاں نوازشریف دی سرکار توں پہلاں ملک وچ 14گھنٹے دی لوڈشیڈنگ ہوندی سی تے نوازشریف دی قیادت وچ 2018 وچ لوڈشیڈنگ صفر کر دتی سی۔مسلم لیگ ن دی رہنما نے آکھیا کہ نواز شریف نے ملک وچ موٹروے دا جال بچھایا تے ات گردی ختم کیتی۔جہداصلہ سزائے موت دی چکی‘بہناں تے بیٹیاں دی گرفتاری دی صورت وچ دتا گیا۔اوہناں نے مزیدآکھیا اے کہ اج اوہ انتخابی اصلاحات دی گل کر رہے نیں جہڑے خود ووٹ چوری دی پیداوار نیں۔





















